Klei Aê Diê Blŭ: Klei Bi Hriêng 23:9‑11
Êlan kliăng: “Kyuadah Pô Bi Tui diñu jing myang, Ñu srăng mgang kđi digơ̆ bi kdơ̆ng hŏng ih” (Klei Bi Hriêng 23:11)
Klei êmuh ksiêm mĭn: Si čiăng kơ anak mnuih thâo kral klei dưi pô mâo knhal? Hlei pô srăng mgang kơ phung ƀun ƀin? Si drei bi êdah klei myang Aê Diê hlăm klei hdĭp grăp hruê?
Anak mnuih brei thâo knŏng Aê Diê jing Pô mâo klei myang kluôm, bi anak mnuih knŏng mâo klei dưi mâo knhal. Hlăm trăn Klei Aê Diê Blŭ hruê anei, Mtao Salômôn mtô anak đăm gĭr jih ai tiê čiăng bi mlih phung mluk ôh. Boh blŭ “mluk” hlăm êlan 9 hlăm klei Hêbrơ jing “kesil” jing mnuih mluk, amâo uêñ, amâo tlaih ôh mơ̆ng klei bi kah êpul, klei kƀah pô. Anei jing mnuih khăng kŏ, mgao kyua anăn anak đăm luč hruê mmông hơăi mang ôh kyua klei gĭr anak knŏng ngă kơ pô anăn mưč mač kơ anak đuč. Dŭm klei blŭ anak mtô diñu msĕ si hwiê añŭ pô ti anăp ŭn, snăn ya klei tŭ dưn (Y‑Mathiơ 7:6)? Anak amâo dưi bi mlih ôh diñu.
Hlăm sa klei mkăn, brei anak thâo Aê Diê jing Pô Myang Hĭn. Đăm ôh bi mĭn anak dưi yua klei thâo, klei mâo, prăk mah čiăng “sa ƀĕ kngan guôm Adiê”, ngă jhat kơ phung êrĭt amĭ ama, phung êdu awăt. Wăt tơdah phung ƀun ƀin amâo dưi bi kdơ̆ng ôh hŏng anak čiăng răng mgang klei dưi kơ digơ̆, ƀiădah Pô Bi Tui digơ̆ jing Aê Diê myang hĭn srăng mgang digơ̆. Đăm bi mĭn ôh kơ bruă srăng mă jih lăn ala phung hđeh êrĭt amĭ ama, phung mniê djiê ung kyua amâo mâo ôh pô mgang klei dưi kơ digơ̆. Klei Aê Diê Blŭ čih: “Yêhôwa bi klưh sang phung mgao, ƀiădah Ñu mgang knông lăn mniê djiê ung” (Klei Bi Hriêng 15:25).
Hruê anei, lu mnuih hlăm lăn ala ăt dôk mâo knuih mưč mač tơdah phung ƀuôn sang Aê Diê hưn Klei Mrâo Mrang Jăk bi mtlaih kơ diñu. Phung mluk anei jing “mluk” ti anăp klei thâo mĭn Aê Diê. Diñu mgao yua klei mĭn, klei thâo lăn ala čiăng “mưč kơ klei thâo mĭn” mơ̆ng Klei Aê Diê Blŭ. Khua ƀĭng kna Y‑Pôl brei thâo: “Kyuadah klei mtô kơ kyâo bi kal jing klei khŏ kơ phung dôk rai luč, ƀiădah ñu jing klei myang Aê Diê kơ phung drei Aê Diê dôk bi mtlaih” (I Kôrantô 1:18). Khădah snăn drei đăm êdu ai ôh, brei myơr klei dleh dlan kơ Aê Diê Pô Mâo Jih Klei Myang. Kyua si klei myang Aê Diê bi tui leh drei, snăn Yang Mngăt Jăk ăt srăng dưi bi mlih ai tiê khăng phung mluk anăn snăn mơh. Brei drei ăt bi êdah klei khăp, klei kpă ênô hŏng grăp čô hlăm klei hdĭp, boh nik hŏng phung êrĭt amĭ ama, mniê djiê ung čiăng bi êdah klei đăo kjăp hlăm Aê Diê Pô Myang Hĭn. Aê Diê lač, “Snei klei đăo doh leh anăn amâo čhŏ ôh ti anăp Aê Diê Ama: đru phung anak êrĭt leh anăn phung mniê djiê ung hlăm klei knap mñai digơ̆, leh anăn răng kriê amâo bi čhŏ ñu pô hŏng klei mưng lăn ala” (Y‑Yakơ 1:27).
Ya klei đru drei kjăp ai tiê hâo hưn Anăn Aê Diê amâo uêñ kơ mmông găl amâodah amâo găl?
Wah lač: Ơ Aê Diê, kâo bi mni kơ Ih bi tui leh kâo leh anăn hơêč hmưi kơ klei hdĭp kâo. Akâo kơ Ih đru kâo dôk kjăp hlăm Khua Yang pô myang, kjăp ai tiê hiu hưn Anăn Ih. Akâo kơ Ih đru kâo bi êdah nanao klei đăo hlăm knuih hdĭp thâo khăp, kpă ênô hŏng grăp čô mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y‑Luk 20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
