Klei Aê Diê Blŭ: II Klei Yăl Dliê 24:17-21
Êlan kliăng:“Phung Kâo khăp, Kâo ƀuah leh anăn mkra mjuăt. Snăn brei ih jing hur har leh anăn kmhal bĕ.” (Klei Bi Êdah 3:19)
Klei êmuh ksiêm mĭn: Si Aê Diê ngă tơdah mtao Y-Jôas lui wir Ñu? Klei anăn brei ƀuh si Pô Ñu jing? Ya klei mtao leh anăn phung khua Yuđa wĭt ngă tơdah hmư̆ klei ƀuah? Tơdah ngă soh, ya klei brei drei ngă čiăng kơ đăm Aê Diê lui drei ôh?
Mtao Y-Jôas lui Aê Diê nao kkuh kơ rup yang, kyuadah hmư̆ klei mtrŭt mčhur mơ̆ng phung khua, kyuanăn “klei Yêhôwa ngêñ truh kơ phung Yuđa leh anăn phung ƀuôn Yêrusalem”. Ƀiădah lĕ, Aê Diê bŏ hŏng klei jăk leh anăn klei pap brei leh kơ diñu mmông găl, hŏng klei tiŏ nao phung khua pô hưn êlâo iêu mthưr brei diñu lŏ wĭt kơ Aê Diê, ƀiădah diñu hngah amâo čiăng hmư̆ ôh. Khua Yang lŏ brei mmông găl tal dua. Ñu jing Pô amâo čiăng kơ sa čô djiê luč ôh, hĭn êjai mơh hŏng phung jing dŏ Ñu, Khua Yang knŏng čiăng kơ phung ƀai lui hĕ êlan diñu pô (Y-Êsêkiêl 33:11; II Y-Pêtrôs 3:9). Kyuanăn, Mngăt Myang Aê Diê bi bŏ Y-Sakari, leh anăn ñu dôk ti anăp phung ƀuôn sang hŏng klei êmuh snei: si ngă diih gao klei bhiăn Yêhôwa mtă? Anei jing klei êmuh amâo djŏ brei wĭt lač ôh, ƀiădah brei diñu êmuh ai tiê kpă diñu pô. Y-Môis ăt tuôm êmuh phung ƀuôn sang Aê Diê msĕ snăn mơh, leh anăn hưn êlâo brei răng snei: klei amâo gưt asăp Aê Diê amâo srăng ba klei čăt đĭ ôh (Klei Yap 14:41). Mmông anei, Y-Sakari ăt lač msĕ mơh, diñu amâo dưi čăt đĭ ôh kyua lui wir Yêhôwa, kyua Ñu lui wir diñu msĕ mơh. Leh hmư̆ jih klei Y-Sakari hưn, phung khua trông čhai ngă jhat kơ gơ̆, leh anăn tui si klei mtao mtă, diñu bhĭr gơ̆ hŏng boh tâo hlăm wăl sang Yêhôwa êjai gơ̆ dôk blŭ ti anăp diñu.
Lŏ sa blư̆ dơ̆ng, mtao Y-Jôas gao klei bhiăn Aê Diê mtă tơdah ñu hngah amâo čiăng hmư̆ ôh klei Ñu hưn, amâo mpŭ ôh kơ klei doh jăk Sang Yang tơdah mtă brei bi mdjiê Y-Sakari hlăm wăl Sang Yêhôwa mtam. Mtao ngă bi mklăk hŏng klei khua ngă yang Y-Jêhôida hlăk êlâo, amâo brei ôh arăng mdjiê H’Athali hlăm Sang Yang, ƀiădah brei ba bi mdjiê ti ƀăng jang aseh, čiăng pioh klei doh jăk kơ Sang Yang (II Klei Yăl Dliê 23:14-15). Mtao Y-Jôas ksak toh hroh êdi yơh, ƀrư̆ hruê kdlŭt êlam hĭn hlăm klei ngă soh, hrô kơ klei thâo kmhal kơ klei soh, leh anăn ñu bi luč hĕ mmông găl mă tŭ klei Aê Diê pap brei. Grăp blư̆ mâo klei kčŭt ƀuah, phung khua lŏ khăng ai tiê hĭn, ngă soh kjham hĭn leh anăn klei anăn yơh ngă kơ Aê Diê lui wir diñu (êlan 20).
Amâo mâo ôh ya klei mkăn huĭ hyưt kjham hĭn hŏng klei Aê Diê lui wir. Jih jang bruă ngă jhat ƀai mtao Y-Jôas jing phŭn knhal kơ klei bi kmhal ktang ñu srăng tŭ tơdah Aê Diê lui wir ñu. Hruê anei, Khua Yang năng ai dôk yua phung huĭ mpŭ kơ Aê Diê čiăng mñă kơ drei. Khua Yang ăt mñă kơ drei êjai wah lač, êjai hriăm Klei Aê Diê Blŭ leh anăn hŏng klei găn truh mdê mdê kơ drei. Tơdah mă tŭ klei ƀuah mơ̆ng Khua Yang, wăt tơdah hŏng si hdră êlan dưn, đăm drei khăng ai tiê msĕ si mtao Y-Jôas ôh, huĭdah srăng tŭ klei Ñu “lui wir” drei.
Ya mta klei Khua Yang dôk ƀuah kơ drei? Si drei wĭt ngă?
Wah lač: Ơ Khua Yang, jing Pô bŏ hŏng klei khăp leh anăn klei pap. Tơdah kâo mâo ya klei amâo bi mơak kơ Khua Yang, akâo Ih ƀuah kâo. Akâo Ih brei kơ kâo ai tiê êdu êun leh anăn thâo kmhal, čiăng kơ kâo amâo “lui wir” Ih ôh, leh anăn amâo srăng tŭ klei Ih “lui wir” kâo. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mathiơ 4
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
