Klei Aê Diê Blŭ: Klei Yap 11:4-6
Êlan kliăng: “Mâo lu klei tŭ dưn mơ̆ng klei mpŭ kơ Aê Diê mbĭt hŏng ai tiê mơak.” (I Y-Timôthê 6:6)
Klei êmuh ksiêm mĭn: Ya klei soh phung buôn sang lŏ ngă tal anei? Ya phŭn knhal ngă kơ phung ƀuôn sang ngă soh? Si drei ngă čiăng tlaih lĕ ôh hlăm klei soh blŭ dŭñ dŭñ kơ Aê Diê?
Lŏ sa blư̆ dơ̆ng phung ƀuôn sang ăt blŭ dŭñ dŭñ mơh. Kyua mơ̆ng klei amâo kmhal sĭt ôh snăn yơh leh ruê̆ klei bi kmhal, diñu ăt lŏ plăk wĭt hŏng klei soh mơh. Brei drei ksiêm mĭn bi nik mơ̆ng phŭn knhal kbiă hriê klei soh, čiăng thâo kral djŏ klă leh anăn kmhal hĕ, hĭn kơ klei knŏng dlăng kơ boh jhat mơ̆ng klei soh.
Mta phŭn tlă anăp atăt diñu truh kơ klei soh blŭ dŭñ dŭñ tal anei kbiă ,hriê mơ̆ng “phung ƀuôn sang bi lŭk” jing phung tue dôk ti krah phung Israel, phung amâo djŏ phung Israel ôh amâodah phung hlŭn mơ̆ng čar mkăn kbiă đuê̆ mơ̆ng čar Êjip mbĭt hŏng phung ƀuôn sang Israel (Klei Kbiă 12:38). “Phung ƀuôn sang bi lŭk” knŏng ƀiă đuč, đa knŏng jing phung mă bruă kơ diñu, ƀiădah bi hmăi jhat kơ phung ƀuôn sang leh anăn ngă kơ diñu ngă soh “mâo klei mhao tluh snăk… kmŭn êa, kmŭn tuk, êsŭn prŏng, êsŭn điêt, leh anăn êsŭn toi;” dơ̆ng mơ̆ng anăn yơh diñu blŭ dŭñ dŭñ. Phung ƀuôn sang amâo knŏng blŭ dŭñ dŭñ kyua hnĭng kơ mnơ̆ng ƀơ̆ng ôh, ƀiădah wăt diñu lač dah “ƀơ̆ng hơăi mang” čiăng lač arăng čiêm brei mang kơ diñu ti čar Êjip mơh. Diñu wơr bĭt leh, čiăng mâo mnơ̆ng ƀơ̆ng anăn, diñu ngă hlŭn, tŭ klei hêñ, leh anăn arăng bi mdjiê phung anak diñu. Lăn ala ăt khăng mplư snei, tơdah tui tiŏ klei kđeh tluh amâo mâo boh tŭ jhat ôh. Leh anăn êjai lăn ala bi wir ală phung ƀuôn sang phă klei tluh kơ kđeh, snăn amâo tuôm bơ̆k hdơr ôh kơ klei ƀuăn kơ “čar mâo mnơ̆ng ƀơ̆ng huă mnăm êbeh dlai” (Klei Kbiă 3:8) dôk ti anăp diñu.
Hĭn kơnăn mơh, phung ƀuôn sang lŏ lač “klei mơai drei dlưh hrŏ leh”. Ală diñu ƀuh, knŏng “kmŭn êa, kmŭn tuk, êsŭn prŏng, êsŭn điêt, leh anăn êsŭn toi” kơh dưi bi mơak mơai, bi mrâo mngăt ai tiê diñu! Klei mplư luar mơ̆ng lăn ala khăng yua kăp bi mđĭ klei tluh čiăng kơ mnơ̆ng mnuă, leh anăn yap mnơ̆ng mnuă yơh čuăn jih jang klei hlăm klei hdĭp. Phung ƀuôn sang blŭ dŭñ dŭñ kyuadah “ală drei ƀuh KNŎNG mana”, čiăng lač jih jang mnơ̆ng Aê Diê brei kơ diñu jing điêt dhiêt đei, leh anăn diñu čiăng mâo lu mnơ̆ng mkăn mơ̆ng čar Êjip. Si ngă drei dôk ksiêm yap djŏ mơ̆ jih jang mnơ̆ng Aê Diê brei kơ drei? Drei mơak mơai mơ̆ hŏng gŏ sang, klei suaih asei mlei, bruă knuă, Phung Sang Aê Diê, leh anăn mmông găl dưi mă bruă kơ Aê Diê? Brei drei răng, huĭdah leh mă tŭ klei pap mơ̆ng Aê Diê, drei yap jih jang mnơ̆ng drei dôk mâo jing bhiăn mâo yơh, drei mâo klei dưi dưn, leh anăn amâo lŏ hdơr knga kơ Aê Diê ôh.
Tĭng sa nah mkăn drei amâo dưi ksiêm krơ̆ng ôh KLEI MƠ̆NG ÊNGAO, čiăng lač amâo dưi suôt ôh “phung ƀuôn sang bi lŭk” mbĭt hŏng klei iêô mthưr bi tluh hrip ai tiê klei mĭn kbiă đuê̆ hĕ mơ̆ng klei hdĭp. Ƀiădah lĕ, drei dưi ksiêm krơ̆ng AI TIÊ HLĂM LAM, leh anăn tơdah sĭt drei jing “phung mnuih myang” snăn sĭt nik drei knŏng čiăng tui duah ya “mta klei jing myang”. Kyuanăn, brei drei dôk giăm hŏng Klei Aê Diê Blŭ, akâo kơ Khua Yang bi mlih ai tiê klei mĭn drei, leh anăn bi jĕ giăm hŏng phung ƀuôn sang Aê Diê čiăng dưi bi đru bi krŭ.
Si ngă drei dôk tui duah klei doh jăk amâodah klei kđeh tluh?
Wah lač: Ơ Khua Yang, bi mni Khua Yang kyua jih jang mnơ̆ng Ih brei kơ kâo. Mñă brei kâo hdơr nanao kơ klei jăk Ih, leh anăn đru kâo thâo yua klei Aê Diê brei pioh mă bruă kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Phung Khua Phat Kđi 19
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
