Klei Aê Diê Blŭ: Klei Mtô Mñă Klei Bhiăn 28:20-29
Êlan kliăng: “Yêhôwa srăng bi truh kơ diih klei tăm pah, klei rŭng răng, leh anăn klei arưp aram hlăm jih jang bruă diih mĭn čiăng ngă, tơl diih rai leh anăn djăl luč, kyua klei ƀai diih ngă, kyua klei diih lui wir Yêhôwa leh.” (Klei Mtô Mñă Klei Bhiăn 28:20)
Klei êmuh ksiêm mĭn: Dŭm klei tăm pah anei djŏ tuôm kơ ya mta bruă? Si hnơ̆ng kjham mơ̆ng klei tăm pah anei? Si drei thâo săng kơ boh jhat amâo gưt kơ klei bi mguôp?
Trăn Klei Aê Diê Blŭ anei lŏ dơ̆ng lač kơ klei rŭng răng kơ klei hdĭp phung amâo gưt asăp. Năng ai dưi lač, ngă klei ƀai leh anăn amâo gưt asăp, lui Aê Diê jing phŭn ba kơ djăp klei tăm pah hlăm klei hdĭp. Tinei drei ƀuh hnơ̆ng klei tăm pah amâo djŏ knŏng dôk hlăm grăp čô mnuih amâodah gŏ sang ôh ƀiădah lar lu hĭn, mâo hnơ̆ng hmăi kơ ala čar. Amâodah lŏ lač, klei tăm pah amâo djŏ knŏng hmăi kơ klei hdĭp, êsei huă djam ƀơ̆ng dŭm čô đuč ôh ƀiădah lŏ hmăi kơ klei êđăp ênang leh anăn klei hdĭp mơ̆ng sa djuê ana. Klei anei brei drei ƀuh sa phung ƀuôn sang Aê Diê amâo gưt asăp snăn Aê Diê srăng amâo lŏ răng mgang amâodah kriê dlăng phung ƀuôn sang Ñu msĕ si rup sa čô ama pŭ, kriê dlăng anak pô ôh. Hrô kơ anăn, Ñu srăng bi kdơ̆ng hŏng phung ƀuôn sang, tuh kơ digơ̆ klei ruă duam êlâo dih Ñu ƀuăn leh srăng lui kơ digơ̆. Phung ƀuôn sang Aê Diê srăng djiê ƀrư̆ ƀrư̆ kyua klei ruă, klei ư̆ êpa, phung roh mdlưh hŏng klei hêñ snăk hlăm klei bi blah, asei atâo mâo lu snăk amâo mâo hlei pô dơr ôh leh anăn jing mnơ̆ng ƀơ̆ng kơ čĭm čap hŏng hlô mnơ̆ng ti lăn.
Tơdah Aê Diê lŏ wĭt mă klei Ñu đru hlăm klei hdĭp drei snăn srăng amâo mâo sa klei čang hmăng amâodah sa êlan tlaih mkăn ôh. Amâodah lŏ lač, klei bi mguôp amâo brei kơ ya klei čang hmăng kơ phung amâo gưt asăp, ngă klei ƀai leh anăn lui Aê Diê. Lu phung ƀuh huĭ hyưt ti anăp klei djiê êka mơ̆ng klei tăm pah hlăm klei bi mguôp. Amâodah ăt mâo mnuih ƀuh amâo thâo săng ôh ya ngă sa Aê Diê jing jăk snăn lŏ tuh lu klei tăm pah kjham snăk kơ phung ƀuôn sang Ñu. Boh sĭt, knŏng hlei pô amâo gưt asăp Ñu, čŏng ngă mdê hŏng klei Aê Diê mtô kơh srăng ƀuh huĭ hyưt leh anăn rŭng răng. Kyua Aê Diê drei kkuh mpŭ jing Pô doh jăk amâo tŭ ư klei soh ôh ƀiădah ăt jing Pô bŏ hŏng klei khăp čang hmăng brei djăp klei jăk mơak kơ drei. Aê Diê čiăng đru phung ƀuôn sang Ñu thâo kơ klei jăk mơak êbeh dlai hlăm klei hdĭp leh anăn hlăm klei bi mguôp hŏng Ñu. Kyua anăn, hrô kơ huĭ kơ klei tăm pah, brei drei dlăng klei anei msĕ si klei mñă kơ drei thâo răng hĭn hlăm djăp klei čuăn kơ klei hdĭp tui hlue Khua Yang.
Drei thâo kral Aê Diê jing Pô bŏ hŏng klei khăp hlăm trăn Klei Aê Diê Blŭ anei mơ̆?
Wah lač: Ơ Khua Yang, jing Pô khăp brei nanao klei jăk mơak kơ phung ƀuôn sang Ih, ăt msĕ mơh klei tăm pah kơ phung amâo gưt asăp. Akâo kơ Khua Yang pap brei kơ klei kƀah kâo, thiăm ai ktang kơ kâo hdĭp nanao hlăm êlan Ih leh anăn klei Ih čiăng hlăm jih klei hdĭp kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Yap 17
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
