Klei Aê Diê Blŭ: Y‑Mathiơ 12:18-21
Êlan kliăng: “Ñu amâo srăng bi tloh ôh mbô joh leh, kăn bluh hĕ rei pui kđen dơ̆ng djiê…”(Y‑Mathiơ 12:20a)
Klei êmuh ksiêm mĭn: Khua ƀĭng kna Y‑Mathiơ hrŏng yua hdruôm hră Khua pô hưn êlâo Y‑Êsai čiăng yăl dliê wĭt kơ ya mta klei kơ knhuah Khua Yang Yêsu dôk dơ̆ng ƀơ̆ng huă hŏng phung riêng gah? Ya boh tŭ dưn mâo mơ̆ng klei Khua Yang Yêsu dôk dơ̆ng ƀơ̆ng huă anăn? Drei tui knuih Yang Yêsu si drei srăng dôk dơ̆ng ƀơ̆ng huă hŏng phung riêng gah?
Khua ƀĭng kna Y‑Mathiơ amâo blŭ knŏng kơ klei bi mguôp Yêsu hŏng Aê Diê Ama, Yang Mngăt jăk leh anăn bruă hưn Klei Mrâo Mrang Jăk (êlan 18) ôh, ƀiădah ñu čiăng kơ phung dlăng hră ñu thâo msĕ mơh klei Khua Yang dôk dơ̆ng ƀơ̆ng huă leh anăn klei Ñu lŏ kdơ̆ng wĭt hŏng klei truh jŭm dar. Khua Yang amâo bi tăng mgăl, amâo mâo bi mneh msao, Ñu amâo bi tăng ktang đŏk ôh leh anăn thâo ktư̆ hdưi. Khua Yang Yêsu amâo ur kraih ti êlan dơ̆ng čiăng kơ arăng mđing kơ Ñu ôh, Ñu kăn khăp kơ klei bi tăng hơăi mang rei; kyuanăn “kăn arăng srăng hmư̆ asăp Ñu ti êlan rei” (êlan 19).
Msĕ mơh, Y‑Mathiơ yăl dliê wĭt kơ klei Khua Yang Yêsu dôk dơ̆ng hŏng phung riêng gah Ñu tơdah yua rup “mbô joh leh”, “pui kđen dơ̆ng djiê” (êlan 20). Hlăm ênuk Yang Yêsu, mbô răng yua hlăm lu bruă, ƀiădah bi mbô joh leh amâodah rai leh arăng amâo yua ôh. Msĕ mơh, tơdah pui kđen dơ̆ng djiê arăng srăng bluh hĕ pui kđen čiăng pioh mrai pui. Rup “mbô joh leh”, “puih kđen dơ̆ng djiê” bi hmô klei hdĭp tuôm hŏng klei arăng bi êka, dlăng hơăi mang leh anăn amâo mâo klei tŭ dưn ôh. Leh anăn Khua Yang Yêsu uêñ kơ klei hdĭp msĕ snăn čiăng lŏ bi krŭ digơ̆, đru digơ̆ thâo kơ ênoh yuôm digơ̆ pô. Boh yuôm hĭn, Ñu bi hlao ai tiê mčah digơ̆ čiăng lŏ bi krŭ digơ̆ ti anăp Aê Diê. Wăt tơdah arăng bi kdơ̆ng, arăng hngah, arăng mčeh luar dưn ƀiădah Khua Yang Yêsu ăt bi êdah klei dôk dơ̆ng ƀơ̆ng huă hŏng klei kpă ênô, leh anăn ti knhal tuč Ñu dưi leh ti Kyâo Bi Kal čiăng kơ ară anei hin jih jang mnuih, amâo bi kah ana mbha djuê ôh srăng mâo klei yap kpă tơdah đăo kơ Ñu, leh anăn êdei anăp digơ̆ srăng dôk hŏng Ñu hlŏng lar.
Drei jing “mbô joh leh”, “pui kđen dơ̆ng djiê” Khua Yang Yêsu lŏ bi krŭ leh anăn brei kơ drei klei dưi jing anak Aê Diê yuôm bhăn êdimima. Brei drei hdơr nanao kơ klei anei čiăng drei thâo hdơr knga leh anăn bi mơak kơ Ñu. Brei drei tui knuih Khua Yang hlăm klei dôk dơ̆ng ƀơ̆ng huă, klei dôk dơ̆ng hŏng phung riêng gah, čiăng hŏng klei anăn drei dưi ba Klei Mrâo Mrang Jăk klei bi mtlaih kơ digơ̆. Jŭm gah găn drei mâo lu mnuih klei hdĭp digơ̆ ƀhĭ hlăm klei soh, klei bi mguôp hlăm gŏ sang mčah rai, digơ̆ amâo thâo săng ôh ênoh yuôm klei hdĭp digơ̆ pô…lu klei mkăn đa đa…, digơ̆ čiăng hmư̆ Klei Mrâo Mrang Jăk Yêsu Krist čiăng lŏ bi mrâo mngăt ai tiê digơ̆, leh anăn brei digơ̆ thâo kral kơ klei digơ̆ jing yuôm bhăn ti anăp Aê Diê.
Kơ hlei pô drei hdơr čiăng hưn klei đăo, hdơr kơ hlei pô luč leh čang hmăng čiăng đru digơ̆ lŏ mâo klei čang hmăng leh anăn jing yuôm hlăm Khua Yang Yêsu?
Wal lač: Ơ Khua Yang, bi mni kơ Ih kyuadah kâo amâo năng ôh ƀiădah Ih bi tui kâo leh, đru kâo thâo uêñ leh anăn đru phung riêng gah kâo čiăng kơ digơ̆ mâo klei bi mtlaih leh anăn dưi lŏ bi krŭ hlăm anăn Yêsu Krist.
Dlăng klei Aê Diê Blũ hlăm tlâo thŭn: Y‑Êskiêl 13:1–14:11
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
