Mathiơ 15:1-9
“’Bok Kei-Dei pơkă thoi âu: Iĕm athei lui yom kơ mĕ ‘bă păng dah bơngai bu pơma kơnê̆ kơ mĕ ‘bă sư, athei pơlôch tŭk bơngai noh.” (Mathiơ 15:4)
Nơ̆r jet tơchĕng pơwao:
– Nơ̆r Kră Yang bơtho thoi yơ gah tơdrong pơma dơnuh kon hơ’lơ̆p hăm mĕ ‘bă?
– Gah tơdrong juăt yă ‘bok bơ̆n pơkă sơ̆ păng tơdrong juăt ‘Bok Kei-Dei pơkă adrol hloh ih wei răk tơdrong juăt ayơ?
– Lu bơ̆n đei păng oei tơ’bôh jơhngơ̆m lui yom kơ mĕ ‘bă thoi yơ?
Lui yom kơ mĕ ‘bă jơ̆ tơdrong juăt ‘Bok Kei-Dei pơkă ăn kơ kon pơlei Sư. Păng mă bu bu pơm glăi kơ tơdrong juăt ‘nâu sư gô pŭ phak (Lăng Lêwi 20:9; LĐ Êyiptơ 21:17). Lu bơngai Pharisi iŏk dôm tơdrong juăt yă ‘bok pơkă sơ̆ jô̆ kơ bơngai pơhrăm păng Kră Yang pơm glăi, mălei Kră Yang khan hloi kơ bơngai Pharisi păng thây bơtho tơdrong juăt đe Juđê gah tơdrong lu sư pơm glăi kơ nơ̆r tơtă đơ̆ng Kră Yang. Kră Yang khan kơ bơnggai Pharisi kơplah lu sư bơtho kon pơlei: “Gah lu iĕm khan: Bơngai bu khan kơ mĕ ‘bă sư khan: Mŭk tơmam inh wă ‘me sa biĕm ră inh pơyơ̆r kơ ‘Bok Kei-Dei đĭ bơih.” (trong 5). Lu sư yua kơ kiơ̆ nơ̆r tơtă đơ̆ng kon bơngai, jơ̆ tơdrong juăt yă ‘bok pơkă lăm chăl noh sơ̆, na jing tŭk nơ̆r ‘Bok Kei-Dei. Lu sư wă yua akâu kơdih na bơtho kon pơlei huay pă kăl ‘me rong mĕ ‘bă sư dơ̆ng. Kră Yang khan kơ lu sư jơ̆ bơngai ‘bơ̆r đak klak ŭnh, tơplih kơ pơm kiơ̆ tơdrong Kră Yang, lu sư athei kon pơlei pơm kiơ̆ dôm tơdrong juăt đơ̆ng kon bơngai pơm kơdih. Lơ bơngai lui đei hnam dơnŏ lui kơ Kră Yang oei rơdu ưh kơ kơjăp. Oei tơ’bơ̆p lơ tơdrong pơma chrih đơ̆ng hnam dơnŏ, đơ̆ng kon pơlei pơla. Lu sư jô̆ khan pơm tơplơ̆ kơ tơdrong ‘lơ̆ng lăm hnam dơnŏ, jô̆ khan ưh kơ lui yom kơ yă ‘bok bơ̆n pơkă sơ̆. V.v… mă khan tơ’bơ̆p dôm tơdrong pơlong lăng, kon pơlei Kră Yang athei wei kơjăp tơdrong lui kơkuh kơ minh ‘nu Kră Yang ‘Bok Kei-Dei đĕch. Chu kiơ̆ tơdrong juăt Kră Yang hloh kơ đĭ đăng, đơ̆ng noh truh kơ tơdrong wei dôm tơdrong juăt ‘lơ̆ng lăm hnam dơnŏ, lăm kon pơlei pơla mă huay kơ tơplơ̆ kơ tơdrong lui bơ̆n.
Hăm mĕ ‘bă mă pơjing bơ̆n, mă đơ̆ng tơ’bơ̆p tơdrong thoi yơ, bơ̆n kư̆m athei đĭ jơhngơ̆m lui yom yua kơ chu kiơ̆ nơ̆r Kră Yang pơkă, yua kơ athei ‘mêm bôl buăl thoi Kră Yang ‘mêm kơ bơ̆n bơih, păng athei pơchrang anăn Kră Yang lăm pơlei pơla. Arih kiơ̆ kơ nơ̆r Kră Yang na bơ̆n tơ’bôh jơhngơ̆m lui yom phara kơ lu bơngai tam mă lui, ưh kơ năm kơkuh kơ rup yang, mălei đei tơdrong hiơ̆k ‘me rong mĕ ‘bă, pơma tơiung jơhngơ̆m mĕ ‘bă păng đĭ jơhngơ̆m krao khan kơ mĕ ‘bă, hnam dơnŏ. Kơplah mĕ ‘bă lôch, bơ̆n ưh kơ gơh pơm yang yua kơ mĕ ‘bă ưh kơ gơh sa tơmam bơ̆n pơm yang noh ôh, kư̆m ưh kơ gơh sa tơmam pơm yang minh năr lăm sơnăm, mălei tơplih kơ noh, bơ̆n athei pơhrăm kiơ̆ rok kơmĭl ‘lơ̆ng đơ̆ng mĕ ‘bă păng ling lang arih oei hiôk hơiă hăm ‘nhŏng mai oh adrĕch adrung krung kơtum bơ̆n kơdih, wă kơ đơ̆ng tơdrong arih bơ̆n tơ’bôh tơdrong ‘mêm, tơdrong dŏng pơklaih ăn kơ hnam dơnŏ păng buăl juăt. Athei ‘blŏk dah bơ̆n pơrơ̆ng weh ataih đơ̆ng hnam dơnŏ păng adrĕch drung bơ̆n lei bu wă roi tơdrong Kră Yang kơ lu sư?
Ơ Kră Yang, inh bơnê kơ Kră Yang ăn nơ̆r pơma Ih bơtho inh lui yom kơ mĕ ‘bă. Apinh Yang Bơhngol ‘Lơ̆ng tơ’blŏk păng tơgŭm inh đĭ jơhngơ̆m krao khan, păng arih lui yom trŏ thoi nơ̆r Kră Yang bơtho, krao khan yua anăn Kră Yang Yêsu Krist, Amen.
Lăm năr lui yom kơ mĕ ‘bă sơnăm ‘nâu, bơ̆n adrin pơm tơdrong kiơ wă tơ’bôh jơhngơ̆m lui yom kơ mĕ ‘bă?
Đŏk Sơ̆p Hla bơar ‘Bok Kei-Dei lăm pêng sơnăm: Êsai 5
Kênh Youtube BHKTHN:
