Klei Aê Diê Blŭ: Y-Yakơ 1:16-18
Êlan kliăng: “Jih jang klei brei jăk leh anăn klei brei klă ênŭm trŭn mơ̆ng adiê mơ̆ng Ama klei mngač sơăi. Hlăm Ñu amâo mâo klei bi mlih ôh, kăn mâo êyui klei bi mlih rei” (Y-Yakơ 1:17)
Klei êmuh ksiêm mĭn: Si knuih drei khăng mâo tơdah bi tlă anăp hŏng klei dleh dlan hlăm klei hdĭp? Ya jing klei brei jăk Aê Diê brei kơ drei? Si ngă drei ngă čiăng dưi knang nanao kơ Khua Yang hlăm djăp mta klei truh?
Tơdah găn klei dleh dlan hlăm klei hdĭp, ênưih snăk kơ drei srăng mâo knuih phĭ leh anăn ƀuah. Dlăng kơ mnơ̆ng pô mkăn mâo, drei khăng mâo klei keh leh anăn bi mĭn ƀuh kơ klei hdĭp amâo mâo klei mtăp mđơr ôh, si ngă pô mkăn mă tŭ klei jăk sơăi, bi kâo amâo mâo sa mta ôh? Anei jing knuih khăng mâo, leh anăn năng ai anei jing knuih lu mnuih hlăm phung drei mâo mơh ară anei hin. Ƀiădah Y-Yakơ lač Aê Diê jing klei khăp, doh jăk leh anăn amâo tuôm mplư arăng ôh (Y-Yakơ 1:12-15), kyuanăn ñu mtă, “Ơ phung ayŏng amai adei kâo khăp, đăm diih lĕ hlăm klei mplư ôh” (êlan 16). Đăm đăo kơ klei blŭ luar anăn ôh kyuadah drei mâo lu hĭn kơ ya mnơ̆ng drei mĭn, anăn jing jih jang klei brei jăk leh anăn klei brei klă ênŭm mơ̆ng Aê Diê (êlan 17).
Ti krah klei hdĭp aguah tlam, tơdah drei mđing drei srăng ƀuh klei Aê Diê brei jăk êdimima. Grăp aguah kgŭ pĭt, drei mâo sa hruê mrâo pioh hdĭp, mâo êwa pioh bi êwa, mâo phung drei khăp hơiêng dôk mbĭt kăp bi đru, leh anăn adôk lu klei jăk mkăn đa đa. Ƀiădah dưi lač klei brei jăk hĭn Y-Yakơ lač hlăm trăn Klei Aê Diê Blŭ anei jing Aê Diê “lŏ bi kkiêng leh kơ drei hŏng klei Ñu blŭ sĭt nik” (êlan 18). Klei Blŭ sĭt nik jing klei čih hlăm Klei Mrâo Mrang Jăk hŏng klei anăn drei thâo kơ hdră Aê Diê bi mtlaih leh anăn đăo kơ Yêsu Krist čiăng lŏ mâo klei bi kkiêng mrâo. Klei lŏ bi kkiêng mrâo jing sa klei bi knăl prŏng leh anăn yuôm bhăn msĕ si Khua Yang Yêsu pô mblang leh snei: “tơdah sa čô amâo mâo klei lŏ bi kkiêng mrâo, ñu amâo dưi ƀuh ƀuôn ala mtao Aê Diê ôh” (Y-Yôhan 3:3).
Êjai phung dlăng hră ñu čih dôk bi tlă anăp hŏng lu klei dleh dlan hlăm klei hdĭp, Y-Yakơ čiăng digơ̆ đăm wơr bĭt ôh wăt tơdah digơ̆ amâo mâo lu dŏ ngăn leh anăn klei dưi lăn ala dưn, ƀiădah mnơ̆ng digơ̆ dôk mâo jing kdlưn êgao hĭn kơ jih jang. Amâo mâo mnơ̆ng dưi bi mđơr ôh hŏng klei dưi jing anak Aê Diê. Hlăm hră Êphêsô kdrêč 1, Khua ƀĭng kna Y-Pôl lač drei mâo “djăp mta klei jăk jĭn myang”, leh anăn ñu yap jih jang klei jăk jĭn anăn, si tô hmô klei pap brei kơ klei soh, klei bi tui, mâo Yang Mngăt Jăk dôk mbĭt, thâo săng kơ hdră leh anăn klei Aê Diê čiăng (Êphêsô 1:3-14). Hrô kơ khăp mĭn kơ mnơ̆ng drei amâo mâo ôh leh anăn hdĭp hŏng klei ƀuah leh anăn blŭ duñ duñ, yap bĕ jih jang klei jăk jĭn myang drei mâo hlăm Khua Yang leh anăn hdơr knga bi mni kơ Ñu grăp hruê.
Hruê anei, kơ ya klei drei srăng bi mni kơ Aê Diê?
Wah lač: Ơ Khua Yang, kâo bi mni kơ Ih kyua mnơ̆ng Ih brei amâo dưi mblang ôh hlăm klei hdĭp kâo. Hlăm Ih kâo mâo klei pap brei kơ klei soh, dưi jing anak Ih, mâo Yang Mngăt Jăk dôk mbĭt. Đru kâo găn jih klei dleh dlan hlăm klei hdĭp hŏng klei hdơr knga, thâo knang leh anăn thâo kral Ih jing Ama Pô sĭt suôr jăk êdimima. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Rôm 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
