Klei Aê Diê Blŭ: Klei Bi Hriêng 22:17-21
Êlan kliăng: “Kâo bi êdah leh klei anăn kơ ih hruê anei čiăng kơ ih thâo knang kơ Yêhôwa” (Klei Bi Hriêng 22:19)
Klei êmuh ksiêm mĭn: Ti pruê̆ blŭ brei ƀuh pô čih Klei Bi Hriêng kñăm kơ klei bi hriăm anak tui duah klei sĭt nik? Ya jing klei kñăm čiăng kơ klei bi hriăm anak thâo knang kơ Aê Diê? Si ngă drei mtô leh phung anak čô duah klei sĭt nik êlâo hĭn?
Mtao Y-Salômôn hŏng jih ai tiê, jih klei mĭn bi hriăm anak thâo knang kơ Aê Diê. Ñu mtô kơ klei thâo săng leh anăn klei thâo mĭn čiăng kơ anak dưi mă tŭ klei thâo mĭn mơ̆ng klei ñu bi knal leh hlăm klei hdĭp. Hlăm klei mtô anei, ñu yua dŭm pruê̆ blŭ “mđing knga leh anăn dôk hmư̆”, “djă pioh klei anăn hlăm ai tiê”, “dưi lŏ răk klei anăn” čiăng kñăm kơ klei anak khăp tui hriăm leh anăn yua klei sĭt nik. Brei anak mđing knga leh anăn mă tŭ Klei Aê Diê Blŭ bi nik, hriăm, čih pioh leh anăn ksiêm mĭn hlăm ai tiê, leh anăn dưi bi êdah hŏng klei blŭ thâo mĭn, djŏ hnơ̆ng. Klei Mtao Y-Salômôn bi hriăm anak jing khăng snăk, bi êdah klă klei sĭt nik, ƀiădah ñu ăt mtrŭt leh anăn bi mđĭ ai anak mơh čiăng anak yua klei sĭt nik. Klei kñăm čiăng kơ klei bi hriăm jing đru anak thâo săng kơ klei thâo mĭn čiăng anak thâo knang kơ Yêhôwa. Ñu čih jih ya klei čiăng bi hriăm čiăng kơ anak thâo săng sĭt kơ klei sĭt nik, mjing atur mkŏ mdơ̆ng klei đăo kjăp kơ Khua Yang.
Klei Mtao Y-Salômôn mtô lŏ bi hdơr kơ grăp čô phung jing aduôn aê, amĭ ama bruă klam bi hriăm leh anăn mtô mjuăt phung anak čô pô. Brei phung anak čô drei čih pioh klei mtô kơ klei sĭt nik mơ̆ng Klei Aê Diê Blŭ, tui knuih klei đăo phung gưl êlâo, leh anăn hriăm mjuăt čiăng mâo knuih doh jăk, yuôm bhăn Khua Yang. Klei đăo jing klei yuôm bhăn hlăm klei hdĭp phung đăo kơ Krist, kyuanăn, klei hdĭp hlŏng lar yơh jing klei brei amĭ ama bi hriăm êlâo hĭn hlăm klei bi hriăm anak čô.
Hruê anei, Khua Yang brei kơ drei hdruôm hră Klei Aê Diê Blŭ jing Klei Blŭ Aê Diê, leh anăn hŏng klei Yang Mngăt Jăk bi hriăm, drei thâo kral klei sĭt nik leh anăn êlan atăt kơ klei hdĭp hlŏng lar. Khua Yang Yêsu lač, “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng Kâo” (Y-Yôhan 14:6). Khua Yang Yêsu yơh jing Êlan, Klei Sĭt Nik, leh anăn Klei Hdĭp. Brei phung anak drei hriăm leh anăn thâo săng kơ Klei Mrâo Mrang Jăk čiăng digơ̆ đăo kơ Khua Yang Yêsu, thâo knang kjăp kơ Khua Yang, leh anăn dưi mă tŭ klei hdĭp hlŏng lar. Kyuanăn, bi hriăm anak thâo knang kơ Khua Yang jing klei yuôm hĭn leh anăn jing bruă klam mrô sa kơ amĭ ama. Mâo lu gŏ sang phung amĭ ama hur har snăk nao bi kƀĭn hlăm sang Aê Diê, ƀiădah bi phung anak amâo nao bi kƀĭn ôh kyua klei nao hriăm thiăm. Klei thâo jing yuôm, mâo klei thâo ƀiădah amâo mâo klei atăt gai mơ̆ng Klei Aê Diê Blŭ ôh sĭt nik srăng hdĭp soh. Akâo Aê Diê đru amĭ ama êlâo hĭn bi hriăm anak thâo knang kơ Aê Diê čiăng kơ anak mâo klei bi mtlaih, hdĭp mâo klei tŭ dưn kơ Khua Yang, kơ gŏ sang leh anăn kơ ƀuôn sang.
Si ngă drei bi hriăm anak Klei Aê Diê Blŭ hŏng jih ai tiê čiăng digơ̆ thâo knang kơ Khua Yang leh mơ̆?
Wah lač: Ơ Khua Yang, kâo lač jăk kơ Ih kyuadah Ih brei leh Klei Ih Blŭ pioh bi hriăm kâo leh anăn phung anak čô kâo thâo kral klei sĭt nik Ih. Đru kâo hŏng jih ai tiê, jih klei mĭn mtô leh anăn bi hriăm anak čô kâo thâo knang kơ Ih čiăng klei hdĭp digơ̆ mâo klei tŭ dưn kơ Khua Yang. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Rôm 3
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
