Klei Aê Diê Blŭ: II Klei Yăl Dliê 24:4-7
Êlan kliăng: “Nao bĕ kơ jih jang ƀuôn hlăm čar Yuđa leh anăn rĭng mơ̆ng jih jang phung Israel prăk čiăng lŏ mkra sang Aê Diê diih grăp thŭn; leh anăn ngă bĕ bruă bi djăl” (II Klei Yăl Dliê 24:5b)
Klei êmuh ksiêm mĭn: Ya ngă Mtao Y-Jôas čuăn lŏ mkra Sang kkuh mpŭ kơ Aê Diê? Si ngă ai tiê Mtao hŏng Sang kkuh mpŭ kơ Aê Diê? Si ih bi êdah ai tiê ih hŏng Sang kkuh mpŭ kơ Aê Diê?
Leh đĭ jing mtao sui ƀiă, Mtao Y-Jôas čuăn lŏ mkra sang Yêhôwa. Ñu bi kƀĭn jih jang phung khua ngă yang leh anăn phung Lêwi, tiŏ nao digơ̆ kơ jih jang ƀuôn hlăm čar Yuđa, rĭng mơ̆ng jih jang phung Israel prăk čiăng lŏ mkra sang Aê Diê grăp thŭn. Mtao mñă anei jing Sang kkuh mpŭ kơ “Aê Diê diih”, jing Aê Diê Pô Mâo Jih Klei Myang, Pô khăp leh anăn răng kriê nanao phung ƀuôn sang Ñu, amâo djŏ rup krah hơăi mang msĕ si rup yang Baal phung tue êgar arăng mtrŭt leh phung ƀuôn sang Aê Diê kkuh mpŭ mphŭn dô ôh. Bruă lŏ mkra srăng ngă grăp thŭn amâo djŏ ngă knŏng sa blư̆ ôh. Hŏng Mtao Y-Jôas, anei jing bruă jêč, “ngă bĕ bruă bi djăl.”
Ƀiădah lĕ, phung Lêwi ngă klei bi kdung, Mtao iêo Khua ngă yang Y-Jêhôida leh anăn ƀuah gơ̆ si ngă amâo mtă kơ phung Lêwi nao rĭng jia mơ̆ng phung Yuđa leh anăn phung dôk hlăm ƀuôn Yêrusalem. Mtao Y-Jôas mblang kơ Y-Jêhôida thâo ya ngă brei rĭng prăk anei: Tal sa, tui si klei Y-Môis bi kčah snăn phung Israel bi kƀĭn ênuk mphŭn dô myơr prăk anei pioh kơ Sang Chiăm Klei Hưn, jing Sang Čhiăm anôk kkuh mpŭ kơ Aê Diê hlăm kdrăn tač. Tal dua, Sang Aê Diê tĭ rai leh kyua H’Athali, mtao mniê ƀai leh anăn phung tui hlue ñu ngă klei bi rai, tơl diñu tlĕ mă jih jang mnơ̆ng yua doh jăk ba yua hlăm sang kkuh mpŭ kơ yang Baal.
Mtao Y-Jôas mâo klei sĭt suôr hŏng Sang Aê Diê, arăng rông ba leh anăn ñu đĭ hriê kơ prŏng hlăm sa boh adŭ hlăm Sang Aê Diê (II Klei Yăl Dliê 22:12), ai tiê ñu amâo dưi tŭ ôh tơdah ƀuh arăng bi rai Sang kkuh mpŭ kơ Aê Diê. Mtao čiăng bi êdah klei hdơr knga kơ Aê Diê leh anăn ñu thâo klă ala čar amâo mâo klei jăk leh anăn klei êđăp ênang ôh tơdah lui tha Sang kkuh mpŭ kơ Aê Diê, klei anăn bi êdah ai tiê phung ƀuôn sang pioh kơ Aê Diê leh anăn klei bi mguôp Aê Diê hŏng digơ̆.
Ai tiê drei hŏng Khua Yang ăt bi êdah hlăm klei drei uêñ mĭn răng kriê leh anăn lŏ mkra Sang kkuh mpŭ kơ Aê Diê, kyuadah Sang kkuh mpŭ ngă hŏng kyâo, hŏng simăng sui thŭn srăng sô leh anăn rai. Klei yuôm hĭn jing ai tiê drei sĭt suôr hŏng Sang kkuh mpŭ kơ Aê Diê. Êngao ti bruă lŏ mkra Sang Aê Diê, brei drei uêñ mĭn mơh si srăng ngă čiăng kơ klei kkuh mpŭ leh anăn djăp mta klei hlăm klei hdĭp phung đăo ba klei guh kơang sĭt kơ Khua Yang. Anăn jing bruă klam kơ grăp čô drei amâo djŏ knŏng kơ sa čô pô hlei ôh. Akâo Khua Yang đru drei thâo uêñ mĭn lŏ mkra Sang Aê Diê msĕ si ai tiê Mtao Y-Jôas, amâo djŏ bi rai Sang Aê Diê msĕ si mtao mniê H’Athali ôh.
Si êlan drei đru bi mguôp lŏ mkra Sang kkuh mpŭ kơ Aê Diê?
Wah lač: Ơ Khua Yang, mtrang mngač brei kâo ƀuh leh anăn ngă tui si klei Ih čiăng hŏng ya mta mnơ̆ng čiăng lŏ mkra hlăm Sang kkuh mpŭ kơ Ih čiăng kơ Anăn Ih mâo klei guh kơang leh anăn phung đăo kơ Ih mâo klei hơ̆k mơak hlăm klei kkuh mpŭ kơ Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
