Pajlug 23:9-11
Nqe cim.
“Tus Tswv uas muaj hwjchim yuav tuaj lawv tog thiab pab lawv ua ncauj ua lus tawmtsam koj.” (Pajlug 23:11)
Lus nug rau sawvdaws xav.
– Tibneeg cheemtsum zeem paub tus kheej muaj nrim licas?
– Leejtwg yuav tuaj cov neeg txomnyem tog?
– Peb qhia tawm Vajtswv lub hwjchim dhau ntawm kev ua neej txhua hnub licas?
Tibneeg yuav tsum zeem paub hais tias tsuas muaj Vajtswv tib leeg xwb thiaj yog tus uas muaj hwjchim loj kawg nkaus, tshuav tibneeg yog cov uas muaj nrim. Hauv ntu Vajluskub hnub no, Vajntxwv Xalumoos qhia menyuam tsis txhob siv zog hloov cov neeg ruam. Lo lus “ruam” hauv nqe 9 raws li lus Henplais yog “kesil” muaj lub ntsiab hais tias ruam npub, tawv tsaig, tsis dim ntawm tus kheej lub vaj loog kev xav nqaim. Ntawm no yog tus neeg tawv nyom, khavtheeb, yog li ntawd koj tsis txhob nkim sijhawm los hais, vim txawm koj siv zog los tsuas tau txais nws txojkev saib tsis taus xwb. Tej lus txawj ntse uas koj qhia lawv tsuas zoo ib yam li muab tej hlaws muaj nqis pov rau ntawm npua hauv ntej xwb, yog ua li ntawd muaj qabhau dabtsi? (Mathais 7:6) Koj yuav hloov tsis tau lawv.
Saib mus rau lwm seem twg, koj yuav tsum zeem paub Vajtswv yog tus muaj hwjchim. Tsis txhob xav hais tias koj yuav siv tau koj tus peevxwm, meejmom, nyiaj txiag ua “ib txhais tes npog ntuj”, quabyuam cov menyuam ntsuag, cov neeg poob qis. Txawm tias cov neeg txomnyem ua tsis tau li cas rau koj, los tus uas pab lawv yog Vajtswv tus uas muaj hwjchim yuav tuaj lawv tog. Tsis txhob xav tias yuav mus txeeb cov menyuam ntsuag, cov pojntsuam tej liaj teb vim tsis muaj neeg pab lawv hais. Vajtswv Txojlus hais tias: “Tus Tswv yuav rhuav tshem cov neeg muab hlob tej vajtse, tiamsis nws yuav tsomkwm cov pojntsuam tej teej tug” (Pajlug 15:25).
Niaj hnub nimno, muaj ntau leej nyob hauv ntiajteb no kuj tabtom muaj tus cwjpwm saib tsis taus, thuam tus Tswv cov menyuam thaum mus qhia Txojmoo Zoo cawm lawv dim. Cov neeg tsawg tswvyim no yog neeg “ruam” tabmeeg Vajtswv txojkev txawjntse. Lawv khavtheeb siv kev xav, kev kawm hauv ntiajteb los ua “saib tsis taus” Vajtswv tej lus “uas muaj tswvyim”. Timthawj Paulus qhia paub hais tias: “Cov neeg uas yuav raug kev puastsuaj xav hais tias, qhov uas Yexus Khetos tuag saum tus ntoo khaublig tsis tseemceeb dabtsi rau lawv li; tiamsis peb cov uas twb tau txais txojkev cawm dim lawm, peb paub hais tias qhov ntawd yog Vajtswv lub hwjchim ntag” (I Kauleethaus 1:18). Txawm licas los xij, peb tsis txhob poob siab, cia li qhia txhua yam teebmeem rau Vajtswv tus muaj hwjchim. Los ntawm lub hwjchim tus Tswv cawm peb dim licas, ces Vaj Ntsujplig kuj yuav hloov pauv cov neeg ruam lub siab tawv ib yam li ntawd. Peb cia li qhia tshwm txojkev hlub, kev ncaj ncees rau txhua tus hauv kev ua neej, tshwjxeeb yog ua rau cov menyuam ntsuag, cov pojntsuam kom lawv muaj kev ntseeg ruaj khov rau Vajtswv tus muaj hwjchim. Tus Tswv hais tias: “Txoj kevcai uas Vajtswv tus uas yog peb Leej Txiv suav hais tias yog txoj uas zoo thiab tseeb, txoj ntawd yog nej yuav tsum pab cov pojntsuam thiab cov menyuam ntsuag uas raug kev txomnyem quaj ntsuag. Thiab nej tsis txhob mus nrog neeg ntiajteb ua phem ua qias” (Yakaunpaus 1:27).
Thov Vajtswv,
Tus Tswv, nyuam yaus ua Koj tsaug rau qhov koj cawm thiab foom hmoov rau nyuam yaus lubneej. Thov pub nyuam yaus tuav ruaj kev ntseeg Koj, kub siab tshajtawm Koj lub npe. Thov pub nyuam yaus qhia tshwm kev ntseeg dhau ntawm lubneej sib hlub, ua ncaj rau lwm tus. Nyuam yaus tuav Yexus Khetos lub npe thov, Amees.
Yam dabtsi pab peb ruaj siab qhia tus Tswv lub npe txawm yog txomnyem lossis tau zoo?
Nyeem Vajluskub hauv peb lub xyoos: Lukas 20
Kênh Youtube BHKTHN:
