Klei Aê Diê Blŭ: Y-Mathiơ 18:28-35
Êlan kliăng: “Msĕ snăn mơh Ama Kâo hlăm adiê srăng ngă kơ grăp čô diih, tơdah diih amâo pap brei ôh kơ ayŏng adei diih hŏng jih ai tiê” (Y-Mathiơ 18:35)
Klei êmuh ksiêm mĭn: Si dĭng buăl đuôm nư khua ñu lu ngă kơ găp ñu? Tơdah hmư̆ klei anăn, ya khua ngă kơ dĭng buăl amâo thâo pap brei anăn? Si ngă Khua Yang čiăng drei dôk dơ̆ng ƀơ̆ng huă hdơ̆ng drei?
Khua Yang Yêsu lŏ čuê kơ klei yăl dliê kơ sa čô dĭng buăl leh khua bi êngiê brei nư ñu đuôm pluh êbâo talăng, tơdah ñu đuĕ wĭt bi tuôm hŏng sa čô găp dôk đuôm nư ñu sa êtuh đơniê. Sa êtuh đơniê mdŭm hŏng prăk mưn sa êtuh hruê mă bruă, jing sa ênoh prăk lu ƀiă mơh ƀiădah tơdah mkă hŏng pluh êbâo talăng snăn ênoh prăk anăn knŏng msĕ si sa prăk mkă hŏng hlăm brô năm êtuh êbâo prăk! Dĭng buăl khua bi êngiê brei leh nư ñu đuôm lu snăk amâo pap brei ôh kơ găp ñu đuôm nư ñu ƀiă dhit. Wăt tơdah găp ñu “klăm ti anăp ñu leh anăn kwưh kơ ñu” ƀiădah hŏng klei amâo mâo uêñ ñu brei arăng mă ba krư̆ gơ̆ tơl gơ̆ tla jih nư.
Thâo klei anăn, khua ñu ngêñ snăk kyuadah ñu mă tŭ leh klei pap prŏng ƀiădah amâo khăp leh anăn amâo pap brei ôh kơ găp ñu. Hŏng klei ngêñ snăk khua ñu jao arăng krư̆ ñu tơl ñu tla jih nư ñu. Khua Yang Yêsu bi ruê̆: “Msĕ snăn mơh Ama Kâo hlăm adiê srăng ngă kơ grăp čô diih, tơdah diih amâo pap brei ôh kơ ayŏng adei diih hŏng jih ai tiê” (êlan 35). Aê Diê amâo tŭ ôh sa čô mă tŭ leh klei pap prŏng mơ̆ng Ñu ƀiădah amâo pap brei ôh kơ pô mkăn.
Grăp čô phung đăo drei Aê Diê pap bi êngiê leh sơăi nư klei soh prŏng drei. Leh anăn čiăng dưi pap brei klei soh drei Ñu yua leh klei hdĭp Anak Ñu pô. Ñu čiăng snăk drei amâo djŏ knŏng mă tŭ kơ drei pô ôh ƀiădah brei drei bi êdah klei thâo hdơr knga kơ Aê Diê hŏng klei pap brei klei soh phung ayŏng adei, kyuadah klei soh phung ayŏng adei drei điêt êdimima mkă hŏng klei pap prŏng prĭn Aê Diê pap brei leh kơ drei. Khua Yang mtă kơ drei amâo djŏ knŏng pap brei ôh ƀiădah pap brei “hŏng jih ai tiê mơh”, amâo djŏ pap brei knŏng sa blư̆ ôh ƀiădah pap kjuh pluh blư̆ kjuh! Grăp čô drei tuč sơăi klei wah lač “Pap brei kơ klei soh hmei, msĕ si hmei pap brei mơh kơ mnuih bi msoh kơ hmei leh.” Ƀiădah tơdah drei amâo čiăng pap brei ôh klei soh pô mkăn snăn Klei Aê Diê Blŭ hưn brei thâo, msĕ snăn mơh Ama hlăm adiê srăng ngă kơ grăp čô drei.
Akâo Khua Yang đru drei thâo pap brei nanao, pap brei hŏng jih ai tiê. Amâo djŏ gĭr ngă čiăng bi leh sa mta bruă tui si klei bhiăn klei đăo ôh ƀiădah jing knhuah dôk dơ̆ng ƀơ̆ng huă thâo khăp, thâo uêñ mĭn, thâo săng leh anăn bŏ hŏng klei pap kơ phung ayŏng adei pô, hŏng jih ai tiê bi pap brei msĕ si Aê Diê pap brei leh kơ drei hlăm Krist (Êphêsô 4:32).
Si ih čiăng Khua Yang pap brei klei soh Ih? Ih pap brei kơ phung ayŏng adei ih hŏng jih ai tiê mơ̆?
Wah lač: Ơ Khua Yang, akâo Ih pap brei kơ klei kâo amâo thâo pap, kƀah klei khăp tơdah kâo phat kđi klei soh phung ayŏng amai adei kâo. Đru kâo thâo hdơr knga bi mni kơ Ih kyua klei pap Ih brei leh kơ kâo čiăng hŏng jih ai tiê pap brei kơ phung ayŏng amai adei kâo hlăm djăp mta klei. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Rôm 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
