Klei Aê Diê Blŭ: II Klei Yăl Dliê 20:1‑13
Êlan kliăng: “Kyuadah hmei amâo mâo klei ktang ôh bi blah hŏng phung lu lĭn anei hriê ngă kơ hmei. Hmei amâo thâo ôh ya srăng ngă, ƀiădah ală hmei dôk dlăng kơ Ih” (II Klei Yăl Dliê 20:12b)
Klei êmuh ksiêm mĭn: Hŏng ya klei dleh dlan phung Yuđa dôk bi tlă anăp? Ya klei Mtao Jôsaphat ngă leh hŏng klei truh kơ ala čar? Tơdah tuôm hŏng klei dleh dlan prŏng, kơ ya klei drei srăng mĭn leh anăn ngă êlâo hĭn?
Phung Yuđa dôk tŭ klei lu phung găp djuê tue mơ̆ng hang nah dih êa ksĭ hriê čiăng bi blah, tơdah hmư̆ klei anăn, Mtao Jôsaphat huĭ snăk, leh anăn bruă tal êlâo hĭn ñu ngă jing: “čuăn duah Yêhôwa, leh anăn mtă klei kăm ƀơ̆ng huă tar ƀar čar Yuđa” (êlan 3). Phung ƀuôn sang gưt kơ klei mtao mtă leh anăn duah Aê Diê ti anăp klei dleh dlan prŏng ala čar.
Mtao Jôsaphat jing sa čô mtao thâo “duah Aê Diê ama ñu leh anăn êbat tui hlue klei Gơ̆ mtă, leh anăn amâo ngă ôh tui si phung Israel ngă.” Ñu “jhŏng êbat hlăm êlan Yêhôwa” hlăk hruê ñu mrâo kiă kriê (II Klei Yăl Dliê 17:4‑6). Ară anei hin, tơdah bi tlă anăp hŏng klei knap mñai truh kơ ala čar, ñu amâo mgaih mkra klei anăn tui si klei dưi amâodah tui si klei mĭn ñu pô ôh, ƀiădah ñu duah klei đru mơ̆ng Aê Diê. Hlăm klei wah lač hŏng jih ai tiê, ñu thâo kral Aê Diê jing “Aê Diê phung aê ñu”, Aê Diê jing “Khua kơ jih jang ƀuôn ala mtao”; “kngan Aê Diê mâo klei myang leh anăn klei ktang, snăn amâo mâo sa čô dưi bi kdơ̆ng hŏng Aê Diê ôh” (êlan 6). Ñu jao kluôm ênŭm klei knap mñai ala čar kơ Aê Diê leh anăn đăo knŏng Aê Diê yơh dưi bi mtlaih phung ƀuôn sang Ñu. Mtao Jôsaphat lŏ bi hdơr klei hƀuê ênuk phung Israel leh anăn hưn klei soh phung găp djuê ñu tuôm ngă leh. Ară anei hin phung Israel srăng mă tŭ boh jhat mơ̆ng klei diñu amâo gưt asăp kơ Aê Diê (êlan 7‑11). Ñu wah lač akâo kơ Aê Diê pap brei leh anăn bi mtlaih digơ̆.
Dôk ti anăp klei dleh dlan knap mñai, Mtao Jôsaphat leh anăn phung Yuđa bi luă gŭ diñu pô duah Aê Diê, kăm ƀơ̆ng huă leh anăn akâo kơ Aê Diê bi mtlaih diñu. Mtao tŭ ư kơ ñu pô leh anăn phung ƀuôn sang jing phung amâo mâo klă ênŭm, amâo mâo klei ktang dưi bi kdơ̆ng ôh hŏng phung roh. Ti knhal tuč, Aê Diê hmư̆ klei diñu wah lač leh anăn đru diñu dưi hŏng phung roh bŏ hŏng klei yuôm bhăn (II Klei Yăl Dliê 20:14‑26).
Tơdah tuôm hŏng klei dleh dlan prŏng, drei khăng mĭn si drei srăng ngă amâodah bi kƀĭn duah êlan si srăng lŏ bi kdơ̆ng wĭt hŏng klei dleh dlan anăn. Mtao Jôsaphat bi hmô leh kơ drei jing duah Aê Diê êlâo hĭn. Jih jang phung ƀuôn sang bi kƀĭn amâo djŏ čiăng bi trông čhai kơ hră êlan srăng ngă ôh ƀiădah čiăng mbĭt mđrăm bi êdah klei đăo kơ Aê Diê leh anăn duah klei đru mơ̆ng Ñu. Tui hriăm klei Mtao Jôsaphat bi hmô leh, đăm drei mgaih mkra klei dleh dlan tui si klei thâo mĭn drei pô ôh, kăn drei dêč đuĕ kơ klei knap mñai rei, ƀiădah brei drei wah lač hŏng jih ai tiê, jao jih klei drei uêñ hnĭng kơ Khua Yang leh anăn knang kơ Ñu. Đăo bĕ “Hlăm kngan Khua Yang mâo klei myang leh anăn klei ktang, snăn amâo mâo sa čô dưi bi kdơ̆ng hŏng Khua Yang ôh” (êlan 6).
Drei khăng duah êlan mgaih mkra klei dleh dlan drei pô hĕ amâodah drei wah lač akâo klei đru mơ̆ng Aê Diê?
Wah lač: Ơ Khua Yang, bi hriăm kâo tui knuih Mtao Jôsaphat tui duah Ih êlâo hĭn tơdah mâo klei knap mñai truh kơ klei hdĭp kâo. Đru kâo knang kơ klei myang Ih, amâo djŏ knang kơ klei thâo amâodah klei ktang kâo pô ôh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y‑Luk 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
