Blŭng a 45:1-15
“Đe pơm kơnê̆ kơ bơ̆n, bơ̆n ‘nĕ pơm tơwih kơ đe, bơ̆n athei pơm ‘lơ̆ng pơm trŏ, pơm kiơ̆ kơ tơdrong bôl buăl mă lăp đon; bơ̆n pơm thoi noh đĕch ‘lơ̆ng. Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ đăng bơngai.” (Rôm 12:17-18)
Nơ̆r jet tơchĕng pơwao:
– Yua kơ kiơ ‘bok Jôsep ưh kơ jô̆ yo kơ lu ‘nhŏng oh sư?
– Sư pơm tơ’bôh jơhngơ̆m huay kơ jô̆ yo thoi yơ?
– Pơm thoi yơ lu bơ̆n gơh arih pơhiôk hăm bơngai pơm ưh kơ hiôk hăm bơ̆n?
Đơ̆ng rŏng kơ đei tơdrong truh, pơmat păng ơh blĕk, Kră Yang ‘Bok Kei-Dei ăn kơ ‘bok Jôsep tŏk tơ anih jang pơm ‘bok Kuan tih wei pơgơ̆r dêh char Êyiptơ. Sư đei tơ’bơ̆p dơ̆ng lu ‘nhŏng oh sư, jô̆ lu bơngai mă tĕch sư pơm đĭch đam, kơplah lu sư năm răt phe ‘ba. Đơ̆ng lăm jơ năr đei tơ’bơ̆p sư đei tơchĕng, wă pơlong lăng lu ‘nhŏng sư, ding truh năr mă sư ưh pă gơh ôn dơ̆ng bơih. Sư nhơ̆m ôr roi kơ lu ‘nhŏng oh sư păng jet gia gah ‘bă lu sư mă kră bơih, kơplah lu ‘nhŏng sư hli tơrơ (trong 1-3). Rŏ lăng ‘bok Jôsep hlôh lăm jơhngơ̆m ‘nhŏng oh hli tơrơ păng mơlâu kơdơ̆ đêl pơm yoch kơplah đei tơ’bơ̆p oh lu sư. Yua kơ thoi noh, sư adrin pơlung lu sư, “ưh kơ sĭ đơ̆ng lu iĕm mă ‘noh đơ̆ng Kră Yang ‘Bok Kei-Dei wơh inh tơ âu.” (trong 8 BTTHĐ).
‘Bok Jôsep đei pơm tơ’bôh jơhngơ̆m huay kơ jô̆ yo ôh kơ ‘nhŏng oh lăm tôm tơdrong wă kơ ‘nhŏng oh sư băt tơdrong lu sư pơm noh đơ̆ng Kră Yang ‘Bok Kei-Dei hơmet lê̆ lăm chăl arih ‘bok Jôsep. Hăm tơdrong jang pơm tih kơplah noh, sư gơh pơm ‘mong kơ lu ‘nhŏng oh sư wă loh đĕch. Mălei hăm jơhngơ̆m đon lui gơnang păng băt nhen tơdrong kiơ̆ thoi Kră Yang wă lăp đon, sư wă tơpă mơnat ăn dôm tơdrong yoch lu ‘nhŏng oh sư đei pơm yoch păng sơng iŏk lu ‘nhŏng sư mă ‘lơ̆ng. Sư athei lu ‘nhŏng sư tĕnh jah brŏk păng chông ba ‘bă lu sư wih brŏk tơ dêh char Êyiptơ. Sư gô apinh pơtao Pharaôn ăn kơ lu sư anih oei jang sa păng sư gô wei rong hiĕm ‘me hnam dơnŏ kơplah ‘bơ̆t pơngot. Sư ling lang pơm tơpăt đei jơhngơ̆m huay kơ jô̆ yo păng adrin pơma pơhiôk hăm lu ‘nhŏng oh sư (trong 9-13).
‘Nâu bơih kơplah lăm hnam dơnŏ đei tơ’bơ̆p pơpôi dih băl đei jơhngơ̆m ‘brơ̆k nhơ̆m hmoi lăm Jôsep hăm lu ‘nhŏng oh sư. Đơ̆ng rŏng kơ khei ‘năr tơklah ataih dih băl đei tơdrong truh, gleh hơnat, lu sư đei tơ’bơ̆p pơgơ̆p hơdai dih băl chơt hiôk lĕch đak măt. Tơdrong pơgơ̆p tơ’bưh lăm hnam dơnŏ gơh hơmet hiôk dih băl noh lĕch đơ̆ng jơhngơ̆m ‘mêm mơnat huay kơ jô̆ yo đơ̆ng ‘bok Jôsep. Tơdrong yoch tih trăp đơ̆ng lu ‘nhŏng oh sư gơh hŭt lê̆. Jơ ‘nâu, lu sư kuăr chŭm dih băl, đei đak măt ro yua kơ chơt hiôk (trong 14). Đơ̆ng tơdrong hli tơrơ na ưh pă gơh pơma kiơ (trong 3), jơ ‘nâu lu ‘nhŏng oh gơh pơma dơnuh hăm ‘bok Jôsep (trong 15).
‘Bok Pôl đei bơtho: “Đe pơm kơnê̆ kơ bơ̆n, bơ̆n ‘nĕ pơm tơwih kơ đe, bơ̆n athei pơm ‘lơ̆ng pơm trŏ, pơm kiơ̆ kơ tơdrong bôl buăl mă lăp đon; bơ̆n pơm thoi noh đĕch ‘lơ̆ng. Bơ̆n ‘nĕ kơ pơm dôm tơdrong kơnê̆ wă kơ bơ̆n oei hiôk hơiă hăm đĭ đăng bơngai.” (Rôm 12:17-18). Lăm tơdrong arih, lu bơ̆n ưh kơ wer weh ôh đei bơngai pơm kơnê̆ hăm bơ̆n. Lơ bơngai tep kơmăng nŏng kơ tơchĕng chă đon wă pơm ‘mong. Mălei Kră Yang wă kơ lu bơ̆n ưh kơ pơm rok thoi đei khan đe pơm kơ bơ̆n, bơ̆n pơm tơwih kơ đe thoi noh mơ̆n, mălei athei arih pơm mă ‘lơ̆ng, ‘maih pơm tơdrong ‘lơ̆ng ‘bơ̆t anăp kon bơngai. Rơih iŏk arih ưh kơ jô̆ yo gô đei yua ‘noh hiôk hơiă dih băl. Tơdrong âu ưh kơ ‘bônh ôh na nơ̆r Kră Yang bơtho lu bơ̆n adrin đĭ jơhngơ̆m. Kră Yang gô ăn pŭn hiôk kơ lu bơ̆n, thoi Sư đei ăn pŭn hiôk kơ ‘bok Jôsep.
Ơ Kră Yang apinh Ih kơ inh đei jơhngơ̆m pơm ‘lơ̆ng kơ đe, ‘bĕnh blai jơhngơ̆m ‘mêm mơnat păng ling lang huay kơ jô̆ yo dih băl wă kơ inh ling lang arih hiôk hơiă hăm rim bơngai. Krao khan yua anăn Kră Yang Yêsu Krist, Amen.
Lu bơ̆n hăm wă mơnat ăn tơdrong yoch bơngai mă pơm kơnê̆ kơ bơ̆n păng arih hiôk ‘lơ̆ng hăm lu sư ưh?
Đŏk Sơ̆p Hla bơar ‘Bok Kei-Dei lăm pêng sơnăm: Hơriso 50-51
Kênh Youtube BHKTHN:
