Teev Npe 11:4-6
Nqe cim:
“Tseeb tiag, tus ntseeg uas txaus siab rau tej uas nws muaj lawm thiaj yog tus npluanuj tiag” (I Timautes 6:6.
Lug nug rau sawvdaws xav:
– Zaug no cov pejxeem rov qab ua txhaum dabtsi?
– Yam dabtsi ua rau cov pejxeem ua txhaum?
– Yuav ua cas peb thiaj dim ntawm kev txhaum yws Vajtswv?
Ib zaug ntxiv cov pejxeem rov yws dua. Twb yog vim tsis lees kev txhaum tseeb, yog li ntawd thaum Vajtswv tsis rau txim lawm, ces lawv rov qab mus ua txhaum dua. Peb yuav tsum ua tib zoo xav txog keebtiv ntawm tej kev txhaum kom muaj kev zeem paub tseeb meej thiab lees kev txhaum, zoo dua qhov uas tsuas saib pom tej teebmeem yuav raug thaum ua txhaum.
Qhov uas ua rau lawv rov ua txhaum yws tus Tswv zaug no yog tim “cov neeg txawv tebchaws”, lawv tsis yog haivneeg Yixalayees lossis cov neeg ua qhev txawv tebchaws uas tawm hauv tebchaws Iziv nrog cov Yixalayees los (Khiavdim 12:38). “Cov neeg txawv tebchaws” yog cov neeg tsawg xwb, qee zaug tseem yog lawv cov tub txib thiab tiamsis ho ua yam tsis zoo tsuas rau cov pejxeem thiab ua rau lawv ua txhaum “nqhis nqaij, tej dib ntsuab, dib liab, tej dos raj, dos ntug hauvpaus thiab tej qij”, thiaj ua rau lawv yws. Cov pejxeem tsis yog tsuas yws vim nco tej zaub mov xwb tiamsis kuj yog vim lawv tau noj tej ntawd “tsis tau them nyiaj” txhais tau hais tias lawv tau noj dawb hauv tebchaws Iziv. Lawv tsis nco qab lawm hais tias yuav tau noj tej zaub mov ntawd lawv yuav tsum ua cev qhev, raug saib tsis taus, thiab lawv tej menyuam raug muab tua povtseg. Lub ntiajteb pheej dag hais tias mus raws tej kev ntshaw sab nqaij tawv tsis muaj teebmeem dabtsi. Thiab thaum lub ntiajteb taw cov pejxeem ntsia mus rau tej kev ntshaw sab nqaij tawv, ces lawv tsis nco lo lus cogtseg txog “lub tebchaws uas av rog thiab zoo qoob loo” (Khiavdim 3:8) nyob tom lawv hauv ntej lawm.
Tsis tas li ntawd xwb, cov pejxeem tseem yws vim lawv “tsis muaj zog hlo li lawm”. Nyob hauv lawv kev saib pom, ces tsuas yog “tej dib ntsuab, dib liab, tej dos raj, dos ntug hauvpaus thiab tej qij” thiaj yuav ua rau lawv txaus siab thiab muaj zog xwb! Kev dag ntxias uas lub ntiajteb pheej siv yog muab tej kev cheemtsum sab nqaij tawv saib hlob thiab muab tej ntawd los txiav txim siab rau kev ua neej. Cov pejxeem yws vim “TSUAS YOG niaj hnub noj cov manas NO XWB!”, lawv xav hais tias tej uas tus Tswv pub rau lawv me kawg li thiab lawv ntshaw tej yam nram tebchaws Iziv. Peb puas tabtom ntaus nqi yog rau tej uas tus Tswv muab pub rau peb? Peb puas txaus siab rau lub cuabyig, lub dag zog, tes haujlwm, Pawg Ntseeg, thiab kev ua tus Tswv haujlwm? Yuav tsum ceevfaj, vim qee zaug tomqab ib ntus tau txais tus Tswv tej koob hmoov, peb ho saib tej ntawd yog tej uas peb tsimnyog tau thiab tsis nco tus Tswv txiajntsig lawm.
Saib mus rau ib seem, peb yeej tswj tsis tau tej yam SAB NRAUD, txhais tau tias peb tshem tsis tau “cov neeg txawv tebchaws” thiab lawv tej lus haub ntxias tawm hauv peb lub neej mus. Tiamsis, peb muaj peevxwm tswj tau peb LUB SIAB, thiab thaum peb yog neeg “tseemceeb” ces peb yuav xwbtim nrhiav tej yam “tseemceeb sab ntsujplig”. Yog li ntawd, cia li nyob ze Vajtswv Txojlus, thov tus Tswv hloov peb txojkev xav thiab peb lub siab, thiab cia li txav los nyob ze tus Tswv haivneeg kom tau txhim kho thiab txhawb zog.
Thov Vajtswv,
Tus Tswv, thov ua tsaug rau tej yam uas Koj pub. Thov qhia nyuam yaus nco ntsoov txog Koj txojkev hlub thiab kev zoo, thov pab nyuam yaus siv yam Koj muab pub los ua Koj tes haujlwm. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb tabtom nrhiav tej yam tseemceeb sab ntsujplig lossis sab nqaij tawv?
Nyeem Vajluskub hauv peb lub xyoos: Cov Thawjtswj 19
Kênh Youtube BHKTHN:
