Kalatias 1:1-5
Nqe cim:
“Metub, cia li mloog koj txiv tej lus qhuab qhia. Ua tib zoo mloog koj thiaj li yuav totaub” (Pajlug 4:1)
Lus nug rau sawvdaws xav:
– Tsab ntawv Kalatias yog leejtwg sau thiab sau mus rau leejtwg?
– Vim li cas tus sau ho hais txog nws lub hauvpaus ua Timthawj?
– Peb muaj tus cwjpwm zoo li cas thaum tau cov neeg coj sab ntsujplig qhuab ntuas?
Raws li tus qauv ib tsab ntawv ntawm cov Loos, Timthawj Paulus pib nws tsab ntawv Kalatias los ntawm feem lus taw qhia txog nws yog tus sau, txuas ntxiv yog hais txog tus neeg txais thiab tej lus hais noj qab nyob zoo. Tsab ntawv Kalatias yog Timthawj Paulus thiab “tagnrho cov kwvtij” nrog nws ua haujlwm ua ke sau xa mus rau “cov pawg ntseeg uas nyob hauv Kalatias”, uas yog cov tibneeg Loos ib lub xeev uas nyob hauv Axias yau lub sijhawm ntawd (nqe 1-2). Tiamsis dhau ntawm cov lus hauv tsab ntawv, peb pom meej tias Timthawj Paulus yog tus sau tsab ntawv. Nyob hauv nqe xub thawj, nws siv ntau lolus los taw qhia txog nws rau cov neeg uas txais nws tsab ntawv, uas yog cov ntseeg Yexus uas nws tau tshaj tawm Txojmoo Zoo rau (Kalatias 3:1-5; 4:13-15). Vim li cas Paulus thiaj yuav tsum qhia hais tias “Qhov uas kuv tau ua Vajtswv ib tug timthawj, tsis yog neeg tsa kuv ua lossis yog Vajtswv kom leejtwg tsa kuv ua, tiamsis yog Yexus Khetos” xaiv thiab tsa (nqe 1) rau cov menyuam sab ntsujplig uas ibtxwm sib paub sib ncawg nrog nws? Vim tej thaum Paulus lub meejmom Timthawj tabtom raug cov ntseeg nyob hauv Kalatias ua xyem xyav. Qhov uas lees paub nws lub meejmom Timthawj yog dhau los ntawm tus Tswv, qhov no yim huab ua tabpov rau Txojmoo Zoo uas nws tshaj tawm txaus ntseeg thiab muaj kuab rau nws tej lus qhuab ntuas tom qab no rau cov menyuam sab ntsujplig uas tabtom raug cov xibhwb cuav uas qhia lwm zaj uas tsis yog Vajtswv Txojmoo Zoo dag ntxias lawv (Kalatias 1:6).
Thaum raug cov neeg uas nws coj los ntseeg tus Tswv ua xyem xyav txog nws lub meejmom Timthawj, Timthawj Paulus yeej tsis ua li tus neeg uas tsis txaus siab, iab siab, kuj tsis npautaws tas nyob ntsiag to tsis quav ntsej lawv lawm. Nws tau xaiv qhov uas sau ntawv xa mus rau lawv, kom rov tabpov rau lawv txog nws lub meejmom Timthawj thiab qhuab ntuas lawv txog tej teebmeem loj uas lawv tabtom ntsib. Yog ib leej txiv sab ntsujplig, Paulus tsis vim kev txajmuag ntawm nws tus kheej es tsis hais dabtsi rau lawv thaum lawv tabtom nyob hauv lub tsamthawj “yuav raug tuag” ntawm sab ntsujplig. Tuaj cuag tsis tau lawv tim ntsej tim muag, Paulus thiaj xaiv sau ntawv mus pab lawv.
Niaj hnub nimno, peb kuj yuav ntsib tej tsamthawj zoo ib yam nkaus li Timthawj Paulus. Ua ntej, yus tus kheej yuav tsum tuav ruaj kev ntseeg, tsis txhob khiav mus raws cov neeg uas qhia lwm zaj uas tsis yog Vajtswv Txojmoo Zoo, thiab cheem tsum paub muab yus txojkev txajmuag tshem mus kom nrhiav tau haukev pab cov menyuam sab ntsujplig uas tabtom raug ntxias mus yuam kev, yog mus cuag tsis tau lawv tim ntsej tim muag ces cia li sau ntawv, Email, lossis xa xov hauv xov tooj… mus nug moo, thiab qhuab ntuas. Lossis peb ho yog tus uas tabtom tau lwm tus qhuab ntuas txog tej kev ntseeg cuav uas yus tau mus caum hauv yus lub neej ntseeg, ces cia li muaj tus cwjpwm zoo siab txais yuav kom thiaj tsis mus yuam kev.
Thov Vajtswv,
Tus Tswv, thov pab kom nyuam yaus muaj peevxwm zeem paub leejtwg yog tus coj sab ntsujplig uas tau tus Tswv koj xaiv thiab pub hwjchim. Thov koj pab kom nyuam yaus ntse ntsuav thiab muaj lub pobntsej ua tib zoo mloog cov neeg uas Koj coj los qhuab ntuas nyuam yaus. Nyuam yaus tuav Yexus Khetos lub npe thov, A-mees.
Peb yuav ua li cas thaum tau txais tsab ntawv qhuab ntuas dhau los ntawm tus coj peb sab ntsujplig? Peb puas kheev sau ntawv mus pab txhawb lwm tus txojkev ntseeg lawm tau?
Nyeem Vajluskub hauv peb lub xyoo: 2 Xamuyees 10
Kênh Youtube BHKTHN:
