Klei Aê Diê Blŭ: Klei Mtô Mñă Klei Bhiăn 29:16-21
Êlan kliăng: “Răng bĕ đăm mâo ti krah diih sa čô êkei amâodah mniê, boh gŏ amâodah găp djuê hruê anei mâo ai tiê lui wir Yêhôwa Aê Diê drei čiăng nao mă bruă kơ yang phung găp djuê anăn; kăn mâo hlăm phung diih agha djă êa kêč kam leh anăn boh phĭ” (Klei Mtô Mñă Klei Bhiăn 29:18)
Klei êmuh ksiêm mĭn: Ya klei Y-Môis mtă kơ phung ƀuôn sang Israel amâo dưi ngă? Ya boh jhat kơ phung thâo leh Klei Aê Diê Blŭ hưn brei răng ƀiădah amâo uêñ ăt hdĭp hlue si klei pô čiăng? Si Pô drei thâo kral Aê Diê jing?
Hlăm trăn anei, Y-Môis lač kơ sa bruă klă klơ̆ng čih leh hlăm hdruôm hră klei bhiăn ngă kơ jih djuê ana Israel leh anăn grăp čô srăng tŭ djăp klei tăm pah, anăn jing klei kkuh kơ rup yang. Anei jing sa bruă amâo mrâo ôh ƀiădah jing bruă khăng mâo ngă kơ phung ƀuôn sang Israel tŭ lu klei Aê Diê bi kmhal hlăm dŭm ênuk. Kyua anăn, hlăm ai tiê iêô mthưr phung ƀuôn sang Aê Diê djă pioh klei bi mguôp lă lar hŏng Aê Diê, Y-Môis sa blư̆ dơ̆ng hưn brei phung ƀuôn sang Aê Diê răng kơ boh jhat kjham snăk mơ̆ng bruă ruah kkuh kơ rup yang hrô kơ ruah thơ̆ng ai tiê kkuh mpŭ kơ Aê Diê.
Klei bhiăn dưi mtrŭn leh anăn mblang kơ jih jang phung ƀuôn sang Aê Diê, ƀiădah tơdah ăt dlăng klei blŭ anăn hơăi mang, wăt tơdah thâo leh klei bhiăn ƀiădah ăt čŏng hdĭp hlue si klei pô čiăng snăn Aê Diê srăng amâo pap brei ôh kơ pô anăn leh anăn tuh djăp klei truh čih leh hlăm hdruôm hră klei bhiăn grăp čô mnuih. Klei anei brei ƀuh Aê Diê jing Pô thâo trih, Ñu amâo tŭ ư ôh phung ƀuôn sang Ñu kkuh kơ rup yang amâo mâo sĭt mkăn êngao kơ Ñu. Êngao anăn, drei ăt ƀuh srăng amâo mâo klei pap brei ôh kơ phung thâo bruă kkuh kơ rup yang jing klei kăm hŏng Aê Diê ƀiădah ăt khăng ai tiê hlue ngă tui pô čiăng.
Yap mơ̆ng leh anak mnuih ngă soh, bruă kkuh kơ rup yang hrô kơ kkuh mpŭ kơ Aê Diê jing nanao sa klei lông dlăng prŏng, wăt hŏng phung đăo găn leh dŭm gưl ênuk. Tơdah hlăk đưm, phung ƀuôn sang Aê Diê tŭ klei mplư kkuh kơ rup yang hŏng kyâo, boh tâo kyua kngan anak mnuih mkra mjing, snăn phung đăo hruê anei lŏ tŭ lu klei mplư hŏng lu hdră kkuh kơ rup yang knhâo knhăk hĭn. Lu mnuih ƀuh amâo dihnei ôh tơdah jih hruê kăm amâo dlăng Klei Aê Diê Blŭ, wah lač, ƀiădah ngêñ bêñ kyua sa hruê kƀah đĭng blŭ leh anăn internet. Amâodah lu mnuih yua jih klei hdĭp pô čiăng duah prăk mah, klei hing ang, hĭn kơ pioh hruê mmông
“duah êlâo hĭn ƀuôn ala mtao Aê Diê leh anăn klei kpă ênô Ñu” (Y-Mathiơ 6:33). Lu mnuih đăo kơ klei blŭ arăng mplư, luar hĭn đăo kơ Klei Aê Diê Blŭ; amâodah mpŭ kơ anak mnuih hĭn kơ tui hriăm klei bi hmô phung ƀĭng kna doh jăk hlăm Klei Aê Diê Blŭ… Klei năng lač jing phung anei khăng ai tiê amâo bi mlih knuih hdĭp. Brei hdơr, Aê Diê jing Pô thâo trih leh anăn Ñu amâo pap brei ôh kơ hlei pô mâo ai tiê khăng, wăt tơdah thâo kkuh kơ rup yang thâo ƀuh amâodah amâo thâo ƀuh jing soh ƀiădah ăt ngă mơh.
Mâo ya klei hlăm klei hdĭp drei dlăng jing yuôm bhăn hĭn kơ Aê Diê mơ̆?
Wah lač: Ơ Khua Yang, jing Aê Diê thâo trih, akâo kơ Ih bi rai ai tiê khăng hlăm kâo. Akâo kơ Ih đru kâo dưi hŏng klei čiăng hlăm ai tiê pô čiăng knŏng gĭr kkuh mpŭ knŏng hjăn kơ Ih đuč. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 31
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
