Yakơ 2:20-26
“Tơdrong ‘noh bơ̆n băt boih, ưh kơ sĭ yua kơ sư lui đĕch ôh, yua kơ sư pơm kiơ̆ kơ nơ̆r ‘Bok Kei-Dei akhan. Yua kơ sư pơm kiơ̆ na bơ̆n băt kơ sư bơngai lui kơjăp tơpă.” (Yakơ 2:22)
Nơ̆r jet tơchĕng pơwao:
– ‘Bok Yakơ đei yua tơdrong kơmĭl ayơ lăm Pah So wă tơbăt ăn kơ bơ̆n đon lui păng tơdrong bơ̆n pơm?
– Lăm tơdrong kơmĭl ‘nâu tơƀôh ăn kơ bơ̆n tơdrong kiơ?
– Lu bơ̆n đei dŏng pơklaih noh yua kơ đon lui lei mă yua kơ tơdrong bơ̆n jang?
Đơ̆ng rŏng kơ tơbôh ăn kơ bơ̆n đon lui lôch, đon lui ưh kơ ba ăn tơdrong dŏng pơklaih, ‘bok Yakơ tơ’bôh kơ kon ‘Bok Kei-Dei hlôh kơ thoi yơ đon lui arih. Lăm Pah So đei hŏk pơhrăm đơ̆ng ‘bok Ap-ra-ham păng yă Rahap.
‘Bok Ap-ra-ham đei tơ’bôh kơ bơ̆n đon lui tih tin sư noh jơ̆ wă pơyơ̆r kon sư Ysăk ăn kơ Kră Yang (trong 21, lăng thim Blŭng a 22). Kăl kơ băt hơđăl tơdrong âu đơ̆ng rŏng đunh dêh đơ̆ng tơdrong mă sư lui kơ Kră Yang (Lăng lăm Blŭng a 15:6). Tơdrong pơyơ̆r Ysăk noh jơ̆ tơ’bôh kơ ‘bok Ap-ra-ham chu kiơ̆ Kră Yang lăm tôm tơdrong mă khan tơdrong âu hơnat tơpă.
Kơmĭl mă ‘bar noh jơ̆ yă Rahap, sư bơngai pơm đi tơ Pơlei Jêricô. Hơdrol kơ nâu sư đei băt kơ tơdrong hlĭch chrơp đơ̆ng Kră Yang păng sư đei jơnăr wă chu kơ Kră Yang mă khan tơdrong sư chu noh jơ̆ hli krê hơmơt “yua kơ sư đei sơng iŏk lu bơngai năm chă lăng” đơ̆ng lu bơngai Israel đei wơh. Đơ̆ng rŏng kơ ‘noh, yă Rahap Kră Yang đei jô̆ ăn kơ sư “bơngai tơpăt” (Yakơ 2:25, lăng thim lăm Jôsuê 2). Lăm Sơ̆p hla bơar Hêbrơ đei bơtho khan thim yă Rahap pơm ‘nâu “hăm đon lui” (Hêbrơ 11:31).
Lăm tơdrong lei lăi kơ ‘bar ‘nu brei noh jơ̆ măr sư đei băt kơ Kră Yang ngăl, lui kơ Kră Yang đunh bơih. Păng trŏ kơ jơnăr wă rơih iŏk, sư đei rơih iŏk tơdrong chu Kră Yang, mă khan tơdrong noh wă pơm ăn tơdrong răm păng tơdrong hiong tih. Mă lei tơdrong sư pơm noh tơ’bôh ăn kơ sư đei đon lui tih tơpă.
Lăm trong 24, Yakơ đei pơma, “Thoi noh iĕm kư̆m băt mơ̆n ‘Bok Kei-Dei jô̆ bơ̆n bơngai ‘lơ̆ng tơpăt yua kơ bơ̆n lui păng pơm kiơ̆ hloi dôm tơdrong Sư pơkă, ưh kơ sĭ khan yua kơ bơ̆n lui đĕch ôh.” Phŏ bơ̆n đei mơ̆ng tơdrong âu nhen pha ra kơ tơdrong ‘bok Pôl đei bơtho lăm Sơ̆p hla bơar Êphêsô 2:8-9 lu bơ̆n gơh klaih noh yua kơ “tơdrong mơnat, hăm đon lui” ưh kơ trŏ đơ̆ng tơdrong jang bơ̆n pơm. Mă lei tơdah bơ̆n lăng đơ̆ng kơpal ‘noh ‘bok Yakơ đei tơbăt ăn kơ bơ̆n đon lui arih noh jơ̆ thoi yơ. Đon lui ‘noh tơ’bôh hăm tơdrong chu yom, drơ̆ng gah Kră Yang lăm tơdrong anat pat. John Calvin bơngai mă rơgei păng lăm tơdrong hơmet lăm tơdrong lui đei pơma pơtôch thoi âu: “lu bơ̆n gơh klaih noh jơ̆ yua kơ minh đon lui đĕch,mă lei đon lui noh tơ’bôh lăm tơdrong bơ̆jang”. Kăl kơ pơma mă hơđăl dơ̆ng thoi âu lu bơ̆n gơh klaih noh hăm đon lui ưh kơ trŏ hăm tơdrong bơ̆n jang. Mă lei đon lui noh kăl kơ tơ’bôh hăm tơdrong arih sa rim năr, chu kiơ̆ nơ̆r Kră Yang mă lu bơ̆n tơ’bôh ăn.
Ơ Kră Yang, apinh ih tơgŭm inh hlôh gah tơdrong lui arih wă kơ inh hoei kơ pơ ang akâu kơdih inh lăm tơdrong hlôh băt kơ dih kâu inh. Apinh Ih tơgŭm inh arih minh chăl arih chu yom păng pơ̆n nuih chu hŭt akâu yua kơ Ih. Apinh Ih tơgŭm inh dôm tơdrong ‘lơ̆ng mă inh đei pơm ‘noh jơ̆ pơsĭt kơ đon lui tơpă, đon lui dŏng pơklaih, đon lui noh pơ ư-ang kơ Ih. Yua anăn Kră Yang Yêsu Krsit, Amen!
Dôm tơdrong mă lu bơ̆n đei pơm hăm tơ’bôh ăn kơ bơ̆n đei đon lui tơpă dah ưh?
Đŏk Sơ̆p Hla bơar ‘Bok Kei-Dei lăm pêng sơnăm: Luka 19
Kênh Youtube BHKTHN:
https://www.youtube.com/c/bhkthn
