Klei Aê Diê Blŭ: Bruă Phung Khua Ƀĭng Kna 8:26-40
Êlan kliăng: “Snăn klei đăo kbiă hriê mơ̆ng klei arăng hmư̆, leh anăn klei arăng hmư̆ kbiă hriê mơ̆ng klei mtô klei Krist.” (Rôm 10:17).
Klei êmuh ksiêm mĭn: Si ngă Y‑Philip kbiă mơ̆ng Samari nao kơ êlan hlăm kdrăn tač? Yang Mngăt Jăk ktrâo atăt ñu bi tuôm hŏng hlei leh anăn ya bruă ngă? Si boh tŭ mâo? Mơ̆ng ya klei ñu dưi mâo boh tŭ msĕ snăn? Hruê anei ya bruă brei drei ngă čiăng kơ bruă hiu hưn Klei Mrâo Mrang Jăk dưi mâo boh tŭ?
Hlăk Phung Sang Aê Diê mâo klei đĭ kyar leh hruê knăm Pantơkôt, mâo sa klei ngă jhat prŏng truh kơ ƀuôn Yêrusalem, phung đăo đuĕ bru bra mdê mdê djăp anôk, ti anôk diñu truh, diñu hưn kơ anăn Khua Yang sơăi. Y‑Philip trŭn ti sa boh ƀuôn hlămčar Samari leh anăn hưn klei Khua Yang kơ diñu mâo boh tŭ snăk (Bruă Phung Khua Ƀĭng Kna 8:4-13). Hlăk anăn sa čô dĭng buăl jăk lač kơ ñu brei trŭn nao kơ ƀuôn Gasa, jing sa êlan hlăm kdrăn tač, kbưi mơ̆ng ƀuôn Yêrusalem hlăm brô 80 kilômet. Y‑Philip gưt asăp nao mtam leh anăn tuôm hŏng phung dôk wĭt kơ čar diñu mơ̆ng klei kkuh mpŭ ti ƀuôn Yêrusalem mbĭt hŏng dĭng ktang kriâo Êthiôpi. Yang Mngăt Jăk lač kơ Y‑Philip nao bi hmao êdeh aseh anăn, ñu gưt êran tui tiŏ, hlăk anăn dĭng ktang kriâo dôk dlăng hdruôm hră khua pô hưn êlâo Y‑Êsai čih, anôk lač kơ sa čô dĭng buăl Aê Diê tŭ klei arăng phat kđi amâo năng leh anăn bi mdjiê (Y‑Êsai 53:7-8). Hŏng mmông găl anăn, Y‑Philip blŭ hrăm hŏng dĭng ktang leh anăn mblang Klei Aê Diê Blŭ kơ Klei Mrâo Mrang Jăk klei bi mtlaih hlăm Khua Yang Yêsu. Dĭng ktang anăn tŭ jum Khua Yang Yêsu jing Pô bi mtlaih ñu leh anăn hưn bi êdah klei đăo hŏng klei akâo tŭ klei ƀaptem hlăk găn anôk mâo êa. Mâo kbiă mơ̆ng êa, Yang Mngăt Jăk Khua Yang mă mđuĕ hĕ Y‑Philip truh ti ƀuôn Asôt kbưi mơ̆ng anôk anăn hlăm brô 30 kilômet, ñu lŏ nao hưn mtô Klei Mrâo Mrang Jăk hlăm jih ƀuôn ñu găn truh kơ ƀuôn Sêsarê kdrŭn jưh êa ksĭ, bi dĭng ktang kriâo hơ̆k mơak lŏ nao wĭt kơ čar Êthiôpi, ênhă lăn Phi Châu.
Y‑Philip mâo klei dưi leh hlăm bruă hưn Anăn Khua Yang kơ dĭng ktang kriâo Êthiôpi. Êlâo hĭn, kyuadah ñu mâo ai tiê gưt asăp kơ Khua Yang kluôm dhuôm, khă êjai ñu dôk mâo klei dưi dưn, ƀiădah tơdah Khua Yang iêô tiŏ nao ñu, ñu ăt nao mtam. Tal dua, bruă hưn klei đăo mơ̆ng Yang Mngăt Jăk yơh jing Pô brei klei myang kơ pô hưn bi sĭt (Bruă Phung Khua Ƀĭng Kna 1:8), Ñu ăt ktrâo atăt kơ Y‑Philip čêč drêč hlăm bruă hưn klei đăo,
Y‑Philip đup gưt kluôm dhuôm kơ Yang Mngăt Jăk. Tal tlâo, klei myang mơ̆ng Klei Aê Diê Blŭ jing mnơ̆ng yua phŭn hưn bi êdah klei sĭt nik leh anăn mă bruă hlăm phung hmư̆, tơl phung hmư̆ mâo ai tiê êdu êun čiăng tui duah klei sĭt nik. Leh anăn mta yuôm kơ akŏ phŭn hlăm bruă hưn klei đăo jing klei bi mtlaih hlăm Khua Yang Yêsu Pô bi mtlaih lăn ala.
Hruê anei, adôk lu mnuih êpa mhao kơ Khua Yang. Yang Mngăt Jăk ba hriê nanao kơ drei lu mmông găl, mta yuôm jing brei drei gưt hlue ngă klei Khua Yang ktrâo atăt čiăng hiu hưn Anăn Ñu, snăn klei myang Yang Mngăt Jăk leh anăn Klei Blŭ Khua Yang srăng mă bruă hlăm phung hmư̆ čiăng kơ diñu tŭ jum Khua Yang dưi mâo klei bi mtlaih. Akâo kơ Khua Yang brei drei jhŏng hiu hưn Anăn Khua Yang kơ phung ƀuôn sang drei.
Si drei gưt asăp Yang Mngăt Jăk hlăm bruă hiu hưn Anăn Khua Yang?
Wah lač: Ơ Khua Yang, akâo kơ Ih brei kâo đup gưt kơ Yang Mngăt Jăk. Akâo Ih brei kơ kâo ai tiê thâo gưt asăp kơ Khua Yang kluôm dhuôm leh anăn jhŏng hiu hưn Anăn Khua Yang čiăng kơ lu mnuih dưi mă tŭ klei bi mtlaih Khua Yang brei.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 8
Kênh Youtube BHKTHN:
