II Xwmtxheej Vajntxwv 29:4-11
Nqe cim:
“Kuv cov menyuam, nej tsis txhob cia sijhawm dhau mus. Nej yog cov uas tus Tswv xaiv los ua cov hlawv hmoov tshuaj tsw qab fij rau nws thiab coj sawvdaws pehawm nws.” (II Xwmtxheej Vajntxwv 29:11)
Lus nug rau sawvdaws xav:
– Vajntxwv Hexekiyas hu cov povthawj thiab cov neeg Levis tuaj hais yam dabtsi?
– Vajntxwv nqua hu kom lawv ua dabtsi?
– Peb paub yus tau hu los ua dabtsi rau Pawg Ntseeg?
Tomqab uas qhib lub Tuamtsev, Vajntxwv Hexekiyas hu cov povthawj thiab cov neeg Levis tuaj hais kom lawv rov txhim tsa txojkev pehawm Vajtswv. Thawj yam, vajntxwv hais kom lawv ua kevcai ntxuav lawv tus kheej thiab ntxuav tus Tswv lub Tuamtsev kom huv, rau qhov lawv cov yawgkoob tau ua kev phem kev qias, tso tus Tswv tseg thiab tsis pehawm Nws lawm. Vajntxwv rov hais txog lub txim uas tus Tswv haivneeg raug ua cov lus ceebtoom rau lawv (nqe 6-10). Tamsim no, vajntxwv qhia rau lawv paub tias nws xav kom rov qab muaj kev sib raug zoo nrog tus Tswv, qhia pom lub siab tawv qhawv ntawm vajntxwv thiab cov pejxeem xav tig rov los nrhiav tus Tswv tas siab (II Xwmtxheej Vajntxwv 15:12), kom Vajtswv txojkev chim tshem tawm ntawm cov pejxeem thiab Vajntxwv mus. Qhov kawg, vajntxwv tas siab nqua hu cov povthawj thiab cov neeg Levis hais tias; “Kuv cov menyuam, nej tsis txhob cia sijhawm dhau mus.” Rau qhov tus Tswv xaiv lawv “los ua cov hlawv hmoov tshuaj tsw qab fij rau nws thiab coj sawvdaws pehawm nws.”
Yog ib tug thawjcoj paub xav txog sab ntsujplig thiab kev hlub tus Tswv, Vajntxwv Hexekiyas nyuaj siab txog qhov uas tus Tswv haivneeg qaug zog sab ntsujplig thiab vim tej kev txhaum uas lawv tso Nws lub Tuamtsev, tsis pehawm Nws tseg. Vajntxwv zeem paub tus Tswv lub Tuamtsev yog lub uas Nws haivneeg nrog Nws sib raug zoo thiab fij lawv lub siab rau tus Tswv. Vajntxwv xav ua ib yam dabtsi los pab tej pejxeem lub neej sab ntsujplig, kom lawv tig rov los nrhiav tus Tswv thiab pehawm Nws, kom lawv tsis raug kev ceeb laj, puas tsuaj thiab tsis raug luag thuam ntxiv lawm. Vim li ntawd, vajntxwv hais rau cov povthawj thiab cov Levis yuav tsum nco ntsoov qhov uas lawv raug hu, tsis cia lub sijhawm dhau mus, cia li ua haujlwm kiag kom muaj kev pehawm Vajtswv hauv lub Tuamtsev.
Nimno, cov ntseeg Yexus yog cov neeg uas raug xaiv, yog cov povthawj uas ua Tswv Yexus tej haujlwm (I Petus 2:9). Tsis yog cov xibhwb, txwjlaug xwb tiamsis yog tagnrho peb txhua tus puavleej raug hu los ua tubqhe rau tus Tswv, ua Nws tes haujlwm nyob hauv ntau kis, thiab hlawv tej hmoov tshuaj tsw qab fij rau Nws, txhais tau hais tias sawv cev thov Vajtswv, ua Vajtswv tsaug. Thov Vajtswv pub rau peb txhua tus muaj lub siab zoo ib yam li Vajntxwv Hexekiyas, pom Pawg Ntseeg qhov kev cheemtsum thiab txiav txim siab ua ib yam kom pab tau cov neeg uas tabtom qaug zog sab kev ntseeg tig rov los cuag tus Tswv. Peb tsis txhob ua tus neeg uas tsis muaj kev hlub, kav liam lwm tus lub neej sab ntsujplig yuav zoo li cas los xij, tiamsis yuav tsum “tsis txhob cia sijhawm dhau mus”, ua timkhawv qhia rau cov neeg uas tsis tau paub tus Tswv kom lawv los pehawm Nws, lawv thiaj tsis raug txim (Yauhas 3:36).
Thov Vajtswv,
Tswv Yexus, thov Koj qhia kom nyuam yaus paub ua neej raws li Koj lub suab hu, kom nyuam yaus ua tau ib tug povthawj, ua haujlwm, pehawm, fij tej lus taij thov rau Koj thiab tsis cia sijhawm dhau mus, nyuam yaus yuav mus coj lwm tus los cuag Koj. Nyuam yaus tuav Tswv Yexus lub npe thov, Amees.
Peb puas “cia sijhawm dhau”, ua tus tsis paub Pawg Ntseeg tej kev cheemtsum, lossis cov neeg tsis ntseeg txojkev xav tau?
Nyeem Vajluskub hauv peb lub xyoo: I Xamuyees 13
Kênh Youtube BHKTHN:
