II. Xwmtxheej Vajntxwv 15:1-7
Nqe cim:
“Vajntxwv Axas, koj thiab cov Yudas thiab cov Npeenyamees cia li mloog kuv hais! Tus Tswv yuav nrog nraim nej, yog nej tsis tso Nws tseg. Yog nej nrhiav Nws, Nws yuav cia nej ntsib Nws, tiamsis yog nej tsis muab siab npuab Nws, Nws yuav tso nej tseg” (II. Xwmtxheej Vajntxwv 15:2).
Lus nug rau sawvdaws xav: Vajntxwv Axas mus cuag tus cevlus Axaliyas rau lub caijnyoog twg? Tus cevlus Axaliyas tau qhia tus lw li cas rau vajntxwv? Keebkwm ntawm tus Tswv haivneeg ua timkhawv rau tus lw uas Axaliyas qhia rau vajntxwv zoo li cas? Peb cheemtsum ua dabtsi kom tus Tswv nrog nraim thiab tau kev kaj siab?
Tom qab uas ntaus yeej cov tubrog Ethi-aupias rov qab los, Vajntxwv Axas tau tus cevlus Axaliyas tuaj tos, tsis yog tuaj qhuas qhov uas vajntxwv ntaus yeej rog tiamsis yog tau Vaj Ntsujplig tshoov siab, Axaliyas tuaj qhia rau vajntxwv tus lw tseemceeb kom tsis txhob ua poob kev thajyeeb, qhov ntawd yog lawv tsis tso Nws tseg ces Nws yeej nrog nraim lawv nyob. Yog lawv nrhiav Nws, lawv yuav ntsib Nws, tiamsis yog lawv tso Nws tseg, Nws yuav tso lawv tseg. Keebkwm ntawm tus Tswv haivneeg ua timkhawv qhia, tshwjxeeb yog nyob rau tiam Cov Thawj Tswj, thaum cov neeg Yixalayees tso Vajtswv tseg mus pemlom, tsis muaj tus Tswv Txojlus qhia thiab kuj tsis ua raws li Nws tej kevcai. Yog li ntawd tus Tswv tsis nrog lawv nyob, lub neej thiaj tsis muaj kev kaj siab. Lawv ua neej nrog kev tsovrog, ntxhov siab, tsis muaj kev thajyeeb vim Vajtswv “tso kev kub ntxhov los rau lawv”. Txawm li ntawd los, txhua zaus uas nyob hauv txojkev kub ntxhov, lawv tig rov los nrhiav tus Tswv thiab ntsib Nws. Axaliyas xaus nws zaj lus qhia los ntawm tej lus txhawb zog, cia li nrhiav tus Tswv kom tej haujlwm nej ua “nej yuav tau nqi zog”.
Hauv nqe 3, peb pom tus lw nrhiav tus Tswv thiab tau ntsib Nws ntsig txog txojkev qhia, kawm thiab ua raws li tus Tswv tej lus. Thaum tus Tswv haivneeg muab Nws tso tseg kuj yog lub sijhawm uas lawv tsis muaj tus Tswv Txojlus qhia, tsis ua raws li Nws tej kevcai. Tus Tswv siv kev tsovrog, kub ntxhov ua rau lawv tig rov los cuag Nws. Thaum ntawd, tus Tswv tsis xav kom Vajntxwv Axas txaus siab rau qhov nws ntaus yeej rog tiamsis Nws xav kom vajntxwv thiab cov pejxeem ua neej mloog Nws lus, ua raws li Nws tej kevcai kom tsis txhob poob txojkev thajyeeb uas tus Tswv pub.
Thaum peb txais yuav tus Tswv Yexus los kav yus lub neej ces qhov uas Yexus Khetos kovyeej txojkev txhaum thiab txojkev tuag kuj yog peb qhov kev kovyeej (I. Kauleethaus 15:54-57). Peb tau tus Tswv pub kom muaj yeej tiamsis Nws tsis xav kom peb txaus siab rau qhov kev muaj yeej thiab nres ntawd xwb. Nws xav kom peb niaj hnub nrhiav Nws dhau los ntawm kev pehawm, thov Vajtswv, kawm thiab ua raws li Nws Txojlus, kom “ntsib Nws”. Thaum ntawd tus Tswv yuav nrog peb, mloog peb tej lus thov, pab cawm, foom koob hmoov thiab pub kev kaj siab rau peb lub neej.
Thov Vajtswv,
Tus Tswv, yog hais tias nyuam yaus tsis tau nrhiav Koj, tsis mloog Koj lus thiab tsis tau ntsib Koj. Thov Koj qhia kom nyuam yaus paub tig los cuag Koj, nrhiav Koj thiab tau nrog Koj nyob txhua lub caij nyoog. Amees.
Peb puas tabtom nrhiav tus Tswv thiab ntsib Nws lawm tau?
Nyeem Vajluskub hauv peb lub xyoos: Yaxayas 21
Kênh Youtube BHKTHN:
