Klei Aê Diê Blŭ: II Kôrantô 4:16-18
Êlan kliăng: “Kyuadah klei knap mñai hdjul bhiâo anei mjing kơ hmei klei guh kơang prŏng hĭn hlŏng lar êgao kơ arăng dưi mkă.” (II Kôrantô 4:17)
Klei êmuh ksiêm mĭn: Ya ngă lu mnuih khăng êdu ai ti anăp klei knap mñai? Ya êlan čuăn ngă Khua ƀĭng kna Y-Pôl hưn mdah čiăng amâo êdu ai ôh ti anăp klei knap mñai? Si knhuah hdĭp brei drei mâo hĕ čiăng dưi găn klei lông dlăng hlăk mâo klei êdu ai?
Hlăm trăn Klei Aê Diê Blŭ anei, Khua ƀĭng kna Y-Pôl lač kơ klei knap mñai ñu pô leh anăn phung tui hlue Khua Yang. Hlăk tuôm hŏng klei knap mñai, klei ruă duam…, lu mnuih khăng bi mĭn, rŭng răng kơ lu mta klei ƀuh ti anăp ală mta, leh anăn lač kơ klei knap mñai pô dôk tuôm jing ktrŏ kjham đei, êgao kơ hnơ̆ng dưi tŭ, mơ̆ng klei anăn bi mjing klei êdu ai, luč klei čang hmăng. Mâo đa đa mnuih yap klei anăn jing klei hêñ kơ phung đăo kơ Krist tơdah arăng djik djak: “Ñu tui hlue Aê Diê ƀiădah tŭ hĕ klei msĕ snăn! ”
Si amâo êdu ai lĕ tơdah knŏng dlăng kơ klei knap mñai leh anăn kơ asei mlei dlưh rai? Khua ƀĭng kna Y-Pôl hưn mdah leh êlan čuăn ngă đăm êdu ai ôh, anăn jing brei hdơr bĕ snei, wăt tơdah mnuih ti êngao si jing dưn ƀiădah mnuih hlăm lam ăt dôk bi mlih mrâo nanao “lŏ bi mrâo grăp hruê”. Drei jing sa mnơ̆ng Aê Diê hrih mrâo (II Kôrantô 5:17), Aê Diê lŏ bi mrâo grăp hruê. Asei mlei anei jing sang jưh bhiâo srăng êdu awăt, dlưh rai, ƀiădah drei srăng mâo sang dôk nanao hlŏng lar hlăm adiê (II Kôrantô 5:1). Khua ƀĭng kna Y-Pôl bi mđĭ ai leh phung anak ƀuôn sang Aê Diê đăm êdu ai ôh tơdah ñu mtă mtăn snei, dlăng bĕ kơ ênuk êdei guh kơang ênoh yuôm hĭn klăk klai blư̆ mkă hŏng “klei knap mñai hdjul leh anăn bhiâo” ti anăp ală, msĕ si boh blŭ klei mmuñ Tĭng Adih Êyui Ƀơƀhĭl bi mđĭ ai êdi, “Yang hruê ăt mtrang nanao ti dlông knam mmăt. Boh blŭ amâo truh pia, Khua Yang hmư̆ leh”. Hdơr bĕ snei, wăt tơdah klei knap mñai ktang tĭt dưn ăt kăn năng rei bi mkă hŏng klei guh kơang prŏng prĭn kơ pô dưi hgao klei lông dlăng srăng dưn hlăm ênuk hlŏng lar! Leh anăn ăt brei hdơr mơh, “Kyuadah klei knap mñai hdjul bhiâo anei mjing kơ hmei klei guh kơang prŏng hĭn hlŏng lar êgao kơ arăng dưi mkă.” (êlan 17). Khua ƀĭng kna Y-Pêtrôs ăt mtô leh mơh leh tŭ klei knap mñai bhiâo, Khua Yang srăng bi kjăp drei leh anăn srăng mjing drei jăk klă (I Y-Pêtrôs 5:10). Čiăng dưi ƀuh “klei guh kơang prŏng prĭn hlŏng lar êgao kơ arăng dưi mkă” anăn, brei drei mâo ală klei đăo “dlăng kơ mnơ̆ng arăng amâo dưi ƀuh ôh” amâo djŏ hŏng ală kđeh “dlăng kơ mnơ̆ng arăng dưi ƀuh” (Y-Yôhan 20:29). Anăn jing phŭn knhal kơ drei amâo knŏng hdĭp hŏng klei đăo ƀiădah brei dưi hĭn hŏng klei knap mñai mơh, găn klei lông dlăng hlăm klei hdĭp hŏng klei đăo (I Y-Yôhan 5:4; Hêbrơ 11:33). Klei đăo amâo knŏng đru drei ƀuh ênoh yuôm kơ Hjiê ngăn yuôm Ƀuôn Jăk hmiêt mkăp bi mlih jih ngăn drăp hŏng klei tui hlue Khua Yang
(Y-Mathiơ 13:44-46) ƀiădah lŏ đru drei dưi ƀuh ênuk êdei guh kơang Khua Yang mưn kơ pô dưi găn klei lông dlăng hlăm klei hdĭp, amâo êdu ai ti anăp klei knap mñai, lông dlăng.
Ya klei drei srăng lač hŏng ai tiê drei pô tơdah thâo, leh găn klei knap mñai srăng jing klei guh kơang kơ pô dưi găn klei lông dlăng?
Wah lač: Ơ Ama Doh Jăk! Akâo Ih thiăm brei kơ kâo ai ktang leh anăn klei đăo čiăng kơ kâo dlăng kơ mnơ̆ng arăng amâo dưi ƀuh ôh, găn jih klei knap mñai hdjul leh anăn bhiâo ti lăn ala anei. Akâo Ih đru kâo đăo kjăp, čiăng ƀuh klei guh kơang prŏng prĭn êgao kơ arăng dưi mkă Khua Yang pioh kơ kâo hlăm ênuk hlŏng lar. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 35
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
