2 Xwmtxheej Vajntxwv 24:17-21
Nqe cim:
“Kuv yeej cem thiab ntuas txhua tus uas kuv hlub, yog li ntawd nej yuav tsum muab siab rau ntseeg thiab tso plhuav nej tej kev txhaum tseg” (Tshwmsim 3:19).
Lus nug rau sawvdaws xav:
– Vajtswv ua dab tsi thaum uas vajntxwv Yau-as tso Vajtswv tseg lawm?
– Qhov ntawd qhia pom hais tias Vajtswv yog tus zoo li cas?
– Vajntxwv thiab tej nom tswv Yudas ua li cas thaum hnov tej lus ceebtoom?
– Thaum ua txhaum, peb yuav ua li cas kom tsis raug Vajtswv tso peb tseg?
Vajntxwv Yau-as tso Vajtswv tseg, nws coj cov Yudas mus pe mlom raws li cov nom tswv tej lus haub ntxias “tus Tswv chim heev rau cov Yudas thiab cov neeg uas nyob hauv lub nroog Yeluxalees”. Txawm li ntawd los Vajtswv hlub thiab ua siab ntev rau lawv, Nws pub lawv muaj sijhawm rov los lees txim rau Vajtswv los ntawm qhov uas Nws tso cov cev lus mus coj lawv rov los cuag Nws, tiamsis lawv tsis mloog cov cev Vajtswv lus hais li. Tus Tswv rov pub rau lawv muaj sijhawm zaum tim ob vim Vajtswv tsis xav kom txhua tus neeg uas yog Nws li ib tus twg raug kev ploj kev tuag, tiamsis Nws tsuas xav kom cov neeg ua phem tso lawv tej kev ua phem tseg xwb (Exekees 33:11; 2 Petus 3:9). Vim li ntawd, Vajtswv tus ntsujplig thiaj tshoov Xakhaliyas uas yog tus Povthawj uas yog Yehauyadas tus tub mus sawv tabmeeg cov pejxeem thiab hais rau lawv tias; tus Tswv uas yog Vajtswv nug hais tias, vim li cas nej tsis mloog nws tej lus samhwm? Ntawm no yog ib lolus nug tsis yuam teb tiamsis yog ua kom lawv paub nyuaj siab. Mauxes kuj tau nug Vajtswv haivneeg ib yam li ntawd thiab ceebtoom hais tias, yog lawv tsis mloog Vajtswv lus lawv lub neej yuav tsis vammeej (Teev Npe 14:41). Thiab thaum ntawd Xakhaliyas kuj ceebtoom hais tias lawv yuav tsis vammeej, vim lawv tso tus Tswv tseg lawm, thiab tus Tswv kuj tso lawv tseg. Tom qab uas hnov Xakhaliyas tej lus ceebtoom tas cov nom tswv txawm nrhiav tswvyim ua phem rau Xakhaliyas, vajntxwv txawm kom lawv muab pob zeb ntaus nws tuag kiag rau ntawm lub chaw uas nws tabtom sawv ceebtoom sawvdaws.
Ib zaug ntxiv, vajntxwv Yau-as rov ua txhaum Vajtswv tej lus samhwm vim tsis txais yuav Vajtswv tej lus ceebtoom thiab tsis hwm txoj cai dawbhuv hauv lub Tuamtsev, Yau-as thiaj muab Xakhaliyas tua kiag rau hauv tus Tswv lub Tuamtsev. Tsis thooj li tus Povthawj hlob Yehauyadas uas tsis tua Athaliyas rau hauv lub Tuamtsev tiamsis nws coj Athaliyas mus tua rau ntawm lub Roojvag kom ceev tau kev dawbhuv hauv lub Tuamtsev (2 Xwmtxheej Vajntxwv 23:14-15). Vajntxwv Yau-as yim hnub yim ua kev txhaum loj zuj zus, tsis kam lees txim thiaj plam Vajtswv kev zam txim lawm. Txhua zaus uas raug Vajtswv ceebtoom vajntxwv thiab tej nom tswv lub siab yimhuab tawv dua qub thiab yimhuab ua txhaum loj dua ntxiv, vim li ntawd Vajtswv thiaj tso lawv tseg (nqe 20).
Tsis muaj ib yam dab tsi uas txaus ntshai npaum li raug Vajtswv muab tso tseg lawm. Txhua tes haujlwm phem ntawm Yau-as ua yog lub vimchiv uas nws yuav raug txim hnyav heev tom qab Vajtswv tso nws tseg lawm. Ib yam li ntawd, niaj hnub nimno Vajtswv yuav siv cov uas muab siab ntseeg Nws los ntuas peb, lossis Vajtswv yuav ntuas peb thaum peb thov Vajtswv, thaum kawm Nws Txojlus thiab thaum ntsib teebmeem uas peb raug nyob hauv lub neej. Yog txais tau Vajtswv txoj kev ceebtoom, kev ntuas lawm, txawm yog Vajswv yuav siv txoj haukev twg ntuas los xij, txais yuav tsis txhob muaj lub siab tawv li vajntxwv Yau-as thiaj yuav tsis raug Vajtswv muab tso tseg.
Thov Vajtswv,
Vajtswv, tus uas muaj kev hlub thiab kev zam txim. Thov ceebtoom nyuam yaus thaum uas nyuam yuas ua tej yam ua tsis haum Koj siab, kom nyuam yaus txawj rov los lees txim rau Vajtswv, nyuam yaus tsis tso Vajtswv tseg thiab tsis raug Vajtswv tso nyuam yaus tseg. Nyuam yaus tuav Cawmseej Tswv Yexus lub npe thov, Amees.
Ib tsoom mloog uas hmov tshua,
Vajtswv tabtom ceebtoom peb yam dab tsi? Thiab peb ua li cas rau tej lus ceebtoom ntawd?
Nyeem Vajluskub hauv peb lub xyoos: Mathais 4
Kênh Youtube BHKTHN:
