Pajlug 22:17-21
Nqe cim:
“Kuv xav kom koj muab koj txojkev cia siab tso plhuav rau tus TSWV, vim li ntawd kuv thiaj muab tej lus no los qhia rau koj paub.” (Pajlug 22:19)
Lug nug rau sawvdaws xav:
– Tej lo lus twg qhia pom hais tias tus sau xav hais txog kev qhia menyuam nrhiav kawm qhov tseeb?
– Lub homphiaj ntawm kev qhia menyuam cia siab rau tus Tswv yog dabtsi?
– Peb tau coj qhia tej menyuam nrhiav qhov tseeb zoo licas?
Vajntxwv Xalumoos tas siab tas ntsws qhia menyuam cia siab rau tus Tswv. Nws sau tej tswvyim, kev txawjntse tseg cia kom menyuam kawm tau nws lubneej. Nyob hauv tej lus qhia no, nws siv tej lo lus xws li: “ua tib zoo mloog”, “nco tau tej lus ntawd”, “hais tau txhua lo” los hais hais txog qhov uas menyuam yuav tsum ua tib zoo kawm xyaum qhov tseeb thiab ua raws. Menyuam yuav tsum ua tib zoo mloog thiab txais yuav Vajtswv Txojlus kom tseebmeej, yuav tsum kawm, cim nco thiab xav hauv siab, tomqab ntawd qhia tshwm los ntawm tej lus hais ntse ntsuav, muaj paus muaj ntsis. Tej lus uas vajntxwv Xalumoos cob qhia menyuam nruj heev, qhia tseebmeej txog qhov tseeb, tiamsis nws kuj txhawb zog, thiab nplig siab kom menyuam xyaum ua raws qhov tseeb ntawd. Lub homphiaj ntawm kev qhuab qhia yog pab menyuam totaub tej kev txawjntse kom menyuam muaj kev cia siab rau tus Tswv. Tej yam cheemtsum qhia tau nws sau tseg cia kom menyuam tuav ruaj qhov tseeb, ua lub plag txhim kho kev ntseeg ruaj khov rau ntawm tus Tswv.
Vajntxwv Xalumoos tej lus qhia qhuab ntuas cov ua niam ua txiv, ua pog ua yawg txog feemxyuam qhuab ntuas thiab taw qhia lawv tej menyuam. Peb tej menyuam yuav tsum cim nco tej lus qhia txog qhov tseeb ntawm Vajluskub, kawm raws cov neeg zoo hauv txojkev ntseeg tus qauv, thiab ceem tus kheej kom muaj tus cwjpwm zoo, dawbhuv ntawm tus Tswv. Kev ntseeg tus Tswv yog yam tseemceeb rau txhua tus lubneej ntseeg, vim li ntawd txojsia ntev dhawv mus ibtxhis yuav tsum yog yam tseemceeb xubthawj uas niam txiv taw qhia rau lawv cov menyuam.
Niaj hnub nimno, tus Tswv twb pub rau peb Vajluskub uas yog Nws Txojlus lawm, thiab dhau ntawm Vaj Ntsujplig kev taw qhia, peb zeem paub tus Tswv qhov tseeb thiab txojkev coj mus tau txojsia ibtxhis. Tswv Yexus samhwm hais tias: “Kuv yog txojkev, yog qhov tseeb thiab yog txojsia; tsis muaj leejtwg mus cuag tau Leej Txiv, tsuas yog mus ntawm kuv mus xwb thiaj tau” (Yauhas 14:6). Tswv Yexus tibleeg thiaj yog Txojkev, yog Qhov Tseeb thiab yog Txojsia. Peb tej menyuam yuav tsum kawm thiab totaub Txojmoo Zoo kom lawv txais yuav Tswv Yexus, muaj kev cia siab ruaj khov rau ntawm tus Tswv, thiab txais tau txojsia ntev dhawv mus ibtxhis. Vim li ntawd qhov uas qhia menyuam cia siab rau tus Tswv yog qhov tseemceeb dua ntais thiab yog feemxyuam xubthawj ntawm niam txiv. Muaj ntau lub cuabyig niam txiv kub siab lug tuaj pehawm tiamsis tej menyuam tsis tuaj vim yog mus kawm ntawv. Kev kawm ntawv yeej tseemceeb tiamsis yog tsis muaj Vajtswv Txojlus taw qhia ces yuav ua lubneej yuamkev. Thov tus Tswv pab kom cov ua niam ua txiv saib hlob kev qhia menyuam muaj kev cia siab rau tus Tswv kom tau cawmdim, ua neej muaj nqis rau tus Tswv, rau lub cuabyig thiab rau zej rau zos.
Thov Vajtswv,
Tus Tswv, nyuam yaus ua Koj tsaug vim Koj tau pub Vajluskub taw qhia nyuam yaus thiab tej menyuam paub Koj qhov tseeb. Thov pab nyuam yaus tas siab tas ntsws qhuab ntuas, taw qhia tej menyuam kom muaj kev cia siab rau ntawm Koj, kom lawv ua tau lubneej muaj nqis. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb puas tau tas siab tas ntsws qhia menyuam kawm Vajluskub kom lawv muaj kev cia siab ruaj khov rau tus Tswv lawm tau?
Nyeem Vajluskub hauv peb lub xyoos: Loos 3
Kênh Youtube BHKTHN:
