II Thexalaunikes 1:11-12
Nqe cim:
“Twb yog li ntawd, peb thiaj niaj hnub thov Vajtswv pab kom nej ua tau nej lub neej phim qhov uas Vajtswv xaiv nej los ua nws haivneeg lawm.” (II Thexalaunikes 1:11a).
Lus nug rau sawvdaws xav:
– Timthawj Paulus thov Vajtswv li cas rau cov ntseeg Thexalaunikes kom lawv ua tau lub neej tsimnyog pub rau tus Tswv?
– Nqi zog ntawm cov neeg uas ua lub neej tsimnyog pub rau tus Tswv yog dabtsi?
– Peb tabtom ua lub neej tsimnyog pub rau tus Tswv zoo li cas?
Txawm yog raug tsimtxom, los cov neeg nyob hauv nroog Thexalaunikes txojkev ntseeg yeej loj hlob, ua rau Timthawj Paulus hajyam siv zog thov Vajtswv pab rau lawv. Paulus thov Vajtswv pab kom lawv yim hnub yim ua tau zoo li tus Tswv Yexus los ntawm tes haujlwm uas lawv ua qhia tawm lawv txojkev ntseeg hais tias tsimnyog qhov uas tus Tswv hu lawv los ua Nws cov menmyuam (nqe 11a). Rau qhov tus nqi uas tau los ua tus Tswv menyuam yog Tswv Yexus cov ntshav tsimtxiaj tau ntws saum tus ntoo khaublig, yog li cov ntseeg uas raug kev txomnyem yeej piv tsis tau tus Tswv txojkev tuag txhiv li. Qhov no txhawb kom cov ntseeg Thexalaunikes thiab peb cov ntseeg muaj kev rau siab ua lub neej tsimnyog pub rau tus Tswv.
Qhov uas cov ntseeg Thexalaunikes ua tau lub neej tsimnyog tsis yog lawv txojkev ntseeg ua haujlwm tawm xwb, tiamsis kuj yog timkhawv ntawm tus Tswv txojkev hlub thiab ua siab dawb siab zoo (nqe 11b). Vajtswv coj qhia tsheej kaujruam thiab ntxiv dag zog kom Nws cov menyuam tiv dhau txhua yam kev txomnyem los ntawm qhov uas lawv qhuas, hu nkauj thiab ua rau txhua tus neeg pom tus Tswv nyob hauv lawv kev ua neej. Dua li ntawd, cov neeg uas tso kev ntseeg thaum raug txomnyem, sim siab, qhia paub lawv tsis tau paub tias lawv yog Vajtswv cov menyuam. Lawv ua lub neej zoo li rov muab Tswv Yexus ntsia dua ib zaug saum ntoo khaublig, ua rau tus Tswv lub npe raug thuam (Henplais 6:4-6).
Nyob rau lub ntiajteb uas puv npho kev txomnyem thiab sim siab no, cov ntseeg Yexus muaj kev qaug zog, ua yuam kev thaum nrog tus Tswv mus thiab sawv tsis taus li. Ib hauv cov vimchiv uas ua rau lawv tas kev cia siab thiab tso tseg yog vim lawv tsis zeem paub tias lawv yog Vajtswv cov menyuam. Lawv tsis paub kev mus, nyob ib leeg, poob siab vim tsis paub Vajtswv tabtom coj qhia, ntxiv dag zog rau lawv. Cov neeg ntawd tabtom cheemtsum tej lus uas peb thov Vajtswv pab. Dhau los ntawm Timthawj Paulus tus qauv thov Vajtswv pab, xav kom peb txhua tus tsis yog thov Vajtswv rau yus xwb tiamsis kuj yuav tsum thov Vajtswv pab rau yus cov txheebze hauv tsevneeg ntseeg thiab. Tus Tswv xav kom peb thov Vajtswv pab rau lwm tus, thiab dhau los ntawm peb tej lus taij thov, Vajtswv yuav ntxiv zog, ntxiv kev ntseeg kom cov uas peb thov Vajtswv pab ua taus siab ntev nrog tus Tswv mus, thiab tshwjxeeb yog tagnrho peb ua tau lub neej tsimnyog pub rau Nws nyob hauv lub ntiajteb uas puv npho tej kev txhaum.
Thov Vajtswv,
Thov qhuas Vajtswv tus uas muaj kev hlub, nyuam yaus ua Koj tsaug vim Koj nyob nrog nraim coj qhia thiab pub dag zog rau nyuam yaus tiv dhau tej kev txomnyem, nyuaj siab. Thov Koj niaj hnub coj qhia nyuam yaus thiab tsevneeg kom ua tau lub neej tsimnyog pub rau tus Tswv. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb tau txhawb zog li cas kom ua tau lub neej tsimnyog pub rau tus Tswv hnub no?
Nyeem Vajluskub hauv peb lub xyoo: Teev Npe 7
Kênh Youtube BHKTHN:
