Tes Haujlwm 15:36-41
Nqe cim
“Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm” (Kaulauxais 3:13)
Lus nug rau sawvdaws xav:
– Teebmeem dab tsi tshwm thaum uas timthawj Paulus thiab Npananpas tseem ua Vajtswv haujlwm puv npo koob hmoov?
– Lub tswvyim daws teemmeem hauv nkawd yog dab tsi?
– Peb kheev daws teebmeem hauv kev ua Vajtswv haujlwm li cas?
Yauhas, kuj muaj npe hu ua Malakaus, nws yog Npananpas ib tug kwv tij (Kaulauxais 4:10), nws twb tau pab haujlwm rau Paulus thiab Npananpas thawj zaus uas lawv mus qhia Txoj Moo Zoo (Tes Haujlwm 13:5), yog li ntawd, Npananpas thiaj hais kom coj Malakaus nrog lawv mus zaum no. Tiamsis Paulus tsis pom zoo vim Malakaus tau tso lawv tseg ib nrab ke hauv thawj zaus dhau los (Tes Haujlwm 13:13). Qhov teebmeem no ua rau Paulus thiab Npananpas sib cav txog Vajtswv tes haujlwm, raws li Lukas piav mas nkawd “sib cav heev”. Yog li ntawd, nkawd thiaj li sib cais, Paulus xaiv Xilas nrog nws mus, thiab Npananpas txawm coj Malakaus mus rau tebchaws Xaipas lawm.
Teebmeem thaum ua Vajtswv tes haujlwm yog yam uas yuav zam tsis dhau. Timthawj Paulus yog ib tus neeg uas kub siab lug rau Vajtswv tes haujlwm, yog li ntawd nws thiaj li txiav txim siab hloov tib neeg kom tsis txhob muaj kev cuam tshuam txog kev mus tshaj tawm Txoj Moo Zoo li yav dhau los. Npananpas ua tib zoo daws tej teebmeem ntawd kom haum ob tog raws li nws tus yam ntxwv uas ib txwm muaj, thiab txawm coj Malakaus nrog nws mus tshaj tawm Txoj Moo Zoo rau lwm thajtsam lawm. Kev tsis sib haum ntawm Paulus thiab Npananpas tsis yog vim nyias xav txog nyias lossis vim kev ntxub ntxaug, tiamsis vim nkawd puavleej kub siab rau Vajtswv tes haujlwm thiaj muaj li ntawd. Lawv thiaj muab cais ua ob pab mus tshaj tawm Txoj Moo Zoo kom thiaj zam dhau tej kev uas hais tsis sib haum ua teebmeem tseg. Nkawd tsis sib cav kom muaj yeej swb rau yus tus kheej, tiamsis nkawd hla dhau tej kev sim siab thaum daws tej teebmeem ntawd kom haum ob tog, vim Vajtswv tes haujlwm tsis yog vim lawv tus kheej. Txawm hais tias nkawd nyias muaj nyias kev xav txawv, tiamsis thaum kawg nkawd puavleej tso tseg txoj kev tsis sib haum thiab rov ua Vajtswv tes haujlwm ntxiv mus! Peb paub tias tom qab ntawd, Timthawj Paulus pom kev hloov pauv tiag tiag hauv Malakaus lawm, nws rov zoo siab siv tus tub hluas no los ua ib tug neeg ua haujlwm pabcuam hauv Paulus lub luag haujlwm (2 Timautes 4:11).
Timthawj Paulus tau qhia Vajtswv cov menyuam hauv Kaulauxais hais tias: “Nej ib tug yuav tsum pab ib tug. Yog nej cov muaj ib tug ua txhaum rau ib tug, nej ib tug yuav tsum zam txim rau ib tug, ib yam li Vajtswv twb zam txim rau nej lawm” (Kaulauxis 3:13). Leejtwg los yeej muaj thaum txawj yuam kev, kev xav tsis sib thooj, tsis sib haum rau hauv kev ua Vajtswv haujlwm. Txoj kev daws tsis yog kom yeej lossis swb tiamsis yuavtsum ua siab ntev, zam txim vim Vajtswv haujlwm thiab pawg ntseeg. Thaum peb tig los ua Vajtswv tes haujlwm ua ke li ntawd, txhua yam kev tsis sib haum, yog tias muaj, los yeej yuav muaj hauv kev hla dhau kom tsis cuam tshuam rau Vajtswv tes haujlwm.
Thov Vajtswv:
Vaj Leej Txiv! Thov cia nyuamyaus saib Koj tes haujlwm thiab pawg ntseeg tseemceeb tshaj txhua yam, kom tej kev tsis sib haum muaj tshwm tuaj los kom peb daws yoojyim thiab sai kom tsis cuamtshuam tes haujlwm tshaj tawm Txoj Moo Zoo uas Koj tau muab cob rau peb lawm. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Peb puas tseem pheej saib peb hlob dua thaum daws teebmeem?
Nyeem Vajluskub hauv peb lub xyoos: Yausuas 13
Kênh Youtube BHKTHN:
