Klei Aê Diê Blŭ: Klei Yap 12:10-15
Êlan kliăng: “Ƀiădah Kâo lač kơ diih, khăp bĕ kơ phung roh diih, leh anăn wah lač brei kơ phung ngă jhat kơ diih,” (Y-Mathiơ 5:44)
Klei êmuh ksiêm mĭn: Ya ngă H’Miriam djŏ phŭng? Mơ̆ng ya klei Khua Yang bi hlao ñu? Si klei Khua Yang Yêsu bi hriăm drei wah lač brei kơ phung roh, phung ngă jhat kơ drei?
Hlăm jih thŭn mlan Y-Môis gĭt gai phung ƀuôn sang Israel nao hlăm kdrăn tač, lu blư̆ snăk ñu tlă anăp hŏng klei blŭ dŭñ dŭñ, klei bi kdơ̆ng mơ̆ng lu mnuih, ƀiădah ñu ăt dôk sĭt suôr gưt asăp Khua Yang atăt gai phung ƀuôn sang Aê Diê leh anăn wah lač brei kơ diñu hŏng jih ai tiê (Klei Kbiă 32:11-14).
Tinei, Y-Môis tŭ klei ayŏng amai ñu pô blŭ êkŭt leh anăn bi kdơ̆ng kyua čiăng mmiă anôk bruă jing khua gĭt gai, Khua Yang amâo brei ôh kơ diñu. Khua Yang iêô jih diñu tlâo nao ti anăp Ñu hlăm knam ti Sang Čhiăm čiăng mblang brei kơ diñu thâo săng ya ngă Khua Yang mgơ̆ng Y-Môis jing khua gĭt gai. Khua Yang ăl kơ H’Miriam leh anăn kơ Y-Arôn (Klei Yap 12:1-9). Leh mmông Khua Yang đuĕ mtam yơh, H’Miriam djŏ phŭng, H’Miriam “kô̆ msĕ si pliêr”. Y-Arôn thâo mtam kyua klei soh diñu dua snăn ñu kmhal mtam leh anăn akâo kơ Y-Môis pap brei čiăng akâo kơ Khua Yang pap brei kơ klei soh diñu. Wăt tơdah tŭ klei ayŏng amai pô blŭ êkŭt leh anăn bi kdơ̆ng dưn, ƀiădah Y-Môis ăt ur kwưh kơ Khua Yang pap brei leh anăn bi hlao brei kơ amai ñu. Aê Diê hmư̆ wĭt lač leh klei Y-Môis kwưh akâo leh anăn Ñu bi hlao brei kơ H’Miriam leh jih kjuh hruê krư̆ H’Miriam ti êngao wăl.
Klei siam hlăm trăn Klei Aê Diê Blŭ anei jing ai tiê Y-Môis wah lač brei. Ñu kăp tui duah Khua Yang brei kơ mnuih mkăn nanao, leh anăn Khua Yang lŏ wĭt lač hŏng klei pap Ñu. Tui si knuih jing anak mnuih čuôt klih, drei êlưih snăk hngah wah lač brei kơ phung bi kdơ̆ng hŏng pô. Hlăm boh klei truh kơ Y-Môis, wăt tơdah tŭ klei ayŏng amai ñu pô bi kdơ̆ng dưn, ñu ăt hŏng jih ai tiê ur kwưh kơ Khua Yang bi hlao brei kơ amai ñu. “Y-Môis ur kơ Yêhôwa, “Ơ Aê Diê, kâo kwưh kơ Ih, bi hlao brei gơ̆.”” (êlan 13).
Y-Môis brei leh klei bi hmô hŏng jih ai tiê wah lač akâo kơ Khua Yang bi hlao brei kơ amai ñu bi kdơ̆ng leh hŏng ñu. Klei ñu ur kwưh Khua Yang hmư̆ wĭt lač amâo djŏ knŏng hlăm asei mlei kđeh ôh ƀiădah wăt hlăm mngăt ai tiê H’Miriam mơh, kyua djŏ phŭng snăn ñu nao dôk hjăn păn bi ktlah hŏng phung ƀuôn sang. Khua Yang Yêsu mtô leh drei: “Ƀiădah Kâo lač kơ diih, khăp bĕ kơ phung roh diih, leh anăn wah lač brei kơ phung ngă jhat kơ diih, čiăng kơ diih dưi jing phung anak Ama diih hlăm adiê; kyuadah Ñu brei yang hruê ƀlĕ kơ phung ƀai wăt kơ phung jăk, leh anăn Ñu brei adiê hjan kơ phung kpă wăt kơ phung wê.” (Y-Mathiơ 5:44-45). Sĭt yơh amâo êlưih ôh ngă klei anei, ƀiădah kyua jing anak Ama hlăm adiê, Pô brei klei pap kơ jih jang mnuih, brei drei gưt asăp Khua Yang, thâo mđing uêñ kơ phung ruă duam wah lač brei kơ diñu, wăt tơdah diñu jing phung ngă jhat leh anăn bi kdơ̆ng hŏng drei dưn, kyua drei đăo sĭt Khua Yang pô yơh srăng dŏng mgang drei.
Si ngă drei kăp wah lač brei kơ phung ngă jhat leh anăn bi kdơ̆ng hŏng drei mơ̆?
Wah lač: Ơ Khua Yang, tlă anăp hŏng phung ngă jhat leh anăn bi kdơ̆ng hŏng kâo, akâo kơ Khua Yang brei kâo jao jih djăp mta klei kơ Ih. Akâo Khua Yang đru dŏng kâo leh anăn brei kâo hŏng jih ai tiê wah lač brei kơ diñu, boh nik nak êjai diñu dôk găn klei ruă duam. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Klei Yăl Dliê 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
