Klei Aê Diê Blŭ: Galati 4:4-5
Êlan Kliăng: “Ƀiădah tơdah hruê bi kčah truh leh, Aê Diê tiŏ hriê Anak Ñu, brei sa čô mniê kkiêng, čiăng kơ Ñu dôk hdĭp ti gŭ klei bhiăn” (Galati 4:4)
Klei êmuh ksiêm mĭn: Si mblang “Hruê bi kčah truh leh” ? Si klei Aê Diê mprăp leh kơ hruê anei? Si klei mđĭ ai drei mơ̆ng klei kkiêng kơ Khua Yang Yêsu djŏ “hruê bi kčah”?
Klei Aê Diê Blŭ bi mklă Khua Yang Yêsu, Anak Aê Diê, arăng kkiêng tơdah “hruê bi kčah truh leh”. Anăn jing hruê Aê Diê čuăn mkra leh mơ̆ng êlâo dih. Jih jang klei truh hlăm klei hdĭp Khua Yang Yêsu mâo leh hdră mkra mơ̆ng ênuk mphŭn dơ̆ng (Klei Bi Êdah 13:8). Mơ̆ng lu êtuh thŭn, lu êbâo thŭn êlâo kơnăn, Aê Diê ƀuăn leh srăng brei Yang Mêsi, Pô Ñu ruah, hriê bi mtlaih phung ƀuôn sang Ñu (Y‑Êsai 7:14, 9:5-6; Y‑Mika 5:1). Anei jing ênuk Aê Diê, hlăm klei dưi Ñu kiă kriê kluôm ênŭm, čuăn srăng ngă bruă. Amâo hnưm hĭn ôh ăt kăn hnui rei. Anăn yơh jing hruê mông jăk hĭn kluôm dhuôm.
Aê Diê kiă kriê leh jih jang mnơ̆ng čiăng kơ hruê Anak Ñu hriê ti lăn ala ngă hdră bruă bi tui klei soh anak mnuih jing hruê mông jăk hĭn kluôm dhuôm. Kơ klei kđi čar, ala mtao Rôm dôk kiă kriê sa krĭng lăn ala prŏng leh anăn Mtao Sêsar Ôgust čiăng bi mklă klei dưi prŏng ñu pô hlăm kluôm jih ala čarsnăn ñu mtrŭn asăp ngă sa klei ksiêm yap ênoh mnuih ƀuôn sang, ngă kơ mnuih ƀuôn sang djăp anôk wĭt kơ ƀuôn sang diñu pô čiăng hưn hlăm hră yap (Y‑Luk 2:1). Kyua anăn, Y‑Yôsep leh anăn H’Mari wĭt ti Ƀetlehem “čiăng brei arăng čih anăn ñu mbĭt hŏng H’Mari pô bi čuôp leh hŏng ñu. H’Mari ba tian leh” (Y‑Luk 2:5), kyua anăn klei hưn êlâo kơ klei kkiêng kơ Krist srăng bi sĭt (Y‑Mika 5:1). Kơ klei đăo, anei jing ênuk mnuih Yuđa dôk čang guôn Mtao mơ̆ng Aê Diê hriê bi mtlaih diñu, jing pô mâo phung khua pô hưn êlâo hlăm Klei Bi Mguôp Hđăp lač leh. Kơ dhar kreh, anei jing hlăk klei blŭ klei Grĕk dưi yua lar ƀar, čiăng hâo hưn kluôm rŏng lăn hlăk ênŭk anăn hŏng klei ênưih hĭn. Jih jang klei anăn mjing leh sa ênuk jăk kluôm ênŭm kơ Khua Yang Yêsu hriê ti lăn ala, leh anăn čiăng kơ Klei Mrâo Mrang Jăk bi mtlaih mơ̆ng Aê Diê dưi hiu hưn kơ anak mnuih.
Ya klei drei dôk akâo? Tơdah drei dôk guôn sui leh ƀiădah ăt ka hmư̆ mơh klei wĭt lač, brei drei ăt dôk kjăp kyua Khua Yang amâo mâo êla ôh. Ñu dôk mprăp kơ hruê mmông jăk hĭn kluôm ênŭm Ñu. Hruê Khua Yang Yêsu hriê ti lăn ala jing klei hưn bi sĭt kơ klei sĭt nik anei. Leh anăn wăt tơdah ya klei drei dôk guôn dưn mơh, đăm wơr ôh Khua Yang brei leh klei jăk hĭn kơ drei – kyua klei Khua Yang Yêsu hriê ti lăn ala, drei dưi jing anak Aê Diê. Noel jing hruê mông Aê Diê bi kčah leh pioh ba Anak Ñu hriê ti lăn ala leh anăn “čiăng bi tui phung dôk ti gŭ klei bhiăn, čiăng kơ drei dưi mă tŭ klei brei jing anak rông ba” (Galati 4:5).
Si drei tuôm găn leh hruê mmông jăk hĭn kluôm ênŭm mơ̆ng Aê Diê?
Wah lač: Ơ Khua Yang, bi mni kơ Ih kyua Ih jing Aê Diê kơ hruê mông jăk hĭn kluôm ênŭm. Bi mni kơ Ih kyua Hruê Khua Yang trŭn hriê ti lăn ala mñă kơ kâo hdơr Ih amâo wơr kâo ôh. Khua Yang Yêsu hriê ti lăn ala čiăng kơ kâo dưi jing anak Ih. Akâo kơ Ih đru kâo gĭr dôk guôn hruê mông klei Ih ƀuăn srăng bi sĭt kluôm ênŭm. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
