II Kevcai 29:16-21
Nqe cim:
“Nej ceevfaj nyob tsam muaj tej tus txivneej, tej tus pojniam, tej tsevneeg, lossis ib xeem twg uas hnub no tuaj sawv ntawm no tso tus TSWV uas yog nej tus Vajtswv tseg mus pe lwm haivneeg tej vajtswv. Yog nej ua li ntawd, nej yuav zoo li tus cag tshuaj iab uas tuaj hauv nej haivneeg.” (II Kevcai 29:18)
Lus nug rau sawvdaws xav:
– Mauxes qhuab ntuas cov Yixalayees tsis pub ua yam dabtsi?
– Nujnqis ntawm cov neeg uas twb paub Vajtswv Txojlus ceebtoom tiamsis tseem ua raws tus kheej siab xav yog dabtsi?
– Peb zeem paub Vajtswv yog Tus zoo licas?
Nyob hauv tshooj no, Mauxes hais txog ib qhov teebmeem tau sau tseg hauv phau kevcai, yuav ua rau tagnrho cov Yixalayees thiab nyias tus kheej raug foom phem, ntawd yog kev pe mlom. Ntawm no tsis yog ib qhov teebmeem tshiab, tiamsis yog qhov teebmeem pheej tshwm muaj ua rau cov Yixalayees raug tus Tswv rau txim ntau zaug dhau ntau tiam. Vim li ntawd, nyob hauv kev nqua hu tus Tswv haivneeg coj raws tej lus cogtseg ib txhis, Mauxes rov ceebtoom ib zaug ntxiv rau tus Tswv haivneeg txog tej teebmeem tsis zoo thaum lawv xaiv mus pe mlom, tsis xaiv muab siab pehawm Nws.
Tej kevcai tau muab tshajtawm thiab muab txhais lub ntsiab rau tus Tswv haivneeg, tiamsis yog leejtwg saib tsis taus tejlus ntawd, txawm yog twb paub tej kevcai lawm tiamsis tseem txhob txwm mus ua lubneej raws tus kheej siabnyiam, ces tus Tswv yuav tsis zamtxim thiab yuav tsub tej sub tawg sub ntsha uas sau hauv phau kevcai rau tus ntawd. Qhov no qhia hais tias Vajtswv yog tus khib xeeb, Nws tsis txaus siab qhov uas Nws haivneeg tso Nws tseg mus pe tej mlom tsis muaj qabhau. Nrog qhov ntawd, peb kuj pom hais tias yuav tsis muaj kev zamtxim rau tus uas twb paubmeej kev pe mlom yog yam Vajtswv ntxub ntxaug tiamsis tseem muaj lub siab tawv nias qees mus ua raws tus kheej siabnyiam.
Txijthaum tibneeg poob rau kev txhaum, kev pe mlom hloov Vajtswv qhov chaw pheej yog ib txojkev sim siab loj rau tibneeg, tsis hais cov ntseeg Yexus nyob rau txhua tiam. Yog hais tias hnub thaud tus Tswv haivneeg ntsib kev dag ntxias mus pe tej mlom uas tibneeg muab ntoo txua, muab pob zeb txaug; ces nimno cov ntseeg Yexus ho ntsib tej kev dag ntxias pe mlom uas haj yam nyuaj zeem paub. Muaj ntau tus hnov tsis muaj teebmeem licas thaum tseg tsheej asthiv tsis nyeem Vajluskub, tsis thov Vajtswv, tiamsis ho chim npau taws vim ib hnub tsis muaj xovtooj lossis internet. Lossis muaj ntau tug tuaj yeem siv tagnrho nws lub neej mus nrhiav nyiaj txiag, suab npe, heev dua li cia lub sijhawm los “nrhiav Vajtswv lub tebchaws thiab Nws txojkev ncajncees” (Mathais 6:33). Ntau tug tuaj yeem ntseeg tej lus moo cua, lus haub ntxias heev dua li ntseeg Vajtswv Txojlus; lossis qhuas lwm tus neeg heev dua qhuas tej qauv zoo dawbhuv hauv Vajluskub… Qhov tsimnyog hais yog cov neeg no pheej ua siab tawv tsis pauv hloov lawv kev ua neej. Yuav tsum nco ntsoov hais tias, Vajtswv yog tus khib xeeb thiab Nws yuav tsis zam txim rau cov uas muaj lub siab tawv, txawm yog lawv twb paub hais tias pe tej mlom uas qhov muag pom thiab tsis pom puav leej txhaum los lawv tseem txhob txwm mus ua.
Thov Vajtswv,
Tus Tswv, yog Vajtswv tus uas khib xeeb, thov tsoo nyuam yaus lub siab tawv kom ntsoog. Thov pab nyuam yaus kov yeej tej kev tshaw hauv nruab siab kom nyuamyaus tsuas txiav txim siab pehawm Koj ib leeg. Nyuam yaus tuav Yexus Khetos lub npe thov, Amees.
Muaj yam dabtsi hauv lub neej ua rau peb saib tseemceeb dua tus Tswv?
Nyeem Vajluskub hauv peb lub xyoos: II Kevcai 31
Kênh Youtube BHKTHN:
