II Xwmtxheej 20:1-13
Nqe cim.
“Koj yog peb tus Vajtswv! Thov koj rau txim rau lawv, rau qhov tsis muaj leejtwg pab peb kom dim ntawm cov tubrog coob heev uas tuaj tua peb. Peb tsis paub yuav ua li cas, tiamsis peb thov koj pab peb.”(II Xwmtxheej 20:12b)
Lus nug rau sawvdaws xav.
– Cov Yudas tabtom ntsib lub tsamthawj txomnyem twg?
– Yam uas vajntxwv Yehausafas ua thaum lub tebchaws ntsib teebmeem yog dabtsi?
– Thaum ntsib kev txomnyem loj, yam xubthawj peb xav txog thiab ua yog dabtsi?
Cov Yudas tabtom raug lwm haivneeg nyob sab dej Yauladees tim ub tuaj tua. Thaum hnov xov li ntawd, vajntxwv Yehausafas txhawj ntshai heev. Thiab yam xubthawj vajntxwv ua yog “thov tus TSWV pab. Yog li ntawd, vajntxwv thiaj samhwm kom cov pejxeem sawvdaws ua kevcai yoo mov thoob lub tebchaws Yudas” (nqe 3). Cov pejxeem ua raws vajntxwv tej lus thiab nrhiav tus Tswv kawg siab thaum lub tebchaws ntsib teebmeem.
Vajntxwv Yehausafas yog tus vajntxwv paub “pehawm nws txiv tus Vajtswv, thiab nws ua raws li Vajtswv tej lus samhwm, nws tsis ua li cov Yixalayees tej vajntxwv ua”. Thaum nws nyuam qhuav sawv los ua vajntxwv, nws “kub siab lug ua raws li tus TSWV txoj kevcai” (II Xwmtxheej 17:4-6). Nimno, thaum lub tebchaws ntsib kev kub ntxhov, vajntxwv tsis ua raws li tus kheej lub peevxwm lossis tus kheej lub siabnyiam tiamsis nws nrhiav kev pab ntawm Vajtswv kawg siab kawg ntsws. Nyob hauv tej lus thov, vajntxwv zeem paub tus Tswv yog lawv “cov yawgkoob tus Vajtswv”; Nws yog tus “kav tagnrho txhua haivneeg hauv ntiajteb no”; “yog tus muaj hwjchim, muaj zog loj zog nchav, thiab tsis muaj leejtwg yuav tawmtsam yeej” (nqe 6). Vajntxwv muab lub tebchaws tej kev txhawj ntshai cob tagnrho rau Vajtswv thiab ntseeg hais tias tus Tswv tibleeg thiaj yog tus cawm tau tus Tswv haivneeg. Vajntxwv rov hais txog cov Yixalayees li keebkwm thiab lees lawv tej kev txhaum. Nimno tus Tswv haivneeg raug ris lubtxim ntawm lawv txojkev tsis mloog tus Tswv lus (nqe 7-11). Vajntxwv taij thov tus Tswv hlub Nws haivneeg thiab cawm lawv dim.
Thaum ntsib teebmeem, vajntxwv Yehausafas thiab cov Yudas tau txo hwjchim nrhiav tus Tswv, ua kevcai yoo mov thiab thov tus Tswv cawm lawv dim. Vajntxwv lees paub tias tus kheej thiab cov pejxeem tsis muaj peevxwm, tsis txaus dag zog tawmtsam yeej yeebncuab. Thaum kawg, tus Tswv tau teb nws tej lus thov thiab pub rau kovyeej lawv cov yeebncuab (II Xwmtxheej 20:14-26).
Thaum ntsib tej kev khwv loj, peb pheej xav hais tias kuv yuav tsum ua dabtsi lossis sib sablaj uake nrhiav tswvyim. Vajntxwv Yehausafas ua qauv zoo hauv kev xub nrhiav tus Tswv. Tagnrho cov pejxeem sib sau tuaj ua ke tsis yog tuaj nrhiav tswvyim tiamsis yog tuaj ua kom lawv txojkev ntseeg ruaj khov thiab nrhiav tus Tswv kev pab. Kawm raws vajntxwv Yehausafas tus qauv, peb tsis saib ntsoov rau tej teebmeem thiab nrhiav tswvyim raws peb txojkev txawjntse, tsis khiav deb teebmeem tiamsis taij thov Vajtswv kawg siab, muab txhua yam cob rau Nws thiab cia siab rau Nws kev pab cawm. Cia li ntseeg hais tias, tus Tswv “yog tus muaj hwjchim, muaj zog loj zog nchav, thiab tsis muaj leejtwg yuav tawmtsam yeej” Nws (nqe 6).
Thov Vajtswv,
Tus Tswv, thov qhuab ntuas nyuam yaus kawm raws vajntxwv Yehausafas tus qauv hauv kev xub nrhiav Koj thaum ntsib teebmeem. Thov pab nyuam yaus paub cia siab rau Koj lub hwjchim tsis txhob cia siab rau nyuam yaus lub zog lossis tej kev txawjntse. Nyuam yaus tuav Yexus Khetos lub npe thov, Amees.
Peb pheej nrhiav tswvyim daws teebmeem lossis xub nrhiav tus Tswv ua ntej?
Nyeem Vajluskub hauv peb lub xyoos: Lukas 8
Kênh Youtube BHKTHN:
