II Xwmtxheej Vajntxwv 25:10-13
Nqe cim:
“Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tsum tau sau raws li tej uas nyias tseb.” (Kalatias 6:7).
Lus nug rau sawvdaws xav:
– Vamkhom qhovtwg Vajntxwv Amaxiyas ntaus yeej cov tubrog Edoos txawm yog nws tubrog tsawg?
– Vim li cas txojkev zoo siab muaj yeej ntawm cov Yudas zoo tsis txaus?
– Peb tau dabtsi thaum tus Tswv zam lub txim uas peb ua yuam kev?
Tom qab uas txhij tubrog tas, Vajntxwv Amaxiyas txiav txim siab coj tubrog mus ntaus cov Edoos uas yog ib lub tebchaws nyob sab Qabteb ntawm lub tebchaws Yudas. Ua ntej ntawd, cov Yudas kav cov Edoos. Lub sijhawm uas Vajntxwv Yaulas txiv kav, cov Edoos sawv tawmtsam cov Yudas txojkev cai tswj thiab tsa ib tug vajntxwv kav lawv. Vajntxwv Yaulas thiaj mus ntaus cov Edoos, vim lub sijhawm ntawd Yaulas tso tus Tswv tseg nws thiaj swb rog (II Xwmtxheej Vajntxwv 21:8-10). Los txog Vajntxwv Amaxiyas tiam, nws mloog tus Tswv lus, nws ntiab cov tubrog Yixalayees tsis ntseeg tus Tswv uas raug ntiav mus (II Xwmtxheej Vajntxwv 25:6-9). Txawm yog khuvxim zog plaub tas nyiaj uas coj mus ntiav cov tubrog Yixalayees, los Vajntxwv Amaxiyas yeem mloog li tus Tswv qhia. Qhov uas nws mloog lus no, cov tubrog Yudas tau tus Tswv “pab lawv muaj yeej) txawm yog lawv cov tubrog tsis coob (nqe 11-12).
Txojkev zoo siab ntawm cov tubrog Yudas zoo tsis txaus, vim cov tubrog ntiav ntawm cov Yixalayees raug tso rov mus tsev ua npautaws vog. Lawv pom tau tias lawv raug ua saib tsis taus, raug thuam thiab tsis tau mus huab tej khoom thaum ntaus yeej rog. Yog li ntawd, lub sijhawm Vajntxwv Amaxiyas mus ntaus cov Edoos nyob yav Qabteb, lawv thiaj mus tua cov Yudas tej nroog txij ntawm Xamalis sab Qaumteb mus txog lub nroog Npethes Hauloos. Lawv tua peb txhiab tus neeg tuag nyob hauv cov nroog ntawd thiab txeeb tej khoom ntau heev. Vajntxwv Amaxiyas ua yuam kev loj heev thaum nws vamkhom cov tubrog Yixalayees uas yog cov neeg pemlom heev dua li uas vamkhom tus Tswv. Yog zoo mas vajntxwv yuav tsum thov tus Tswv qhia nws dhau los ntawm cov cev Vajtswv lus ua ntej uas yuav ntiav cov tubrog Yixalayees no. Txawm yog vajntxwv twb kho qhov uas nws ua yuam kev no los khiav tsis dhau qhov nqi zog, lub tebchaws yuav raug txomnyem vim ua yuam kev.
Tus Tswv Txojlus qhia: “Nej tsis txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tsum tau sau raws li tej uas nyias tseb.” (Kalatias 6:7). Nimno, thaum peb ua raws li peb lub siab nyiam ces yog ua tej uas tsis haum tus Tswv siab lawm, txawm yog yuav lees txim thiab tau tus Tswv zam txim, los peb yeej yuav raug ris qhov nqi zog uas yus ua ntawd, xws li poob nyiaj, tsis kaj siab lossis poob dag zog. Thov tus Tswv qhia rau peb paub qhov uas cov tubrog Yudas tsis muaj kev zoo siab txaus nkaus hnub thaud, kom xwv peb xyuam xim ua neej, txhua zaus uas peb yuav npaj ua ib yam dabtsi peb thov Vajtswv qhia thiab ua raws li Nws tej lus kom “Vajtswv yuav foom koob hmoov rau” peb (Yakaunpaus 1:25).
Thov Vajtswv,
Tus Tswv, nyuam yaus paub tias nyuam yaus ua tsis tau zoo, thov Koj qhia nyuam yaus kawm Koj tej lus thiab ua raws li Koj qhia. Nyuam yaus yuav xaiv ua li Koj qhia thaum ua tej haujlwm loj thiab me hauv lub neej. Nyuam yaus tuav Tswv Yexus lub npe thov, Amees.
Ib tsoom mloog uas hmov thiab tshua,
Peb puas niaj hnub thov tus Tswv pab rau tej haujlwm peb ua?
Nyeem Vajluskub hauv peb lub xyoo: Teev Npe 2
Kênh Youtube BHKTHN:
