Êsai 1:13-18
“Iĕm athei pơm băl mă ‘lơ̆ng, băt ‘mêm mơnat kơ bôl buăl, ‘nĕ kơ jô̆ yo dih băl thoi ‘Bok Kei-Dei huay kơ jô̆ yo kơ bơ̆n yua kơ Kon Sư Yêsu Krist lôch tang bơ̆n.” (Êphêsô 4:32)
Nơ̆r jet tơchĕng pơwao:
– ‘Bok Êsai roi tơbăt khan Kră Yang ‘Bok Kei-Dei huay kơ jô̆ yo kơ kon Pơlei Sư thoi yơ?
– Kră Yang Yêsu krao khan kơ lu bơngai mă pơ̆ng Sư hăm kơđĭnh tơ’long pơglang noh thoi yơ?
– Pơm thoi yơ wă kơ bơ̆n huay kơ jô̆ yo kơ lu bơngai mă pơm kơ bơ̆n ưh kơ hiôk dêh noh?
Êsai bơngai pơtruh nơ̆r’Bok Kei-Dei tơ’bôh tơbăt kơ bơ̆n tơdrong yoch lu bơngai Juđa tih trăp trĭn păng tơdrong mơnat ăn rơkah rơkai đơ̆ng ‘Bok Kei-Dei. Kră Yang bơih Tơ’ngla ‘lơ̆ng rơgoh, Sư ‘mê̆ areh kơ tơdrong yoch.Tơdah kon pơlei Juđa khăng kơ̆l păng nŏng kơ pơm yoch lei mă khan lu sư năm tơ Hnam akŭm tơm pơyơ̆r lơ lơ tơmam soi, mă khan lu sư akŭm pơpôi băl dôm lu năr giĕng tih, mă khan lu sư đei hơri ư-ang kơ Kră Yang, mă khan lu sư krao khan kơjung ioi hĭ dang yơ, KrăYang lăng oei ‘mê̆ areh, ưh kơ wă mơ̆ng ‘mơ̆i.(Êsai 1:1-17. Ma-lei lăp lu kon pơlei Sư tơbral tơpă , Kră Yang đei dơ̆ng nơ̆r hlĭch hlăch khan ăn kơ lu sư: “Kră Yang khan: “Dang ei lu bơ̆n năm bĕ wă kơ pơma pơđâu băl. Mă đơ̆ng tơdrong yoch lu iĕm ‘brê nhen thoi đak thêt gô jing kok thoi đak prĕl. Mă ‘brê gơhieo gô jing kok thoi sŏk triu.” (tr.18). Êsai bơngai pơtruh nơ̆r ‘Bok Kei-Dei đei tơbăt khan Kră Yang Tơ’ngla dim găt ‘bĕnh tơdrong mơnat, mă-lei wă kơ Kră Yang mơnat huay kơ jô̆ tơdrong yoch lei bơngai mă yoch noh athei tơbral mă tơpă.Bơngai mă tơbral tơpă, bơngai noh Kră Yang gô mơnat huay kơ jô̆ yo tôm tơdrong.Tơdrong Kră Yang mơnat huay kơ jô̆ yo noh hlĭch hlăch dêh!
Kơpal ‘long pơglang, Kră Yang Yêsu krao khan ăn kơ lu bơngai mă pơ̆ng Sư kơđĭnh noh thoi âu: “Na Yêsu khan kơ ‘Bă Sư ‘Bok Kei-Dei thoi âu: “Ơ ‘Bă, apinh Ih ‘nĕ jô̆ yo kơ lu sư, yua kơ lu sư ưh kơ băt lu sư oei pơm kiơ ôh.” Na lu linh ei pơpơn dih băl wă kơ băt bu gơh iŏk ao Yêsu, bu iŏk ao ayơ, bu iŏk ao ayơ. Lu sư asong băl ao Yêsu thoi noh.” (Luka 23:34). Rok kơmĭl Kră Yang Yêsu,’bok Êtien đe pơm kơnê̆ klơ̆m sư hăm tơmo, adrol kơ sư wă lôch,sư krao khan thoi âu: “Klaih kơ noh sư sơtơ̆p kŭl tăng pơma ‘bơ̆r re thoi âu: “Ơ Kră Yang, Ih ‘nĕ jô̆ yo kơ lu bơngai pơlôch inh.” Na sư lôch hloi. Sôl kư̆m wă kơ đe pơlôch Êtien mơ̆n.” (Tơdrong jang 7:60).
Mưh bơ̆n arih kiơ̆ tơpă kơ nơ̆r Kră Yang bơtho, bơ̆n ưh kơ pơm ‘mong kơ đe ôh, tơplơ̆ kơ ‘noh, bơ̆n krao khan păng tơgŭm mơnat kơ lu ayăt dơ̆ng. Bơ̆n iŏk tơdrong ‘lơ̆ng blah tơdrong kơnê̆, tơdrong kơnê̆ thuơ kơ tơdrong’lơ̆ng na anăn Kră Yang đei ư-ang, păng Kră Yang pơklaih bơ̆n huay pă đei jơhngơ̆m trĕn khŏn kơ đe (Rôm 12:17-21).
‘Bok Pôl bơtho: “Iĕm athei pơm băl mă ‘lơ̆ng, băt ‘mêm mơnat kơ bôl buăl, ‘nĕ kơ jô̆ yo dih băl thoi ‘Bok Kei-Dei huay kơ jô̆ yo kơ bơ̆n yua kơ Kon Sư Yêsu Krist lôch tang bơ̆n.” (Êphêso 4:32). Kră Yang wă kơ bơ̆n arih huay kơ jô̆ yo kơ đe thoi Kră Yang huay kơ jô̆ yo kơ bơ̆n lăm Kră Yang Yêsu Krist. Mưh đe pơm glăi hăm bơ̆n, na sư tơbral tơpă hăm đĭ jơhngơ̆m, bơ̆n athei mơnat ăn, huay pă jô̆ yo.Tơdah sư oei khăng kơ̆l ưh kơ tơbral, athei krao khan apinh Kră Yang mơnat ‘nĕ kơ jô̆ yo kơ bơngai noh, apinh Kră Yang khă bơngai noh ‘nĕ pă pơm yoch, hơmet,bơtho pơjĭ bơngai noh wă kơ sư băt kơ sư glăi na tơbral hơdrĭ hơdrôi. Kră Yang khan bơih thoi âu: “Dah iĕm oei jô̆ yo kơ đe pơm yoch kơ iĕm, lei ‘Bă bơ̆n tơ plĕnh ti kư̆m jô̆ yo kơ tơdrong yoch iĕm mơ̆n.” (Mathiơ 6:15).Kư̆m đei ‘bơ̆t yơ ei jơhngơ̆m đon bơ̆n anat kơ hiơt đêl lu bơngai mă pơm kơ bơ̆n sơ’ngon dêh, ưh kơ hiôk dêh noh. Mă khan lei ră,tơdrong huay kơ jô̆ yo kơ đe thoi Kră Yang huay kơ jô̆ yo ‘noh jơ̆ tơdrong Kră Yang athei, bơ̆n athei đĭ jơhngơ̆m krao khan gơnang kơ mơsêh mơyang ‘mêm mơnat đơ̆ng Yang Bơhngol’Lơ̆ng tuh ăn ‘bĕnh blai kơ lu bơ̆n wă kơ lu bơ̆n huay kơ jô̆ yo kơ lu bơngai pơm kơnê̆ kơ bơ̆n păng apinh Yang Bơhngol’Lơ̆ng tuh ăn tơdrong‘mêm mơnat Sư kơ lu bơngai mă pơm kơnê̆ kơ bơ̆n ‘noh mơ̆n wă kơ lu sư huay pă pơm kơnê̆ kơ bơ̆n.
Kơkuh kơ Ih ‘Bă mă ‘mêm kơeng, Nơ̆r Ih bơtho wă kơ inh huay kơ jô̆ yo kơ bơngai pơm glăi hăm inh, nơ̆r ‘noh đơ̆ng Ih athei păng lăm nơ̆r‘noh kư̆m đei tơdrong pơlong lăng, lei na inh kăl dêh đei tơdrong mơsêh pran đơ̆ng Ih wă kơ inh kĕ pơm kiơ̆. Apinh Ih tơgŭm mơnat wă kơ inh ling-lang arih hăm jơhngơ̆m’mêm mơnat huay kơ jô̆ yo kơ đe thoi Ih ‘mêm mơnat huay kơ jô̆ yo kơ inh. Inh krao khan yua anăn Kră Yang Yêsu Krist, Amen!
Bơ̆n krao khan păng ‘mêm mơnat huay kơ jô̆ yo kơ bơngai mă pơm kơnê̆ kơ bơ̆n thoi yơ?
Đŏk Sơ̆p Hlabơar’Bok Kei-Dei lăm pêng sơnăm: Hơriso 52-53
Kênh Youtube BHKTHN:
