Filipis 1:27-30
Nqe cim:
“Tiamsis qhov tseemceeb nej yuav tsum ua nej lub neej raws li Yexus Khetos Txojmoo Zoo…” (Filipis 1:27)
Lus nug rau sawvdaws xav:
– Timthawj Paulus samhwm thiab hais seem twg ntawm cov ntseeg lub neej rau cov ntseeg hauv nroog Filipis?
– Vim li cas lawv yuav tsum ua kom tau qhov no?
– Peb yuav tsum muaj lub siab li cas rau lo lus samhwm no?
Lo lus samhwm hauv nqe 27 pib thawj lo lus “tiamsis qhov”, muaj lub ntsiab hais tias tsuas, tseemceeb, txawm yog. Timthawj Paulus hais tias, txawm yog yuav nyob rau lub tsamthawj twg los xijpeem, nov yog cov lus samhwm Pawg Ntseeg yuav ua. Txhua tus uas yog Vajtswv menyuam yuav tsum “ua neej raws li Yexus Khetos Txojmoo Zoo”. Lo lus “ua neej” muaj lub ntsiab tshwjxeeb hais txog “lub meejmom ua pejxeem”. Timthawj Paulus xav hais txog qhov uas nomtswv Loos pub cov pejxeem hauv nroog Filipis meejmom ua pejxeem, ces yuav tsum ua pejxeem tsimnyog kom lub nroog yus nyob tau koob npe zoo, tus ntseeg Yexus tseem tau lub meejmom zoo ua pejxeem qaum ntuj, yog li yuav tsum hajyam ua neej kom phim yog neeg qaumntuj.
Vim li cas Vajtswv cov menyuam yuav tsum “ua neej raws li Yexus Khetos Txojmoo Zoo”? Thib ib, vim nws yog “Txojmoo Zoo”, tsis zoo li lwm yam kev ntseeg uas neeg rhawv, nov yog “Vajtswv lub hwjchim uas cawm tau txhua tus uas ntseeg dim.” (Loos 1:16). Thib ob, vim nws yog “Yexus Khetos Txojmoo Zoo”. Txojkev cawm dim uas peb tau txais tsis yog peb ua tau, tiamsis yog Vajtswv pub rau peb dhau los ntawm Yexus Khetos cov ntshav (Kaulauxais 1:12-14). Thaum tsis zeem paub yus qhov koob hmoov hauv tus Tswv ces lo lus samhwm tias “ua neej raws li Yexus Khetos Txojmoo Zoo” yuav dhau los ib lub nra hnyav, ua tsis taus tiav. Thib peb, vim Pawg Ntseeg tabtom raug kob tsovrog sab ntsujplig, dab ntxwgnyoog tabtom siv txhua lub tswvyim los rhuav Vajtswv lub tshwjchim. Peb muaj ib lub luag haujlwm tseemceeb yog cov neeg Vajtswv siv mus pab lub ntiajteb no paub tus Tswv thiab tau Nws lub tshwjchim ci ntsa iab, yog li peb yuav tsum ua lub neej kom tsimnyog thiaj ua tau qhovkaj thiab cawm tau cov neeg nyob hauv qhov tsaus ntuj dim los (Filipis 2:15).
Dua li ntawd, txawm yog tus neeg tsa Pawg Ntseeg Filipis tau meejmom ua timthawj, los Paulus tsis xav kom Pawg Ntseeg mloog Vajtswv lus thaum nws mus xwb (nqe 27). Nimno peb mloog tus Tswv lus kom haum lwm tus lub siab, los yog vim tus Tswv txojsia tabtom muaj nyob hauv peb. Tsis tas li ntawd xwb, vim peb hlub tus Tswv, zeem paub Txojmoo Zoo muaj nqis, thiab lees paub yus tabtom nyob rau lub caijnyoog sib tw sab ntsujplig.
Ua neej raws li Txojmoo Zoo kuj yog yam cuabyeej tseemceeb pab kom peb tiv dhau tej kev sim siab thaum raug tej neeg ntxub, tawmtsam. Nyob rau txhua lub tsamthawj, peb yuav tsum ua neej kom tsimmyog, muaj nqis, haum Vajtswv siab thiab ua rau Nws lub npe tau qhuas.
Thov Vajtswv,
Tus Tswv, nyuam yaus ua Koj tsaug vim Koj pub txojkev cawmdim rau nyuam yaus. Thov Koj pab kom nyuam yaus paub ua neej raws li Txojmoo Zoo kom xwv qhia tawm tus Tswv rau tej neeg nyob ib ncig thiab nyiaj taus tej uas sawvdaws ntxub, tawmtsam. Nyuam yaus tuav Tswv Yexus lub npe thov, Amees.
Peb puas muaj kev txiav txim siab lossis hloov yam dabtsi kom ua tau raws li lo lus samhwm ua neej raws li Txojmoo Zoo?
Nyeem Vajluskub hauv peb lub xyoo: Yauhas 5
Kênh Youtube BHKTHN:
