Klei Aê Diê Blŭ: II Kôrantô 1:12-14
Êlan kliăng: “Hmei bi mni kơ hmei pô kyua klei anei: ai tiê kpă hmei hưn kơ klei hmei dôk dơ̆ng ƀơ̆ng huă hlăm lăn ala, leh anăn lu hĭn ti anăp diih, hŏng klei kpă ênuah leh anăn klei sĭt suôr Aê Diê brei, amâo djŏ hŏng klei thâo mĭn kđeh ôh, ƀiădah hŏng klei Aê Diê pap” (II Kôrantô 1:12).
Klei êmuh ksiêm mĭn: Ya klei ngă kơ Khua ƀĭng kna Y‑Pôl ktưn hưn? Ya klei yuôm bhăn mơ̆ng klei Y‑Pôl bi mklă hŏng phung đăo ti Kôrantô? Si ngă čiăng kơ knuih hdĭp drei jing klei dưi bi mni leh anăn klei hdơ̆ng bi mơak kơ phung drei?
Wăt tơdah amâo nao bi tuôm hŏng phung đaŏ ti Sang Aê Diê Kôrantô čiăng đru kơ diñu ƀuh leh anăn msir mgaih dŭm bruă adôk mâo hlăm Sang Aê Diê ôh, ƀiădah phung đăo tinei thâo klă hŏng kơhưm mơ̆ng sa čô khua ƀĭng kna Khua Yang Yêsu Krist, mbĭt hŏng knuih mơ̆ng Khua ƀĭng kna Y‑Pôl, snăn pŏk hră ñu mơĭt kơ digơ̆ jing yuôm msĕ si ñu mâo ƀô̆ mta tinăn mơh. Khua ƀĭng kna Y‑Pôl brei thâo ñu klă sĭt ktưn hưn kơ klei hdĭp ñu pô doh jăk leh anăn kpă ênô ăt msĕ si hŏng phung ƀĭng kna mbĭt hŏng ñu (êlan 12), anei jing knuih Khua ƀĭng kna Y‑Pôl mâo mơ̆ng klei bi mguôp sĭt suôr hŏng Aê Diê čiăng blŭ tlao hŏng grăp čô mnuih, hlăm anăn mâo phung đăo ti Sang Aê Diê Kôrantô.
Klei doh jăk ñu lač jing klei doh êngeh leh anăn jăk. Ñu amâo yua ôh kơhưm pô čiăng kpĭ mgô̆ ƀiădah kyua klei tŭ kơ klei hdĭp phung đăo ti Sang Aê Diê Kôrantô anăn ñu amâo huĭ ôh lač kơ boh sĭt: anăn jing klei kƀah, klei soh ăt adôk mâo hlăm knuih hdĭp phung đăo tinei. Ñu brei digơ̆ thâo ñu nao kơ digơ̆ hŏng klei pap Aê Diê brei, čih kơ digơ̆ ya klei digơ̆ thâo kral leh, leh anăn ai tiê ñu čang hmăng digơ̆ srăng lŏ dơ̆ng thâo kral klei kpă ênuah anei truh knhal tuč, čiăng sĭt truh hruê Khua Yang Yêsu lŏ hriê, Khua ƀĭng kna Y‑Pôl srăng mâo klei dưi bi mni, leh anăn hŏng klei hdĭp doh jăk diñu ăt jing ngă kơ ñu năng hưn.
Klei doh êngeh leh anăn kpă ênuah jing dua mta hin snăk hlăm ala ƀuôn ară anei, boh nik hlăm ala ƀuôn mrâo mrang, anak mnuih ênưih lĕ hlăm klei mplư kơ hing ang, klei tŭ dưn tơl wơr bĭt hĕ hnơ̆ng čuăn knuih hdĭp Aê Diê kčah. Lu blư̆ klei mplư dưi bi mni jing klei thâo mĭn, mbruă; klei amâo doh jăk dưi dlăng jing djŏ ênuk, đĭ kyar; klei soh dưi mdăp ti gŭ klei dưi êngiê mơ̆ng sa čô mnuih… Jing phung đăo kơ Krist, čang hmăng phung drei amâo hmăi djŏ mơ̆ng knuih hdĭp ti lăn ala ƀiădah hdĭp tui si Klei Aê Diê Blŭ mtă, thâo kral nanao leh anăn tui duah knuih hdĭp doh jăk leh anăn kpă ênuah čiăng grăp čô drei jing klei dưi bi mni leh anăn bi hơ̆k mơak hdơ̆ng drei hlăm hruê Khua Yang Yêsu Krist lŏ hriê.
Knuih hdĭp drei jing leh klei năng bi mni kơ Sang Aê Diê, gŏ sang leh anăn kơ ƀĭng găp mơ̆?
Wah lač: Ơ Aê Diê Pô Doh Jăk! Akâo kơ Ih đru kâo răng kriê klei bi mguôp hŏng Aê Diê čiăng kâo mâo djăp klei dưi bi êdah knuih hdĭp doh jăk leh anăn bi êdah klei kpă ênuah hlăm klei blŭ ăt msĕ mơh bruă kâo mă.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: H’Êsther 3:1-4:17
Kênh Youtube BHKTHN:
