Mathais 26:36-46
Nqe cim:
“Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua raws li koj lub siab nyiam xwb!” (Mathais 26:39b)
Lus nug xav:
– Hauv lub vaj Khexemanes, Tswv Yexus thov Leej Txiv yam dabtsi?
– Tus Tswv lub siab thaum ntawd zoo li cas?
– Peb kawm tau dabtsi hais txog tus Tswv txojkev hlub peb?
Tswv Yexus nrog cov thwjtim mus txog qhov chaw hu ua Khexemanes, lus Henplais muaj lub ntsiab tias lub rooj tsuam txiv ntoo roj. Qhov chaw no yog lub vaj uas muaj ntau tsob txiv ntoo roj, cov txiv ntoo roj muab ua kom tawg thiab tsuam kom los cov roj muaj nqis. Tswv Yexus mus hauv lub vaj Khexemanes thov Vajtswv. Timthawj Mathais qhia paub Tswv Yexus lub siab thaum ntawd,“Yexus nyuaj siab thiab ntxhov siab kawg li” (nqe 37), tus Tswv hais rau cov thwjtim hais tias, “Kuv nyuaj siab thiab ntxhov siab kawg li, twb yuav tuag” (nqe 38). Tus Tswv txojkev nyuaj siab thiab ntxhov siab yog tabtom yuav raug ntsia saum ntoo khaublig mob sab nqaij tawv, ris tibneeg ntiajteb tej kev txhaum, thiab Leej Txiv muab Nws tso tseg mob sab ntsujplig. Tswv Yexus coj Petus, Yauhas thiab Yakaunpaus nrog Nws mus hauv lub vaj. Ces tus Tswv mus tom ntej mentsis thov Vajtswv: “Kuv Txiv, yog koj pom zoo, thov koj tshem lub khob no ntawm kuv mus! Txawm yog li cas los thov koj tsis txhob ua raws li kuv lub siab nyiam, tiamsis cia ua raws li koj lub siab nyiam xwb!” (nqe 39).
Tswv Yexus cov lus thov Vajtswv qhia paub thaum Nws txaus siab los hauv ntiajteb yog Nws twb npaj txhij taug txojkev ntoo khaublig lawm (Mathais 1:21). Txawm yog paub txog qhov uas txaus ntshai ntawm tus ntoo khaublig txog sab nqaij tawv thiab sab ntsujplig, los tus Tswv yeej ua raws li Leej Txiv lub siab nyiam. Zaum tim ob thiab zaum tim peb, Nws yeej qhia tshwm qhov uas ua raws li Leej Txiv siab nyiam kom ua tiav txojkev cawm dim: “Yexus rov mus thov Vajtswv dua zaum ob hais tias, “Kuv Txiv, yog koj tsis pom zoo muab lub khob no tshem ntawm kuv mus, yuav cia kuv haus xwb, ces cia ua raws li koj lub siab nyiam” (nqe 42). Kiag lub sijhawm thaum Tswv Yexus thov Vajtswv tas, cov neeg uas nrhiav ntes Nws tuaj txog.
Thaum kawm ntu Vajluskub no, peb yuav tau zeem paub hais tias peb yuav totaub tsis tas thiab kuj piav tsis tau tas tus Tswv txojkev nyuaj siab thaum Nws tiv hauv lub vaj Khexemanes. Peb cheemtsum paub tias Tswv Yexus twb txaus siab tiv tej yam uas nyuaj thiab mob kawg nkaus kom cawm tau neeg ntiajteb. Peb yuav tsum nco Nws txiaj ntsig vim Nws twb ua raws li Leej Txiv siab nyiam, taug txojkev ntoo khaublig tiav kom tibneeg tau txojkev cawm dim. Peb zeem paub tus Tswv twb tiv txomnyem vim peb zoo li cas hauv lub vaj Khexemanes, Lukas 22:44 hais tias: “Yexus nyuaj siab kawg nkaus, nws hajyam siv zog thov Vajtswv heev; nws tawm hws zoo li ntshav nrog rau hauv av”. Thaum zeem paub tus Tswv txojkev hlub uas pub rau peb loj kawg nkaus li no, peb yuav tau siv zog ua neej fij tus kheej rau Nws.
Thov Vajtswv,
Vajtswv tus muaj kev hlub, ua Koj tsaug qhov uas Koj los tuag txhiv nyuam yaus. Thov Koj pab kom nyuam yaus paub hlub Koj thiab ua neej tsimnyog Koj txojkev hlub dhau los ntawm qhov ua Koj tes haujlwm thiab ua timkhawv qhia Koj zaj rau ntau leej. Nyuam yaus tuav Tswv Yexus Khetos lub npe thov, Amees.
Peb zeem paub li cas txog tus Tswv txojkev hlub uas pub rau peb thaum Nws txaus siab taug txojkev ntoo khaublig?
Nyeem Vajluskub hauv peb lub xyoo: Yauj 40
Kênh Youtube BHKTHN:
