Klei Aê Diê Blŭ: Bruă Phung Khua Ƀĭng Kna 1:4-14
Êlan kliăng: “Msĕ mơh wah lač brei wăt kơ hmei đa, akâo kơ Aê Diê pŏk ƀăng bhă kơ hmei dưi mtô klei blŭ, čiăng hưn klei yuôm hgăm Krist, kyua klei anăn arăng krư̆ kâo leh. Wah lač bĕ čiăng kâo dưi bi êdah klei yuôm hgăm anăn hŏng klei klă tui si klei djŏ kơ kâo blŭ” (Kôlôs 4:3-4)
Klei êmuh ksiêm mĭn: Ya ngă Khua Yang mtă brei phung ƀĭng kna dôk guôn hlăm ƀuôn Yêrusalem?Ya bruă Khua Yang jao kơ diñu, leh anăn si klei diñu kčưm dơ̆ng? Si drei dôk ngă bruă jao anăn?
Leh kbiă lŏ hdĭp, Khua Yang bi êdah, mtô lač leh kơ phung ƀĭng kna hlăm 40 hruê, leh anăn iêô mthưr brei diñu dôk guôn hlăm ƀuôn prŏng tơl truh mmông brei klei myang Yang Mngăt Jăk kơ diñu čiăng dưi hiu mtô klei đăo. Khua pô mtô A.B. Simpson mblang, “Jih hruê dôk guôn anei jing yuôm čiăng kơ phung ƀĭng kna thâo kral klei kƀah diñu, klei jing hơăi mang, klei amâo dưi diñu pô leh anăn klei knang kluôm dhuôm hjăn kơ Nai diñu. Brei diñu jing êhŏng êlâo kơ tuh bi bŏ.” Klei pŏk leh anăn mkŏ mdơ̆ng Phung Sang Aê Diê brei mâo lu mnuih bi mguôp mbĭt wah lač, mprăp mkra, hiu mtô Klei Aê Diê Blŭ… Hlăm klei anăn, wah lač čiăng mă tŭ klei myang Yang Mngăt Jăk jing knhuang mprăp amâo dưi kƀah ôh. Khua pô mtô Billy Graham lač leh snei: “Kliăng ba klei tŭ jing hlăm bruă mtô hưn Klei Mrâo Mrang Jăk jing wah lač, wah lač leh anăn… wah lač!”
Bruă Khua Yang jao kơ phung ƀĭng kna brei nao tar ƀar lăn ala hiu hưn kơ klei Khua Yang djiê leh anăn kbiă lŏ hdĭp, dơ̆ng mơ̆ng anôk diñu dôk ti ƀuôn Yêrusalem; lar truh kơ tar čar riêng gah jing čar Yuđa, čar Samari; leh anăn tơl truh ti knhal lăn ala. Khua Yang mtă kơ diñu kčưm dơ̆ng ngă bruă jao hŏng klei dôk guôn klei myang Yang Mngăt Jăk srăng tuh brei kơ diñu. Hruê êlâo, phung ƀĭng kna mâo Khua Yang dôk mbĭt, ƀiădah ară anei Khua Yang đĭ wĭt kơ adiê leh, kyuanăn knŏng hjăn sa êlan brei diñu bi mguôp hŏng Khua Yang jing wah lač yơh. Dơ̆ng mơ̆ng čư̆ Ôliwơ, diñu trŭn nao wĭt kơ ƀuôn Yêrusalem, bi mguôp hrăm mbĭt wah lač hlăm adŭ tal dlông: “Jih jang phung anăn sa ai dôk wah lač, mbĭt hŏng phung mniê, mbĭt hŏng H’Mari amĭ Yêsu, leh anăn hŏng phung ayŏng adei Yêsu” (êlan 14). Wah lač yơh jing klei kčưm dơ̆ng bruă jao hiu hưn Klei Mrâo Mrang Jăk. Truh hruê Knăm Pantơkôt, Yang Mngăt Jăk trŭn msĕ si klei Khua Yang hưn êlâo leh, phung ƀĭng kna mă tŭ klei myang leh anăn diñu dơ̆ng hưn bi sĭt kơ Khua Yang Yêsu hŏng klei jhŏng.
Hưn mtô Klei Mrâo Mrang Jăk jing klei mtă leh anăn klei pap Khua Yang jao kơ phung anak ƀuôn sang Ñu, čiăng ba klei bi mtlaih truh kơ lu mnuih. Drei gưt ngă klei mtă anei hlăm klei myang Yang Mngăt Jăk, leh anăn wah lač yơh jing kliăng čiăng kơ klei myang Yang Mngăt Jăk bi êdah. Khua ƀĭng kna Y-Pôl pô thâo săng leh mơh klei anei hlăk ñu akâo kơ Phung Sang Aê Diê wah lač brei: “Msĕ mơh wah lač brei wăt kơ hmei đa, akâo kơ Aê Diê pŏk ƀăng bhă kơ hmei dưi mtô klei blŭ, čiăng hưn klei yuôm hgăm Krist…” (Kôlôs 4:3). Hruê anei, bruă hiu hưn klei đăo dưi ngă hŏng lu êlan, grăp čô drei brei mâo kdrêč mguôp mbĭt leh anăn hŏng jih ai tiê wah lač čiăng kơ grăp hruê lŏ mâo thiăm lu mnuih dưi mâo klei bi mtlaih.
Ya kdrêč drei bi mguôp mbĭt hŏng Phung Sang Aê Diê hlăm bruă hiu hưn Klei Mrâo Mrang Jăk kơ lăn čar drei?
Wah lač: Ơ Khua Yang, akâo klei myang Yang Mngăt Jăk tuh bŏ hlăm kâo, mtrŭt kâo hur har wah lač leh anăn mâo kdrêč bi mguôp mbĭt kơ bruă hiu hưn Klei Mrâo Mrang Jăk hlăm Phung Sang Aê Diê. Akâo Khua Yang pap brei kơ phung găp djuê ƀuôn sang kâo, bi êun ai tiê diñu mă tŭ Klei Mrâo Mrang Jăk bi mtlaih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Čŏk Hia 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
