II Kevcai 28:20-29
Nqe cim:
“Yog nej ua kev phem kev qias thiab tso tus Tswv tseg, nws yuav tso kev puastsuaj, kev covnyom thiab kev ntxhov siab los rau txhua yam uas nej ua mus txog hnub uas nej raug puastsuaj tas.” (II Kevcai 28:20).
Lus nug rau sawvdaws xav:
– Cov lus foom tsis zoo no ntsig txog yam twg?
– Cov theem ntawm cov lus foom tsis zoo no li cas?
– Peb zeem paub txog qhov nqi zog ntawm tes haujlwm tsis ua raws li tus Tswv tej lus cog tseg zoo li cas?
Ntu Vajluskub no hais ntxiv txog cov neeg tsis ua raws li tus Tswv tej lus cog tseg hauv lub neej. Hais tau tias, ua qhov phem thiab tsis ua raws li tej lus cog tseg, tso Vajtswv tseg yog lub hauvpaus ua rau lawv raug tej lus foom tsis zoo. Ntawm no peb pom cov theem ntawm txojkev foom tsis zoo, nws tsis yog sau zog rau ib tug neeg twg lossis ib tsevneeg twg, tiamsis nthuav dav mus rau txhua tus, thoob plaws lub tebchaws. Ua lwm seem lus hais, tej lus foom tsis zoo no tsis yog tsuas ua cuam tshuam rau kev ua neej, kev noj haus, tsoos tsho hnav xwb, nws ua hiam kev noj qab nyob zoo thiab tibneeg txojsia. Qhov no qhia rau peb paub, thaum tus Tswv haivneeg tsis ua raws li Nws tej lus cog tseg ces Vajtswv yuav tsis tsomkwm lossis saib xyuas lawv zoo ib yam li leej txiv puag, tu menyuam lawm. Nws yuav tawmtsam lawv, tso tej kev mob los raug lawv li thaud tus Tswv coglus tsis pub los raug lawv. Tus Tswv haivneeg yuav tuag rau tej kev mob kev nkeeg, kev tshaib nqhis, raug cov yeebncuab tej tubrog ua saib tsis taus tom tshav rog, cev tuag puv nkaus tsis muaj leejtwg faus thiab ua khoom noj rau tsiaj txhu noj.
Thaum Vajtswv tso tseg txojkev pab ces peb yuav tsis muaj kev cia siab lossis kev dim li lawm. Ua lwm seem lus hais, tej lus cog tseg tsis pub rau cov neeg uas tawmtsam tej lus cog tseg, ua phem ua qias thiab tso tus Tswv tseg muaj kev cia siab. Ntau tus ntshai thaum pom tej kev quaj ntsuag los ntawm tej lus foom tsis zoo. Lossis kuj muaj qee tus neeg tsis totaub tias vim li cas Vajtswv yog tus zoo ua cas nws tso tej lus foom hnyav npaum ntawd rau Nws haivneeg. Tseeb tiag, tsuas yog cov neeg uas tso tus Tswv tej lus cog tseg, tsis ua raws li tus Tswv hais thiaj muaj kev txhawj ntshai xwb. Rau qhov tus Vajtswv uas peb pehawm yog tus uas dawbhuv, ntxub kev txhaum tiamsis Nws kuj yog tus uas muaj kev hlub, pub txhua yam koob hmoov zoo rau peb. Tus Tswv xav kom Nws cov menyuam tau txais tej koob hmoov npluamias hauv lub neej thiab nrog Nws sib raug zoo. Yog li, tsis yog ntshai tej lus foom, peb yuav tsum saib tej no ua kev kawm, ntuas yus tus kheej kom paub ua zoo rau tej uas peb ua hauv lub neej nrog tus Tswv.
Thov Vajtswv,
Tus Tswv, Koj yog tus muaj kev hlub, Koj niaj hnub foom koob hmoov rau Koj haivneeg, thiab Koj kuj yog tus uas tso tej lus foom tsis zoo rau cov neeg uas tsis ua li Koj tej lus cog tseg. Thov Koj pab, ntxiv dag zog rau nyuam yaus kom ua lub neej raws Koj txojkev thiab ua tau li Koj nyiam mus tas sim neej. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Dhau los ntawm ntu Vajluskub no peb puas zeem paub tias tus Tswv yog tus muaj kev hlub?
Nyeem Vajluskub hauv peb lub xyoo: Teev Npe 17
Kênh Youtube BHKTHN:
