Teev Npe 12:10-15
Nqe cim:
“Tiamsis nimno kuv qhia rau nej hais tias, ‘Hlub nej cov yeebncuab thiab thov Vajtswv pab rau cov uas tsimtxom nej” (Mathais 5:44)
Lus nug rau sawvdaws xav:
– Vim li cas Milias raug mob ruas?
– Ua cas Milias tau kho zoo mob?
– Tswv Yexus qhia peb thov Vajtswv rau yeebncuab thiab cov tsimtxom peb li cas?
Hauv ncua caij nyoog uas Muaxes coj cov Yixalayees mus los tom tiaj suabpuam, ntau zaus Mauxes raug yws thiab raug tawmtsam ntawm ntau tus neeg, tiamsis nws yeej ncaj ncees mloog Vajtswv lus, coj Vajtswv haivneeg kev thiab tas siab thov Vajtswv rau lawv (Khiavdim 32:11-14).
Ntawm no, Mauxes raug nws tus tijlaug thiab tus muam tawmtsam, vim nkawd xav txeeb lub meej mom ua thawj coj uas tus Tswv tsis pub rau nkawd. Tus Tswv tau hu lawv peb leeg tawm tuaj sawv tabmeeg nws thiab tus Tswv nyob hauv tauv huab ntawm lub qhovrooj Tsevntaub sib ntsib qhia rau nkawd paub hais tias vim licas nws xaiv Mauxes ua thawj coj. Vajtswv chim heev rau Milias thiab Aloos nkawd (Teev Npe 12:1-9) kiag lub sijhawm uas tus Tswv ncaim mus“Milias lub cev cia li mob ruas thoob plaws thiab dawb paug ib yam li te”. Aloos zeem paub nkawd txoj kev txhaum, nws thiaj lees txim thiab thov Mauxes hlub tshua txog Milias, thiab thov Vajtswv zam txim rau nkawd. Txawm yog raug tus muam thiab tus tijlaug tawmtsam, Los Mauxes yeej tseem thov Vajtswv hlub tshua thiab kho nws tus muam kom zoo. Vajtswv teb Mauxes tej lus thov thiab kho Milias zoo tom qab xya hnub uas raug nyob sab nraum ntug yeej.
Yam zoo hauv ntu Vajluskub no yog nplooj siab thov Vajtswv rau lwm tus ntawm Mauxes, nws yeej txaus siab hlo sawv cev thov tus Tswv rau lwm tus, thiab tus Tswv teb nws tej lus thov los ntawm tus Tswv lub siab hlub tshua. Raws li tibneeg tus yam ntxwv saib nqaim, peb yeej tsis kam thov Vajtswv pab rau tus uas tawmtsam yus li. Tiamsis Mauxes tus yam ntxwv zoo, txawm yog raug yus tus muam thiab tus tijlaug tawmtsam, los nws yeej tas siab Vajtswv pab kho nws tus muam zoo mob. “Vajtswv, thov koj kho Milias lauj!” (nqe 13).
Mauxes ua qauv ntawm txaus siab thov Vajtswv kho zoo tus uas tawmtsam nws. Mauxes tej lus thov Vajtswv tsis yog thov kho sab nqaij tawv xwb tiamsis tseem kho Milias sab ntsujplig huv tibsi thiab. Vim yog Milias raug mob ruas ces yuav raug muab cais tawm ntawm ib tsoom Yxalayees mus. Tswv Yexus hais tias: “Tiamsis nimno kuv qhia rau nej hais tias, ‘Hlub nej cov yeebncuab thiab thov Vajtswv pab rau cov uas tsimtxom nej,’ yog nej ua li no, nej thiaj yog Leej Txiv tus uas nyob saum ntuj cov menyuam. Rau qhov Vajtswv ua nws lub hnub ci rau cov neeg ua phem thiab cov neeg ua zoo, thiab tso nag los rau cov neeg ncaj thiab cov neeg tsis ncaj ib yam nkaus” (Mathais 5:44-45). Tsis yoojyim rau peb ua tau li no, tiamsis yog Leej Txiv saum ntuj cov menyuam lawm, peb yuavtsum mloog Nws lus, paub hlub tshua tus uas tsis muaj zog, thov Vajtswv pab rau lawv, txawm hais tias lawv yog cov uas tsis hlub peb thiab tawmtsam peb los xij, vim peb ntseeg hais tias Vajtswv yuav tuaj peb tog.
Thov Vajtswv,
Vajtswv, thaum ntsib cov neeg tawmtsam nyuam yaus, thov pab kom nyuam yaus paub muab txhua yam ntawd qhia rau Koj. Thov Koj tuaj nyuam yaus tog thiab pub rau nyuam yaus txaus siab thov Vajtswv Koj pab rau lawv, tshwjxeeb yog thaum lawv ntsib kev mob nkeeg, kev txomnyem. Nyuam yaus tuav Tswv Yexus Khetos lub npe thov, Amees.
Peb puas npaj txhij yuav thov Vajtswv rau cov uas tawmtsam peb?
Nyeem Vajluskub hauv peb lub xyoos: 1 Xwmtxheej Vajntxwv 24
Kênh Youtube BHKTHN:
