Mathais 18:28-35
Nqe cim:
“Yog nej ib leeg tsis zam txim rau ib leeg, kuv Txiv tus uas nyob saum ntuj ceebtsheej yuav ua ib yam nkaus li ntawd rau nej thiab.” (Mathais 18:35)
Lug nug rau sawvdaws xav:
– Tus tub txib uas tau vajntxwv zam tswv nqi loj heev tau ua licas rau nws tus phoojywg?
– Thaum hnov li ntawd, vajntxwv tau ua licas rau tus tubtxib uas tsis muaj kev hlub?
– Tus Tswv xav kom peb ib tug yuav tsum ua licas rau ib tug?
Tswv Yexus hais txiv zaj lus pivtxwv txog tus tubtxib tomqab uas tau vajntxwv hlub thiab zam tswv nqi uas yog ib plhom nyiaj, thaum tawm mus, nws ntsib ib tug tubtxib uas yog lawv tib pab uas tshuav nws nqi ib puas lub nyiaj xwb. Ib puas lub nyiaj yog nqi rau ib puas hnub zog, kuj yog ib cov nyiaj uas ntau zog thiab tiamsis yog muab piv rau ib plhom nyiaj ces tsuas yog ib piv rau rau pua txhiab xwb! Tus tubtxib uas tau vajntxwv zam tswv nqi loj heev tsis zam rau tus phoojywg uas tshuav nws nqi tsawg heev. Txawm yog tus phoojywg ntawd “txhos caug ntua thov nws”, los nws yeej tsis yib thiab coj tus phoojywg ntawd mus kaw hauv tsev lojcuj mus txog hnub them nqi tas rau nws!
Thaum hnov zaj no, vajntxwv tsis txaus siab rau tus tubtxib ntawd vim nws twb txais tau kev hlub loj heev lawm tiamsis nws ho tsis hlub thiab tsis zam nqi rau nws tus phoojywg. Vajntxwv thiaj chim heev thiab yuam coj tus tubtxib ntawd mus kaw rau hauv tsev lojcuj mus txog hnub them nqi tas. Tswv Yexus xaus lus hais tias: “Yog nej ib leeg tsis zam txim rau ib leeg, kuv Txiv tus uas nyob saum ntuj ceebtsheej yuav ua ib yam nkaus li ntawd rau nej thiab” (nqe 35). Vajtswv tsis txaus siab rau ib tug uas twb txais tau Vajtswv tej koob hmoov lawm tiamsis tseem tsis ua neej zam txim rau lwm tus.
Tagnrho cov ntseeg Tswv Yexus puavleej tau tus Tswv zam ib tswv nqi loj heev uas yog lawv tej kev txhaum. Thiab yuav zam txim tau rau peb, Vajtswv tau muab Nws Leej Tub txojsia tsimtxiaj los theej txhoj. Nws xav kom peb tsis txhob ua neej qia dub tiamsis yuav tsum qhia tshwm nplooj siab nco tus Tswv txiajntsig dhau ntawm kev zam txim rau yus tej kwvtij, vim tej kev txhaum luag ua rau yus hauv lubneej yog muab piv rau tus Tswv txojkev hlub uas pub rau peb ces me kawg nkaus li. Tus Tswv qhia peb tsis yog tsuas zam txim xwb tiamsis yuav tsum “ua siab dawb paug” hauv kev zam txim, tsis yog tsuas zam txim ib zaug tiamsis yog xya zaus xya caum! Peb txhua tus puavleej nco nqe lus: “Thov koj zam txim rau peb ib yam li peb twb zam txim rau cov uas ua txhaum rau peb lawm.” Tiamsis yog peb tsis kam zam txim rau lwm tus ces Vajtswv Txojlus ceebtoom hais tias, Leej Txiv tus uas nyob saum Ntuj Ceeb Tsheej kuj yuav ua li ntawd rau peb.
Thov tus Tswv pub rau peb txaus siab zam txim npluamias, zam txim los ntawm nplooj siab dawb paug. Tsis yog tsuas ua tiag ua kom tiav ib txojcai raws li kev ntseeg tiamsis yuav tsum ua lubneej sib hlub, sib hmov tshua, sib nkag siab thiab hlub tshua peb tej kwvtij, tas siab tas ntsws zam txim ib yam li Vajtswv twb zam txim rau peb hauv tus Cawmseej lawm (Efexus 4:32).
Thov Vajtswv,
Tus Tswv, thov Koj zam txim rau nyuam yaus nplooj siab tsis quavntsej thiab tej lus hais tsis muaj kev hlub thaum txiav txim rau cov kwvtij tej kev txhaum. Thov pab nyuam yaus nco Koj txiajntsig kom muaj lub siab dawbpaug zam txim rau nyuam yaus tej kwvtij. Nyuam yaus tuav Yexus Khetos lub npe thov, Amees.
Ib tsoom cov mloog uas hmov thiab tshua,
Peb xav kom tus Tswv zam txim rau peb licas? Peb puas tas siab zam txim rau peb tej kwvtij?
Nyeem Vajluskub hauv peb lub xyoos: Loos 2
Kênh Youtube BHKTHN:
