Efexus 6:1-4
Nqe cim zaj kawm:
“Nej cov uas yog menyuam, nej yuav tsum mloog nej niam nej txiv lus, nej ua li ntawd thiaj li haum Vajtswv siab. Nej cov uas yog niam yog txiv, nej tsis txhob lam tau lam ua rau nej cov menyuam chim, nyob tsam lawv tu siab.” (Kaulauxais 3:20-21)
Lus nug xav:
– Timthawj Paulus ntuas cov menyuam thiab niamtxiv kom ib leeg coj li cas rau ib leeg?
– Tsevneeg ntseeg hauv tus Tswv yog tsevneeg zoo li cas?
– Peb yuav tsum tsa peb tsevneeg rau saum lub plag twg?
Tomqab uas qhia txog kev sib raug zoo ntawm tus txiv thiab tus pojniam (Efexus 5:22-33), Timthawj Paulus txuas ntxiv hais txog kev sib raug zoo ntawm niamtxiv thiab menyuam. Nov kuj yog kev sib raug zoo uas ib leeg muaj rau ib leeg: menyuam mloog niamtxiv lus, hos niamtxiv tsis txhob ua rau menyuam chim.
Vajtswv Txojlus qhia hais tias: “Cov menyuam, nej cia li mloog niam txiv lus rau hauv tus Tswv” (nqe 1a HMOWSV). Lo lus “hauv tus Tswv” txhais hais tias yog tus Tswv tug, ua raws li tus Tswv siab nyiam (Kaulauxais 3:20). Lo lus “vim qhov no raug cai lawm” (nqe 1b HMOWSV) txhais hais tias yog yam tseeb, tsimnyog ua; lo lus “raug cai” hauvpaus lus txhais hais tias ncaj ncees thiab haum raws li txojcai. Kev mloog lus tsis yog tsuas yog kev coj sab nraud xwb, tiamsis kuj yog lub siab hwm niam txiv uas tawm hauv kev hwm Vajtswv los, qhov no yog txojcai sib hlub uas Vajtswv tsim tseg. Menyuam yuav kawm paub mloog tus Tswv thaum lawv paub mloog thiab hwm niamtxiv. Lo lus samhwm hais tias: “Nej yuav tsum hwm nej niam nej txiv” muaj lo lus cogtseg koob hmoov raws qab hais tias: “Yog nej ua li ntawd, nej yuav noj qab nyob zoo thiab muaj txojsia nyob ntev hauv lub ntiajteb no” (nqe 3). Thaum menyuam paub hwm niamtxiv tej lus qhuab ntuas, lawv yuav dim ntawm ntau txojkev xaiv yuam kev thiab loj hlob hauv Vajtswv txoj koob hmoov.
“Nej cov uas ua niam ua txiv, nej tsis txhob ua rau nej tej menyuam chim” (nqe 4a). Lub hwjchim ntawm kev ua niam ua txiv tsis yog hwjchim tswjhwm, tiamsis yog feemxyuam hlub tshua. Kev ncajncees hauv tsevneeg yuav tsis tshwmsim yog kev qhuab qhia tsis muaj kev ua siab ntev, kev nkag siab, lossis qhia nruj dhau. Vajtswv nqua hu niamtxiv hais tias: “Nej yuav tsum qhuab ntuas nej tej menyuam raws li Vajtswv Txojlus qhia” (nqe 4b). Qhov no txhais hais tias txojkev qhuab qhia yuav tsum qhia tshwm Vajtswv nplooj siab, muaj leej qhov tseeb thiab koob hmoov hlub. Menyuam tsis yog tsuas cheemtsum kev qhuab ntuas xwb, tiamsis kuj cheemtsum kev coj qhia los ntawm txojkev hlub thiab ua qauv zoo. Menyuam feem ntau kawm txojkev ntseeg tsis yog los ntawm tej lus qhuab qhia ntev ntev xwb, tiamsis yog los ntawm qhov uas lawv pom niamtxiv thov Vajtswv, zam txim thiab sib hlub txhua hnub.
Tsevneeg ntseeg tsis yog tsevneeg zoo kawg nkaus txhua sab, tiamsis yog tsevneeg uas niamtxiv thiab menyuam ua ke taug txojkev uas tus Tswv coj. Qhov uas niamtxiv thiab menyuam ib leeg coj rau ib leeg raws li Vajtswv Txojlus qhia yuav qhia tshwm Vajtswv txojkev ncajncees thiab txojkev hlub. Menyuam kawm hwm thiab mloog lus; niamtxiv kawm coj qhia menyuam los ntawm txojkev hlub, kev mos siab muag thiab qhia ua raws li Vajtswv Txojlus. Niaj hnub nimno, thaum tibneeg saib tsis taus tsevneeg tej txiajntsig zuj zus, ces kev sib raug zoo ntawm niamtxiv thiab menyuam kuj tawg zuj zus lawm thiab. Peb yuav tsum tuav rawv txojcai hauv Vajtswv Txojlus los tsa peb tsevneeg rau saum lub plag ntawm kev ncajncees thiab kev hlub, kom menyuam tau loj hlob hauv tus Tswv txojkev taw qhia, thiab niamtxiv qhia menyuam los ntawm lub siab zoo ib yam li Tswv Yexus Khetos.
Thov Vajtswv,
Tus Tswv, thov pab nyuam yaus paub mloog lus, paub coj qhia thiab paub sib hlub raws li Koj tus yamntxwv. Thov cia nyuam yaus tsevneeg ua ib tsevneeg ntseeg tiag tiag, thiab ua qhov chaw Koj lub npe tau koob meej. Nyuam yaus tuav Tswv Yexus Khetos lub npe thov, Amees.
Peb tsevneeg tabtom ua raws niamtxiv thiab menyuam feemxyuam li cas?
Nyeem Vajluskub hauv peb lub xyoos Xakhaliyas 7
Kênh Youtube BHKTHN:
