Tes Haujlwm 1:1-8
Nqe cim:
“Tiamsis thaum Vaj Ntsujplig tus Dawbhuv los nrog nej nyob lawm, Nws yuav pub hwjchim rau nej, thiab nej yuav ua timkhawv qhia kuv zaj mus thoob plaws hauv lub nroog Yeluxalees, hauv lub xeev Yudas, hauv lub xeev Xamalis thiab mus txog qab ntuj kawg.” (Tes Haujlwm 1:8)
Lus nug rau sawvdaws xav:
– Thaum Vaj Ntsujplig los, cov thwjtim yuav tau txais dabtsi thiaj ua tau timkhawv rau tus Tswv?
– Tus Tswv hu cov thwjtim mus ua timkhawv rau cov chaw twg?
– Nimno peb ua kom tiav lo lus samhwm no zoo li cas?
Tom qab uas Tswv Yexus sawv hauv qhov tuag rov los thiab ua ntej Nws yuav rov mus saum ntuj, Nws nrog cov thwjtim nyob tau plaub caug hnub, qhia rau lawv ntau yam hais txog Vajtswv lub Tebchaws thiab hais kom lawv nyob tos mus txog thaum tau txais Vaj Ntsujplig lub hwjchim mam tawm mus ua timkhawv hais txog tus Tswv zaj. Nyob rau tiam Vajluskub Qub, Vaj Ntsujplig los tshoov qee tus neeg ua tej yam haujlwm tshwjxeeb rau tus Tswv. Tiamsis hnub Peetekos tom qab uas Tswv Yexus mus saum ntuj lawm, Vaj Ntsujplig nqis los thiab nyob hauv cov ntseeg Tswv Yexus lub siab (I Kauleethaus 6:19; Loos 8:9).
Cov thwjtim xav paub txog lub sijhawm uas muaj lub tebchaws Yixalayees, tiamsis Tswv Yexus hais tias lub sijhawm ntawd tsuas yog Leej Txiv paub, lawv tsis tas yuav paub thiab paub tsis taus. Qhov uas tus Tswv xav tau yog lawv ua timkhawv qhia Nws zaj. Txawv li kev qhia thiab txhais lub ntsiab ntawm tej kev cai ntseeg, ua timkhawv hais txog tus Tswv yog rov los piav txog yus tej kev paub txog tus Tswv tes haujlwm uas Nws tau ua, hloov, foom koob hmoov rau cov ntseeg Nws (Tes Haujlwm 4:20). Qhov no, txawm yog leej twg, tsis hais tus nyuam qhuav los ntseeg tshiab los yeej muaj peevxwm ua tau. Tiamsis qhov tseemceeb yog tsis txhob vamkhom yus kev txawj hais lus lossis yus lub zog, yuav tsum vamkhom Vaj Ntsujplig lub hwjchim ua lub hauvpaus dag zog rau yus kev ua timkhawv txog tus Tswv (Xakhaliyas 4:6). Vaj Ntsujplig yuav tshoov tus uas mloog lub siab kom lawv paub kev txhaum, kev ncaj ncees ntawm Vajtswv tus uas dawbhuv, thiab txojkev txiav txim rau dab ntxwgnyoog thiab cov neeg ua txhaum tsis los ntseeg tus Tswv (Yauhas 16:7-11).
Hais txog qhov chaw mus ua timkhawv, txawv li thawj zaug tus Tswv txib lawv mus qhia tus Tswv zaj, cov thwjtim tsuas mus rau hauv cov neeg Yudais xwb (Mathais 10:5-6), zaum no tus Tswv hais kom lawv mus hauv lub nroog Yeluxalees, qhov chaw lawv nyob, ntxiv mus yog mus tagnrho hauv lub tebchaws Yudas, mus ibncig uas yog lub xeev Xamalis, thiab thaum kawg yog mus thoob qab ntuj (Mathais 28:18-20).
Thaum cov thwjtim ua kevcai raus los ntawm Vaj Ntsujplig lub hwjchim, lawv mloog lus thiab tawm mus ua timkhawv qhia txog tus Tswv zaj, txawm yog lawv yuav ntsib ntau yam kev nyuaj, kev tsimtxom los lawv yeej mus qhia Txojmoo Zoo thoob qab ntuj los txog niaj hnub nimno. Peb txhua tus yuav tsum ua ntxiv tes haujlwm uas lawv ua no, siv tus lw uas Tswv Yexus qhia no mus qhia Nws Txojmoo Zoo. Txhua lub Pawg Ntseeg cheemtsum siv zog ua timkhawv ntawm yus lub zos, yus haivneeg, thiab koom tes rau tes haujlwm qhia Txojmoo Zoo mus thoob qab ntuj. Kev txomnyem, nyuaj siab yeej tseem muaj, tiamsis cia peb vamkhom Vaj Ntsujplig lub hwjchim ua kom tiav tus Tswv lo lus samhwm.
Thov Vajtswv,
Tus Tswv, thov Koj pub kom nyuam yaus muaj kev txawj ntse thiab lub siab tawv qhawv mus ua timkhawv qhia Koj zaj rau nyuam yaus tej txheebze, phoojywg thiab cov neeg uas tsis tau paub Koj; kom lawv kuj tau kev cawm dim ib yam li nyuam yaus tau. Nyuam yaus tuav Tswv Yexus lub npe thov, Amees.
Peb thiab peb lub Pawg Ntseeg twb ua lossis tabtom ua timkhawv qhia txog tus Tswv zaj zoo li cas?
Nyeem Vajluskub hauv peb lub xyoo: I Xamuyees 2
Kênh Youtube BHKTHN:
