Klei Aê Diê Blŭ: I Y‑Yôhan 4:9
Êlan Kliăng: “Hlăm klei anei Aê Diê bi êdah leh klei Ñu khăp kơ drei: Aê Diê tiŏ hriê leh Anak Ñu mâo knŏng sa čô kơ lăn ala, čiăng kơ drei dưi dôk hdĭp kyua Ñu” (I Y‑Yôhan 4:9)
Klei êmuh ksiêm mĭn: Si Aê Diê bi êdah leh klei khăp hŏng drei? Ya klei yuôm bhăn mdê hĭn klei bi êdah anăn mkă hŏng klei anak mnuih bi êdah klei khăp? Si klei mñă kơ drei kơ klei yuôm bhăn klă sĭt mơ̆ng knăm Noel?
Klei khăp amâo djŏ knŏng sa knuih myang Aê Diê ôh ƀiădah Klei Aê Diê Blŭ lŏ lač “Aê Diê jing klei khăp” (I Y‑Yôhan 4:8). Lač kơ klei khăp, hlăk êjai anak mnuih bi mĭn kơ ai tiê leh anăn klei kđeh čiăng, snăn Aê Diê bi êdah klei khăp hŏng bruă ngă yuôm bhăn, anăn jing tŭ ư săn asei klei yuôm bhăn hĭn Ñu mâo. Khua Yang Yêsu, Anak Êkei Mâo Knŏng Sa Čô Aê Diê, tiŏ hriê ti lăn ala msĕ si klei bi mklă kơ klei khăp yuôm bhăn Aê Diê brei kơ anak mnuih.
Khua Yang Yêsu hriê ti lăn ala jing mnuih leh anăn djiê hrô kơ klei soh anak mnuih čiăng mơ̆ng anăn drei ƀuh klei pap brei leh anăn klei hdĭp hlŏng lar. Anăn jing klei khăp săn asei Aê Diê brei kơ anak mnuih luč leh. Lač hŏng klei kpă ênô, hƀuê ênuk anak mnuih mphŭn dô ăt kăn dưi kƀah mơh mnuih bi êdah klei khăp săn asei djiê hrô kơ pô mkăn. Snăn ya klei mdê klei khăp Aê Diê? Khua ƀĭng kna Y‑Pôl lač kơ klei mdê anei snei: “Dleh snăk mâo sa čô mnuih srăng djiê kyua sa čô mnuih kpă; ƀiădah năng ai mâo sa čô mnuih jhŏng djiê kyua sa čô mnuih jăk. Ƀiădah Aê Diê bi êdah klei Ñu khăp kơ drei snei, êjai drei ăt jing mnuih soh Krist djiê kyua drei” (Rôm 5:7-8).
Khua Yang khăp kơ drei wăt tơdah drei jing mnuih mâo klei soh, wăt tơdah drei amâo năng ôh. Anăn jing klei yuôm bhăn klă sĭt mơ̆ng knăm bi hdơr Hruê Kkiêng Khua Yang. Leh anăn anăn jing mta phŭn ya ngă yan bi hdơr hruê Noel lŏ dưi pia jing yan klei khăp. Hlăk êjai drei dôk mprăp kơ hruê yuôm bhăn anei, akâo kơ grăp čô pioh hruê mmông ksiêm mĭn kơ klei khăp Aê Diê. Klei khăp anăn jing klei săn asei prŏng prĭn, sa ênoh yuôm snăk tơdah Aê Diê brei leh Anak Ñu Mâo Knŏng Sa Čô kơ anak mnuih.
Kyua klei kkiêng kơ Khua Yang Yêsu, tŭ klei djiê leh anăn kbiă lŏ hdĭp hŏng klei guh kơang snăn anak mnuih lŏ dưi jing anak Aê Diê, dưi mŭt hlăm klei bi mguôp hlŏng lar hŏng Ama Hlăm Adiê. Anei jing mnơ̆ng yuôm bhăn hĭn kơ grăp čô brei mă tŭ. Grăp čô đăo jing mnuih mă tŭ leh klei khăp Aê Diê, brei jhŏng bi êdah klei khăp yuôm bhăn Aê Diê kơ lu mnuih mkăn.
Si drei bi êdah klei khăp hŏng Aê Diê leh anăn hŏng phung ka mă tŭ klei đăo hlăm gưl bi hdơr hruê kkiêng Khua Yang thŭn anei?
Wah lač: Ơ Khua Yang, yan Noel thŭn anei, sa blư̆ dơ̆ng kâo lŏ mâo klei mñă kơ klei khăp yuôm bhăn Ih brei kơ kâo. Wăt tơdah kâo jing mnuih mâo klei soh, amâo năng ôh, ƀiădah Anak Ih jing Khua Yang Yêsu hriê leh ti lăn ala, čiăng kyua anăn kâo dưi hdĭp. Ƀuăn jih ai tiê kâo bŏ hŏng klei hdơr knga čiăng kkuh mpŭ, myơr klei guh kơang kơ Khua Yang leh anăn bi êdah klei khăp Ih hŏng phung riêng gah. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 23
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
