Kalatias 4:4-5
Nqe cim:
“Tiamsis thaum txog lub sijhawm uas Vajtswv teem cia lawm, Vajtswv txib Vajtswv tus Tub los yug ua neeg, muaj ib tug pojniam yug nws. Thiab nws kuj coj raws li cov Yudais txoj kevcai ib yam li sawvdaws.” (Kalatias 4:4)
Lus nug rau sawvdaws xav:
– “Txog sijhawm teem cia” txhais tau li cas?
– Vajtswv twb npaj rau lub sijhawm teem cia zoo li cas lawm?
– Tes haujlwm Tswv Yexus los yug ua neeg ncaj rau lub sijhawm “teem cia” txhawb tau peb lub zog li cas?
Vajtswv Txojlus hais tias Tswv Yexus, Vajtswv Leej Tub, tau los yug ua neeg raws li “lub sijhawm teem cia”. Nws lub sijhawm Vajtswv teem puag thaum ub los. Txhua yam muaj nyob hauv Tswv Yexus lub neej puavleej tau teem cia ua ntej thaum tsis tau tsim ntuj tsim lawm (Tshwmsim 13:8). Ntau txhiab pua xyoo dhau los, Vajtswv twb coglus tseg yuav tso ib tug Cawmseej, tus uas Nws xaiv los cawm Nws haivneeg (Yaxayas 7:14, 9:5-6; Mikhas 5:1). Nov yog lub sijhawm Vajtswv teem cia, Nws lub hwjchim tswj kav tagnrho, Nws txiav txim siab ua txhua yam. Tsis ua ntxov twb yuav ua lig, nyob ntawm Vajtswv pom zoo lub sijhawm.
Vajtswv kav tagnrho txhua yam, lub sijhawm uas Nws tso Leej Tub los hauv ntiajteb ua txojkev cawmdim rau neeg yog los raws li lub sijhawm Nws teem cia. Hais txog sab kev tswj teb kav chaw, lub tebchaws Loos tabtom kav ntau lub tebchaws thiab Huabtais Xixas Aunkuxataus xav kom sawvdaws paub nws lub hwjchim kav txhua qhov, nws thiaj samhwm kom sau pejxeem npe, tej neeg sawvdaws uas nyob rau txhua qhov thiaj rov qab los rau lawv lub qub zos sau npe (Lukas 2:1). Yog li ntawd, Yauxej thiab Malis thiaj rov mus rau nram Npelehees “sau npe thiab. Thaum ntawd Malis suab ib plab menyuam.” (Lukas 2:5), qhov ntawd muaj tiav raws li cov cev Vajtswv lus hais tias Tswv Yexus yuav yug qhov chaw ntawd (Mikhas 5:1). Hais txog sab kev ntseeg, lub sijhawm ntawd yog lub sijhawm uas cov neeg Yudais tabtom tos tus Vajntxwv uas Vajtswv tso los cawm lawv, cov cev Vajtswv lus thaum ub tau hais txog. Hais txog sab kev ua neej, nov yog lub sijhawm uas sawvdaws hais lus Kilis thoob plaws, nws yoojyim rau kev xa xov rau lub sijhawm ntawd. Tagnrho tej uas hais saum no ua kom tiav raws lub sijhawm teem cia tus Tswv Yexus los yug ua neeg, thiab cia kom Txojmoo Zoo uas cawm neeg ntiajteb nrov mus txog txhua tus neeg.
Peb tabtom thov yam dabtsi? Yog peb tos ntev loo tsis tau txais, thov kom peb ruaj siab rau qhov tus Tswv yeej yuav tsis cia qeeb li. Nws tabtom npaj ua raws li Nws lub sijhawm teem cia. Qhov uas Tswv Yexus los yug ua neeg yog timkhawv rau qhov tseeb no. Thiab txawm yog peb tabtom tos yam dabtsi los, thov nco ntsoov hais tias Vajtswv twb pub yam zoo heev rau peb lawm – vamkhom qhov uas Tswv Yexus los yug ua neeg, peb tau lub meejmom ua Vajtswv menyuam. Tswv Yexus los yug yog lub sijhawm Vajtswv twb teem tseg hais tias Nws yuav tso Nws Leej Tub los rau hauv ntiajteb, thiab “pab tau cov neeg uas Vajtswv txoj kevcai muab khi cia lawm kom lawv dim. Nws ua li ntawd, peb thiaj tau ua Vajtswv cov menyuam.” (Kalatias 4:5).
Thov Vajtswv,
Tus Tswv, ua Koj tsaug vim Koj yog Vajtswv tus uas kav lub sijhawm. Qhov uas Tswv Yexus los yug ua neeg qhia rau nyuam yaus paub tias Koj yog tus Tswv uas nco ntsoov nyuam yaus. Tswv Yexus los yug nyuam yaus tau ua Koj menyuam. Thov Koj pab kom nyuam yaus ua taus siab ntev tos lub sijhawm Koj lo lus cog tseg tiav. Nyuam yaus tuav Tswv Yexus lub npe thov, Amees.
Peb tau txais tus Tswv lub sijhawm teem cia rau peb zoo li cas?
Nyeem Vajluskub hauv peb lub xyoo: I Xamuyees 21
Kênh Youtube BHKTHN:
