Klei Aê Diê Blŭ: Bruă Phung Khua Ƀĭng Kna 1:1-8
Êlan kliăng: “Ƀiădah tơdah Yang Mngăt Jăk truh kơ diih; diih srăng mă tŭ klei myang leh anăn diih srăng jing phung hưn bi sĭt kơ Kâo hlăm ƀuôn Yêrusalem, hlăm tar čar Yuđa, čar Samari, leh anăn tơl truh ti knhal lăn ala.” (Bruă Phung Khua Ƀĭng Kna 1:8)
Klei êmuh ksiêm mĭn: Tơdah Yang Mngăt Jăk truh, ya klei phung ƀĭng kna srăng mă tŭ čiăng hưn bi sĭt kơ Khua Yang? Hlăm ti anôk Khua Yang iêô phung ƀĭng kna hiu hưn bi sĭt? Hruê anei si drei ngă tui si klei mtă anei?
Leh Khua Yang Yêsu kbiă lŏ hdĭp leh anăn êlâo kơ Ñu đĭ wĭt ti dlông, Ñu ăt lŏ dôk mbĭt hŏng phung ƀĭng kna pă pluh hruê, mtô lač lu mta klei kơ Ƀuôn Ala Mtao Aê Diê leh anăn mtă kơ digơ̆ dôk guôn tinăn čiăng dưi mă tŭ klei ngă ƀaptem hŏng Yang Mngăt Jăk êlâo, leh anăn kơh kbiă hiu hưn bi sĭt kơ Khua Yang. Hlăm ênuk Klei Bi Mguôp Hđăp, tăp năng Yang Mngăt Jăk ngă bruă ti dlông đa đa mnuih mâo bruă jao yuôm mdê hjăn. Ƀiădah hlăm hruê knăm Pantơkôt leh Khua Yang Yêsu đĭ wĭt ti adiê, Yang Mngăt Jăk trŭn hriê leh anăn hlŏng dôk mbĭt hŏng jih jang phung anak Aê Diê sĭt (I Kôrantô 6:19; Rôm 8:9).
Phung ƀĭng kna duah čiăng thâo kơ ênuk lŏ mdơ̆ng ƀuôn ala mta Israel, ƀiădah Khua Yang Yêsu lač, klei anăn jing bruă Aê Diê Ama, amâo yuôm ôh kơ diñu čiăng thâo klei anăn. Klei Khua Yang čiăng jing brei diñu hiu hưn bi sĭt kơ Khua Yang. Mdê hŏng klei mtô mblang êlan bhiăn klei đăo, hưn bi sĭt kơ Khua Yang jing lŏ yăl dliê jih ya klei grăp čô diñu găn leh, bi knal leh mdê mdê kơ bruă Khua Yang ngă leh, bi mlih, hơêč hmưi kơ pô tŭ jum Khua Yang sĭt (Bruă Phung Khua Ƀĭng Kna 4:20). Klei anei, djăp pô, tơl wăt pô mrâo đăo kơ Khua Yang ka thâo săng lu dưn klei đăo ăt dưi ngă sơăi mơh. Ƀiădah klei yuôm hĭn, đăm mâo pô knang kơ klei ñu thâo blŭ amâodah kơ klei ktang hjăn ñu pô ôh, ƀiădah brei knang kơ klei myang Yang Mngăt Jăk, jing akŏ phŭn klei ktang myang čiăng hưn bi sĭt kơ Khua Yang (Y‑Sakari 4:6). Yang Mngăt Jăk yơh srăng kčŭt ƀuah kơ phung mnuih dôk hmư̆ kơ klei soh digơ̆, kơ klei kpă ênô Aê Diê doh jăk, leh anăn kơ klei phat kđi yang jhat mbĭt hŏng phung mnuih soh amâo čiăng đup gưt ôh kơ Khua Yang (Y‑Yôhan 16:7-11).
Bi kơ anôk hiu ngă bruă, mdê hŏng hlăk tal êlâo Khua Yang tiŏ nao digơ̆ hriăm ngă bruă, phung khua ƀĭng kna knŏng nao hưn hjăn kơ phung ƀuôn sang Israel (Y‑Mathiơ 10:5-6), tal anei Khua Yang mtă brei digơ̆ kčưm dơ̆ng mơ̆ng ƀuôn Yêrusalem, anôk digơ̆ dôk, nao ƀrư̆ ƀrư̆ tar čar Yuđa phung găp djuê Israel, leh anăn truh kơ čar jĕ giăm jing Samari, leh anăn knhal tuč truh ti knhal lăn ala (Y‑Mathiơ 28:18-20).
Phung ƀĭng kna leh mă tŭ klei ƀaptem hŏng Yang Mngăt Jăk, digơ̆ gưt asăp kbiă hiu hưn bi sĭt kơ Khua Yang wăt tơdah tuôm hŏng lu klei arăng ngă jhat, klei dleh dlan, čiăng kơ Klei Mrâo Mrang Jăk Khua Yang lar tar ƀar hlŏng truh kơ hruê anei. Grăp čô drei brei lŏ čuê ngă nanao bruă tiŏ nao jao leh mơ̆ng phung nao êlâo, mă yua hdră êlan Khua Yang Yêsu mtô hlăm bruă hiu hưn Klei Mrâo Mrang Jăk. Grăp Phung Sang Aê Diê brei hur har hiu hưn kčưm dơ̆ng mơ̆ng ƀuôn drei pô, găp djuê drei pô, ƀiădah mbĭt anăn ăt bi mguôp kdrêč hŏng bruă hiu hưn Klei Mrâo Mrang Jăk kơ tar ƀar lăn ala msĕ mơh. Klei dleh dlan, klei lông dlăng ăt adôk nanao, ƀiădah akâo Khua Yang brei drei knang kơ klei myang Yang Mngăt Jăk čiăng dưi găn jih, ngă bi leh klei mtă prŏng Khua Yang jao.
Si drei pô leh anăn Phung Sang Aê Diê drei ngă leh, leh anăn dôk hưn bi sĭt kơ Khua Yang?
Wah lač: Ơ Khua Yang, brei kơ kâo klei thâo mĭn leh anăn ai tiê jhŏng hiu hưn bi sĭt kơ Khua Yang hŏng phung găp djuê, mah jiăng leh anăn kơ phung ka tuôm thâo kơ Khua Yang, čiăng kơ digơ̆ ăt mâo klei bi mtlaih msĕ si kâo mơh. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
