Yakơ 2:5-13
“Mă inh hli kơ iĕm ưh kơ pơm thoi noh tơpă ôh. Tơ̆ng iĕm lăng bơngai pha ra, mơ’nah iĕm ‘mêm mơ’nah iĕm ưh, iĕm pơm thoi noh yoch tơpă; păng ‘Bok Kei-Dei jô̆ iĕm bơngai pơhloh kơ tơdrong juăt Sư.”
(Yakơ 2:9)
Nơ̆r jet tơchĕng pơwao:
– ‘Bok Yakơ đei pơma roi tơ’bôh tơdrong kiơ wă bơtho kơ lu bơngai huay kơ pơdê dih băl?
– Đei tơ’blŏk kơ lu bơ̆n tơdrong kiơ kơplah bơ̆n băt kơ tơdrong pơdê dih băl ‘noh yoch?
Đơ̆ng rŏng kơ bơtho bơngai lui ‘nĕ kơ pơdê dih băl, ‘bok Yakơ đei pơma tơlĕch pêng tơdrong gah đon lui, tơdrong trŏ, păng tơdrong trŏ wă tơ’bôh tơdrong pơdê dih băl sư tơplơ̆ hăm tơdrong arih bơngai lui kơ Kră Yang.
Mă minh, gah tơdrong lui trŏ, arih pơdê dih băl ‘noh tơplơ̆ hăm tơdrong ‘Bok Kei-Dei arih hăm kon bơngai bơ̆n. Lăm trong 5, ‘bok Yakơ tơblang, Kră Yang “rơih iŏk lu bơngai dơnuh lăm teh đak ‘nâu wă pơm kơ lu sư jing bơngai mơdrŏng lăm tơdrong lui păng tơ dêh char Sư”. Lăm kơplah lu bơngai lui kư̆m tơchĕng wă kơ mơdrŏng na Kră Yang rơih iŏk lu bơngai dơnuh. Băt tơpă thoi âu ưh kơ trŏ khan yua kơ dơnuh na Kră Yang rơih iŏk, yua kơ tơdrong juăt trŏ đơ̆ng sơ̆ lăm tơdrong Kră Yang huai iŏk wă dŏng pơklaih ‘noh “yua kơ đơ̆ng Kră Yang mơnat, yua kơ đon lui”. Lăm âu, ‘bok Yakơ đei tơ’bôh minh tơdrong đei tơpă noh dôm lu bơngai lui kơ Kră Yang lăm Hnam akŭm kơplah noh sơ̆ ‘noh lu bơngai “dơnuh lăm teh đak”. Sơ̆p hla bơar ‘Bok Kei-Dei ngăl yua nơ̆r “dơnuh” wă pơma bơtho gah bơhngol: Dah minh ‘nu bơngai băt kơnăl kơ gah bơhngol dơnuh, ưh kơ đei kiơ lăm bơ̆n, đơ̆ng noh sơng iŏk tơmam Kră Yang mơnat ăn đĕch, na bơngai ‘noh jing mơdrŏng lăm đon lui.
Mă ‘bar, gah tơdrong lui trŏ, arih sa pơdê băl tơplơ̆ hăm dôm tơdrong kiơ lu bơngai lui oei tơ’bơ̆p. ‘Bok Yakơ oei chih kơthơ ăn kơ dôm lu bơngai lui Juđê oei tơklah tơklang jơ̆p anih, păng lơ bơngai lăm lu sư tă kơ bơngai dơnuh ngăl na lu bơngai mơdrŏng pơjuă pơđep mă đơ̆ng tơdrong arih gah sĕch akar lăm teh đak truh tơ lăm tơdrong lui (trong 6-7). Kiơ̆ kơ tơdrong juăt trŏ hmă lăm teh đak âu lu bơngai mơdrŏng ưh kơ dơ̆ng gah lu sư. Yua kơ thoi noh na lu sư ngăl pôk tơiung lu bơngai mơdrŏng, pơjăm pơjuă bơngai dơnuh. ‘Bok Yakơ tơ’bôh pơm thoi noh tơplơ̆ kơ tơdrong ‘lơ̆ng lu bơngai lui kơ Yêsu Krist.
Mă pêng, gah tơdrong juăt trŏ, pơdê dih băl tơplơ̆ hăm tơdrong juăt Kră Yang bơtho, “Athei ‘mêm kơ bôl buăl thoi bơ̆n ‘mêm kơ akâu kơdih” (trong 8). ‘Bok Yakơ chih iŏk tơdrong juăt ‘nâu đơ̆ng lăm Lêwi 19:18, đơ̆ng sơ̆ Kră Yang bơtho lu kon pơlei Sư athei ‘mêm băl lei lăi, ưh kơ gơh pơdê băl na athei ‘mêm kơ bơngai nai. Đơ̆ng noh sư khan bơngai bu pơdê dih băl sư jing yoch hăm khôi juăt Kră Yang, na mă pơm yoch minh tơdrong kư̆m dang pơm yoch đĭ đăng mơ̆n (trong 9-11).
Thoi noh, hơlen gah dôm tơdrong, bơngai lui kơ Kră Yang ưh kơ gơh pơdê dih băl. Athei ling lang băt kơnăl thoi âu Kră Yang lăng ‘bôh tơdrong bơ̆n arih sa hăm bơngai nai păng Kră Yang gô sek tơlang lu bơ̆n kiơ̆ thoi noh (trong 12-13). Đĭ đăng bơngai jum dăr kơ lu bơ̆n mă khan phara dih băl thoi yơ hĭ kư̆m đơ̆ng Kră Yang pơjing thoi rup Sư ngăl, đĭ đăng kon bơngai Kră Yang Yêsu ‘mêm lei lăi păng lôch tang đĭ đăng kon bơngai. Hơpơi apinh Kră Yang ăn kơ lu bơ̆n đei tơdrong ‘mêm kĕ jei đơ̆ng dôm tơdrong tơchĕng kơnê̆.
Lu bơ̆n kăl kơ pơm kiơ wă tơgŭm tơdrong arih sa pơdê dih băl lăm khul bơngai lui?
Ơ Kră Yang, bơnê kơ Kră Yang yua kơ Nơ̆r Ih tơ’bôh ăn kơ inh trong arih sa pơdê dih băl ‘noh yoch glăi, tơplơ̆ hăm tơdrong juăt trŏ mă Ih lăp đon. Apinh Ih mơnat lăm năr sek tơlang, inh gô huay kơ đei Ih phak yua kơ arih sa pơdê dih băl, na inh gô kơtơ̆ng Ih bơnê yua kơ arih ‘mêm mơnat kơ rim bơngai. Yua anăn Kră Yang Yêsu Krist, Amen!
Đŏk Sơ̆p hla bơar ‘Bok Kei-Dei lăm pêng sơnăm: II Samuel 17
Kênh Youtube BHKTHN:
