Loos 3:21-31
Nqe cim:
“Vajtswv suav hais tias txhua tus uas los ntseeg Yexus Khetos thiaj yog neeg ncaj ncees xwb. Rau qhov Vajtswv suav hais tias txhua tus uas ntseeg Yexus Khetos zoo ib yam nkaus ( Loos 3 :22)
Lus nug rau sawvdaws xav:
– Timthawj Paulus qhia tshwm txoj xov zoo twg?
– Nws kho tibneeg txojkev xav yuam kev li cas?
– Koj yuav tsum ua li cas thiaj tau lubneej txaus siab, muaj nqis thiab haum tus Tswv siab?
Tomqab uas Timthawj Paulus qhia tias tibneeg tsis muaj peevxwm ua tau tiav txojkev cai, nws mam qhia ib txojkev zoo siab uas Vajtswv npaj tseg pab kom neeg dim los ntawm kev ntseeg. Nov yog yam uas txojkev cai thiab cov cev lus hauv Vajluskub Qub twb ua timkhawv ua ntej, tsis yog yam uas Paulus xav tawm (nqe 21-22). Vim Vajtswv yog tus Dawbhuv, Nws yuav rau txim rau cov neeg txhaum. Tiamsis vim Vajtswv yog tus muaj kev hlub, Nws tsis xav cia tibneeg raug kev puastsuaj, Nws thiaj npaj tseg ib txojkev cawmdim. Tswv Yexus uas yog Vajtswv thiaj los yug ua neeg, sawv ntawm tibneeg txojkev txhaum thiab txaus siab tuag txhiv neeg txhaum saum ntoo khaublig. Tswv Yexus cov ntshav ntws los thiaj pauj tau yam uas txojkev cai xav yuav (nqe 23-25).
Tomqab uas Tswv Yexus tuag thiab sawv rov qab los, Vajtswv suav hais tias txhua tus uas ntseeg Nws yog neeg ncajncees, tsis xam hais tias yog neeg Yudais lossis lwm haiv neeg lawm (nqe 22). Dhau qhov no, Timthawj Paulus pab cov neeg nyob hauv nroog Loos thiab txhua tus ntseeg pom meej txog Vajtswv txojkev ncajncees thiab kev hlub, thiab kho tibneeg txojkev xav uas ib txwm yuamkev lawm .
Qhov xubthawj, Tswv Yexus txojkev hlub tsis yog muab pub rau cov Yudais xwb tiamsis pub rau txhua tus uas ntseeg. Vajtswv yog cov Yudais tus Tswv tiamsis kuj yog txhua haivneeg tus Vajtswv ib yam. Vim txhua tus puavleej tau tsim zoo ib yam li Vajtswv tus yamntxwv thiab tau Nws hlub tib yam. Tim ob, txhua tus puavleej cheemtsum tau Vajtswv txojkev cawmdim, “rau qhov txhua tus puavleej ua txhaum thiab tu ncua Vajtswv lub tshwjchim lawm”. Cov Yudais txaus siab vim lawv muaj txojkev cai los coj, lawv xav tias lawv zoo dua lwm haivneeg. Tseeb tiag, kev txhaum ua rau tibneeg puavleej yog neeg txhaum ib yam, txhua tus puavleej ncaim deb Vajtswv thiab tuag sab ntsujplig, txhua yam kev txhaum cheemtsum tau tus Tswv zam txim. Tim peb, yam tshwjxeeb tshaj uas yuav tsum muaj kom tau tus Tswv suav ncajncees yog “Kev Ntseeg”. Tau cawmdim los ntawm kev ntseeg thiaj tsis muaj leejtwg khav tau yus tes haujlwm, tiamsis tsuas tas siab ua Vajtswv tsaug xwb. Tim plaub, kev ntseeg ua kom kevcai ruaj khov vim Khetos txojkev tuag ua tiav qhov uas kev cai xav yuav, ntawd yog tus ua txhaum yuav raug txim.
Tus ntseeg tau txais kev cawmdim tsis yog los ntawm tes haujlwm vim tsis muaj leejtwg ua tiav txojkev cai. Peb tau cawmdim vim peb ntseeg, los ntawm Vaj Ntsujplig lub hwjchim peb thiaj ua tau lubneej haum Vajtswv siab, muaj lubneej kaj siab, muaj nqis pub rau Vajtswv.
Thov Vajtswv
Vajtswv Vaj Pebleeg, nyuam yaus ua Koj tsaug, vim Koj twb suav hais tias nyuam yaus yog neeg ncajncees, tsis muaj kev txhaum los ntawm Tswv Yexus txojkev cawmdim, pub nyuam yaus rov tau los nrog Vajtswv sib raug zoo li qub. Thov Vaj Ntsujplig pab kom nyuam yaus ua tau lubneej zoo li tus Tswv siab nyiam. Nyuam yaus tuav Tswv Yexus Khetos lub npe thov, Amees.
Peb puas kheev khav txog peb tes haujlwm zoo thiab?
Nyeem Vajluskub hauv peb lub xyoo: Chivkeeb 23
Kênh Youtube BHKTHN:
