II-Kauleethaus 1:12-14
Nqe cim:
“Peb yeej khav tau hais tias peb lub siab qhia rau peb paub hais tias, peb ua peb lub neej hauv ntiajteb no peb ua ncaj ua ncees, thiab muaj nplooj siab dawb paug. Txawm yog thaum peb nrog nej nyob los nej puavleej pom li ntawd. Peb ua tau li ntawd, rau qhov Vajtswv pab peb tsis yog peb ua raws li peb lub tswvyim” (II Kauleethaus 1:12).
Lus nug rau sawvdaws xav:
- Yam dabtsi ua rau Timthawj Paulus khav tau?
- Yam uas Paulus hais ntawd muaj qab hau li cas rau cov ntseeg nyob hauv lub nroog Kauleethaus?
- Yuav ua licas peb thiaj muaj lub neej khav tau thiab ua tau rau lwm tus zoo siab?
Ib tsoom cov mloog txhua tus,
Txawm yog tsis mus nrog cov ntseeg nyob kiag hauv Pawg Ntseeg Kauleethaus qhia thiab daws sawvdaws tej teebmeem los cov ntseeg yeej pom Paulus lub meejmom uas ua Yexus Khetos ib tug timthawj. Tsis tas li ntawd xwb, hais txog Paulus kev ua zoo ces tsab ntawv uas nws sau xa mus no muaj nqis heev rau lawv, vim zoo ib yam li Paulus twb nrog lawv nyob lawm. Timthawj Paulus qhia paub hais tias nws yeej khav tau nws lub neej dawbhuv thiab ua ncaj ncees rau nws tej phoojywg thaum ua haujlwm ua ke (nqe 12), tej ntawd yog Timthawj Paulus tus yam ntxwv uas nws kawm tau ntawm Vajtswv los ua zoo rau txhua tus, tsis hais cov ntseeg nyob hauv nroog Kauleethaus huv tibsi.
Kev dawbhuv uas Paulus hais txog yog muaj nplooj siab dawb paug thiab ua ncaj ncees. Paulus tsis siv hwjchim los yuam leejtwg tiamsis nws ua txhua yam kom muaj nqis rau cov ntseeg hauv nroog Kauleethaus, nws thiaj tsis ntshai hais tawm qhov tseeb. Paulus kam hais tej uas cov ntseeg hauv Kauleethaus tau ua yuam kev, tej kev txhaum uas tseem muaj nyob hauv cov ntseeg Yexus lawm lub neej. Paulus qhia rau lawv paub hais tias, nws mus ncig xyuas lawv los ntawm txoj koob hmoov uas Vajtswv pub, sau ntawv qhia txog yam uas lawv twb zeem paub lawm, thiab nws xav kom lawv yuav tsum tau zeem paub tej kev ntseeg tseeb ntawd mus txog hnub kawg uas Yexus Khetos rov qab los. Timthawj Paulus lub neej yog timkhawv uas lawv muab los khav tau, thiab cov ntseeg ua neej dawbhuv yog yam ua rau Paulus muaj cuab kav khav.
Kev dawbhuv thiab kev ncaj ncees yog ob yam uas tibneeg ntiajteb tsis muaj, tshwjxeeb yog tiam vammeej haj yam tsis muaj. Tibneeg yoojyim poob rau kev ntshaw meejmom, ntshaw hwjchim thiab kev dag ntxias lawv ua tsis tau raws li Vajtswv tus yam ntxwv uas ua zoo. Muaj ntau zaug txojkev hais lus dag tseem tau qhuas hais tias yog txawj ntse, ua tau zoo; kev tsis dawbhuv tseem muab saib hlob, ua yam uas haum sawvdaws siab thiab vammeej los ntawm ua txhaum zais ntshis tsis … Yog ib tug ntseeg Yexus, thov kom peb tsis txhob ua neej raws li neeg ntiajteb txojkev xav thiab kev ua neej, tiamsis cia peb ua neej raws li Vajtswv Txojlus qhia, niaj hnub zeem paub kom ua lub neej dawbhuv thiab ncaj ncees kom txhua tus thiaj yuav khav tau txog lub neej zoo mus txog hnub uas Yexus Khetos rov qab los.
Thov Vajtswv,
Vajtswv tus uas dawbhuv! Thov Koj pab nyuam yaus niaj hnub muaj txojkev sib raug zoo nrog Koj, kom nyuam yaus muaj txaus peevxwm qhia tawm lub neej dawbhuv thiab kev ncaj ncees los ntawm tej lus hais nrog rau tes haujlwm nyuam yaus ua. Amees.
Ib tsoom cov mloog uas hmov thiab tshua,
Peb lub neej puas khav tau txog yam zoo rau Pawg Ntseeg, rau tsevneeg thiab tej phoojywg?
Nyeem Vajluskub hauv peb lub xyoo: Exethaws 3:1-4:17
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
