Klei Aê Diê Blŭ: Philip 1:27-30
Êlan kliăng: “Knŏng brei diih hdĭp năng hŏng klei mrâo mrang jăk Krist, …” (Philip 1:27)
Klei êmuh ksiêm mĭn: Ya klei khua ƀĭng kna Y‑Pôl mtă leh anăn kñăm kơ tĭng kdrêč hlăm klei hdĭp phung đăo ti Philip? Ya ngă brei diñu ngă tui si klei mtă anei? Ya klei mtrŭt drei brei ngă tui si klei mtă anei?
Klei mtă hlăm êlan 27 pŏk kčưm hŏng boh hră “knŏng”, mblang jing sa anăn yơh, phŭn kñăm, wăt tơdah. Khua ƀĭng kna Y‑Pôl kñăm ktang snei, wăt tơdah hlăm ya klei truh dưn, anei yơh jing klei mtă brei Phung Sang Aê Diê gưt ngă. Grăp čô phung anak Aê Diê brei “hdĭp năng hŏng Klei Mrâo Mrang Jăk Krist”. Boh blŭ “hdĭp” čiăng lač kñăm kơ “klei dưi jing phung ƀuôn sang”. Ñu čiăng lač kơ phung mâo klei dưi jing phung ƀuôn sang Rôm ti ƀuôn prŏng Philip, brei ba klei kdrưk mơak kơ ƀuôn prŏng diñu dôk hdĭp, bi kơ phung đăo kơ Krist wăt lŏ mâo klei dưi jing phung ƀuôn sang Ƀuôn Ala Mtao Adiê, snăn brei hdĭp bi năng kdlưn hĭn êjai mơh.
Ya ngă brei phung anak ƀuôn sang Aê Diê brei “hdĭp năng hŏng Klei Mrâo Mrang Jăk Krist ”? Tal sa, kyuadah anăn jing “klei đăo Klei Mrâo Mrang Jăk”, amâo mâo msĕ hŏng jih jang klei đăo mkăn mơ̆ng mnuih ôh, anei “jing klei myang Aê Diê pioh bi mtlaih grăp čô hlei pô đăo ” (Rôm 1:16). Tal dua, kyuadah anăn jing “Klei Mrâo Mrang Jăk Krist”. Klei bi mtlaih drei mă tŭ amâo djŏ jing dŏ drei amâodah mơ̆ng drei ôh, ƀiădah mơ̆ng Aê Diê brei kơ drei hŏng klei djiê Yang Krist (Kôlôs 1:12-14). Tơdah amâo thâo kral ôh klei pap drei dôk mâo hlăm Khua Yang, snăn klei mtă brei hdĭp “năng hŏng klei mrâo mrang jăk Krist” srăng jing klei ktrŏ snăk, amâo srăng dưi ngă ôh. Tal tlâo, kyuadah Phung Sang Aê Diê hlăk dôk hlăm kdrăn blah klei hdĭp mngăt, yang jhat dôk yua djăp mta mnêč čiăng bi jhat hĕ rup leh anăn klei guh kơang Aê Diê. Drei mâo bruă klam yuôm bhăn jing phung mnuih Aê Diê yua pioh đru lăn ala thâo kral Khua Yang leh anăn klei guh kơang Ñu, kyuanăn, brei drei dôk hdĭp bi năng, čiăng kơ hŏng klei anăn dưi ba klei mngač leh anăn klei Khua Yang bi mtlaih kơ lăn ala mmăt tĭt (Philip 2:15).
Hĭn mơh, wăt tơdah jing pô mkŏ mdơ̆ng Phung Sang Aê Diê ti Philip leh anăn arăng khăp čiăng, wăt mâo klei dưi kyua jing sa čô khua ƀĭng kna, Y‑Pôl ăt amâo čiăng ôh Phung Sang Aê Diê gưt klei Khua Yang mtă kyua khăp kơ ñu amâodah huĭ êjai mâo ñu dôk mbĭt (êlan 27). Hruê anei drei gưt klei Khua Yang mtă amâo djŏ ôh kyua čiăng bi mơak hlei pô, ƀiădah kyua klei hdĭp mrâo dôk čăt jing hlăm drei. Hĭn mơh, kyua drei khăp kơ Khua Yang, thâo kral ênoh yuôm prŏng prĭn Klei Mrâo Mrang Jăk, leh anăn thâo săng drei hlăk dôk hlăm kdrăn blah mngăt myang.
Hdĭp năng hŏng Klei Mrâo Mrang Jăk Krist ăt jing mnơ̆ng yua bi blah yuôm bhăn čiăng đru drei dưi găn gao djăp mta klei lông dlăng tơdah tŭ klei phung lăn ala ñĕ đuĕ, ksŭng ngă kơ drei. Hlăm jih jang klei truh, brei drei hdĭp tŭ dưn, bi mơak leh anăn bi guh kơang kơ Anăn Khua Yang.
Si ngă drei čuăn mơ̆ amâodah bi mlih ya mta klei mơ̆, čiăng ngă tui si klei mtă brei hdĭp năng hŏng Klei Mrâo Mrang Jăk Krist?
Wah lač: Ơ Khua Yang, bi mni kơ Ih kyua brei leh kơ kâo klei bi mtlaih. Akâo Khua Yang đru kâo hdĭp năng nanao hŏng Klei Mrâo Mrang Jăk, čiăng hưn mdah Khua Yang kơ phung riêng gah, leh anăn čiăng dưi găn gao klei lông dlăng tơdah tŭ klei phung lăn ala ñĕ đuĕ, ksŭng ngă. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Yôhan 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
