Klei Aê Diê Blŭ: Y-Đaniel 1:8-21
Êlan kliăng: “Đăm jing msĕ si phung ênuk anei ôh, ƀiădah brei Aê Diê bi mlih klei hdĭp diih hŏng klei Ñu lŏ bi mrâo klei mĭn diih, čiăng kơ diih dưi thâo ya jing klei Aê Diê čiăng jăk, mơak, leh anăn klă.” (Rôm 12:2)
Klei êmuh ksiêm mĭn: Ya klei lông dlăng êkei hlăk ai Y-Đaniel leh anăn tlâo čô mah jiăng tlă anăp? Si diñu găn gao klei lông dlăng? Si drei ngă čiăng đăm bi hlai mbĭt hŏng lăn ala?
Lăn čar Israel jao leh hlăm kngan phung Ƀaƀilôn. Arăng mă phung ƀuôn sang Israel jing mnă. Hlăm anăn mâo pă čô êkei hlăk ai thâo mĭn kƀăt siam, arăng ruah digơ̆ kơ hdră bi hriăm mjuăt mdê hĭn pioh mă bruă kơ mtao. Sa hlăm pă čô anăn jing Y-Đaniel. Gơ̆ thâo mnơ̆ng ƀơ̆ng mnăm jăk mtao brei jing mnơ̆ng ngă yang leh, tui si klei bhiăn Israel tơdah ƀơ̆ng srăng bi čhŏ pô. Pă čô hlăk ai dôk tlă anăp hŏng klei lông dlăng prŏng snăk kyuadah digơ̆ knŏng jing phung hlŭn thŭn ăt adôk mda snăk. Ƀiădah lĕ, hŏng klei čuăn amâo bi čhŏ pô ôh, Y-Đaniel jhŏng akâo kơ khua kiă phung dĭng buăl brei gơ̆ mbĭt hŏng tlâo čô mah jiăng lông dlăng digơ̆ ƀơ̆ng djam leh anăn mnăm êa êjai pluh hruê. Aê Diê brei Y-Đaniel mâo klei khăp leh anăn klei pap ti anăp khua anăn, snăn ñu tŭ ư. Boh tŭ mơ̆ng klei ngă anăn, pă čô hlăk ai jing jăk siam hĭn kơ jih jang phung hlăk ai yua mnơ̆ng ƀơ̆ng mtao brei. Kyuanăn, digơ̆ mâo klei dưi amâo ƀơ̆ng ôh mnơ̆ng bơ̆ng mtao brei čiăng đăm bi čhŏ digơ̆ pô, ktuê jih hruê bi hriăm mjuăt. Aê Diê brei kơ digơ̆ klei suaih ktang hlăm asei mlei wăt klei thâo mĭn lu, klei mbruă hlăm jih klei hriăm leh anăn klei knhâo. Boh nik nak, Y-Đaniel wăt lŏ mâo klei thâo săng jih jang klei bi êdah leh anăn klei êpei mơh.
Hŏng klei čuăn hlăm ai tiê amâo bi hlai mbĭt hŏng phung ƀuôn sang tue, amâo brei dhar kreh, klei bhiăn diñu bi čhŏ klei hdĭp mngăt, Y-Đaniel leh anăn tlâo čô mah jiăng mâo klei Aê Diê hơêč hmưi êbeh dlai. Ti hruê mtao mtă atăt ba digơ̆ ti anăp mtao, pă čô êkei hlăk ai thâo huĭ mpŭ anei mâo klei thâo mĭn kdlưn hĭn hŏng phung adôk mkăn. Klei knhâo klei thâo săng digơ̆ kdlưn hĭn pluh blư̆ kơ jih phung mdian leh anăn phung ksiêm mtŭ hlăm jih ƀuôn ala mtao.
Klei hdĭp Y-Đaniel wăt tơdah dôk hdĭp ti krah phung ƀuôn sang tue kkuh mpŭ kơ rup yang, ƀiădah gơ̆ kluôm dhhôm amâo bi hlai mbĭt hŏng diñu ôh. Răk dlăng ktuê jih hdruôm hră Y-Đaniel, drei ƀuh gơ̆ djă pioh nanao knhuah hdĭp sĭt suôr hŏng Aê Diê. Hŏng klei đăo kjăp kơ Aê Diê yơh, êdei tinăn gơ̆ mâo mmông găl brei mtao Y-Đarius thâo kral Aê Diê leh anăn mtă kơ kluôm jih ƀuôn ala mtao brei huĭ mpŭ kơ Aê Diê (Y-Đaniel 6:25-27). Sĭt yơh, Y-Đaniel leh anăn tlâo čô mah jiăng hdĭp klei hdĭp đăo tŭ jing êdi ti krah lăn ala!
Hruê anei, hdĭp ti krah ƀuôn sang amâo kkuh mpŭ kơ Aê Diê, phung đăo kơ Krist êlưih snăk bi hlai mbĭt hŏng lăn ala tơdah drei amâo dôk răng gưt ngă hlue Klei Aê Diê Blŭ, leh anăn knang kơ Ñu bi mlih mrâo klei mĭn drei grăp hruê. Phung anak ƀuôn sang Aê Diê amâo dôk hdĭp hjăn păn, klah đuĕ mơ̆ng lăn ala tui duah klei đăo ôh, ƀiădah Khua Yang čiăng kơ drei dôk hdĭp ti krah lăn ala, hdĭp mbĭt hŏng lăn ala čiăng brei jing “hra kơ lăn”, “klei mngač kơ lăn ala”. Akâo Khua Yang brei drei “Đăm jing msĕ si phung ênuk anei ôh” ƀiădah čuăn ai tiê gưt ngă Klei Aê Diê Blŭ mtô čiăng kơ lu mnuih ƀuh Khua Yang mơ̆ng knhuah hdĭp mâo klei bi mlih mrâo drei.
Dlăng wĭt kơ klei hdĭp drei grăp hruê, mâo mơ̆ ya mta klei drei dôk bi hlai mbĭt hŏng lăn ala?
Wah lač: Ơ Khua Yang, akâo Ih bi mlih mrâo klei mĭn kâo, brei kâo dlăng kơ Khua Yang nanao, lehanăn tui duah klei Ih čiăng hlăm knhuah hdĭp grăp hruê, čiăng kơ kâo amâo bi hlai mbĭt hŏng lăn ala ôh, ƀiădah čuăn ai tiê hdĭp tui si Klei Aê Diê Blŭ mtô. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
