Hơriso 1:1-6
“Yua kơ Kră Yang băt trong lu bơngai tơpăt, Mă-lei trong lu bơngai kơnê̆ gô hiong răm.”
(Hơriso 1:6)
Nơ̆r jet tơchĕng pơwao:
– Lu bơ̆n arih thoi yơ kơplah bơ̆n pôk Kră Yang pơm pơtao lăm chăl arih?
– “Bơngai kơnê̆” đei pơdah sư thoi yơ?
– “Trong lu bơngai yoch” noh kiơ?
– Bơngai kơnê̆ đei pơting nhen thoi hơnong ba kial pơđông wă khan thoi yơ?
“Bơngai kơnê̆” lăm Hơriso 1:1-2 đei pơma tơbôh wă khan bơngai khĕnh, bơngai yoch păng bơngai bley hiap. Lu bơngai nâu lu sư ling lang kơ ayăt kơ Kră Yang lăm tơdrong tơchĕng, nơ̆r pơma, păng tơdrong đei pơm jang. Bơngai kơnê̆ kŭm đei pơma kơ lu bơngai mă ưh kơ wei kơjăp tơdrong pơgơ̆p hăm ‘Bok Kei-Dei.
“Trong bơngai kơnê̆” dah “trong bơngai yoch” noh jơ̆ tơdrong arih lu bơngai ưh kơ hli yom kơ ‘Bok Kei-Dei. Lu sư ưh kơ kiơ̆ khôi juăt, pơang, pơm kiơ̆ kơ tơdrong wă lăm sĕch akar păng rok kiơ̆ kơ lu tơdrong kơnê̆ lăm teh đak. Lu sư pơma blông kơ ‘Bok Kei-Dei hăm nơ̆r pơma lu sư, kơkuh kơ rup yang, rok kiơ̆ tơdrong kơkuh kơrup yang thoi lu bơngai nguaih kơ lu bơngai Israel mă ưh kơ lui kơ ‘Bok Kei-Dei (II Hơmon 33:1-9). Bơngai kơnê̆ nhen thoi hơnong ba kial dơhlu nhen thoi ‘ba bo ưh kơ đei akâu mă ưh kơ đei yua kiơ, kial dơhlu lu sư gô đông păr hiong. Tuch luch, lu sư ưh kơ gơh dơ̆ng lăm khŭl bơngai ‘lơ̆ng tơpăt păng ưh kơ gơh dơ̆ng ‘bơ̆t lăm năr sek tơlang (trong 5).
Lu bơngai ayăt kơ ‘Bok Kei-Dei ưh kơ sĭ kơ minh tơdrong nhen thoi lu bơngai pơlôch bơngai đĕch ôh, dah minh hơlĕnh pơdăr đĕch ôh, mă lei lu bơngai mă arih ‘lơ̆ng mơ̆n ră mă lei ưh kơ đei lui kơ ‘Bok Kei-Dei jơ̆ tơngla pơjing, tơngla ăn khôi juăt kơ kon bơngai păng tơngla wă sek tơlang kon bơngai. Lu sư ưh kơ hơmet tơdrong thoi Kră Yang đei bơtho khan mă lei lu sư ôn tơdrong yoch lu sư, pơma dŏng kơdih akâu, pơm tơdrong ‘lơ̆ng wă klơ̆p ôn lê̆ tơdrong yoch noh wă kơ lu bơngai nai lăng jô̆ sư bơngai ‘lơ̆ng tơpăt.
‘‘Bok Êsai đei pơma thoi âu: “Lu nhôn đĭ-đăng jing nhen thoi bơngai ‘mê̆-‘mach bơih, dôm tơdrong tơpăt lu nhôn, nhen thoi ao mơgrĭ…” (Êsai 64:6). Ưh kơ đei bu gơh jô̆ sư ‘lơ̆ng tơpăt yua kơ adrĕch adrŭng, tơdrong lui dah tơdrong pơm ‘lơ̆ng. Yua kơ tơdrong ‘mêm mơnat Kră Yang păng tơdrong tơpăt Kră Yang na jô̆ minh ‘nu bơngai noh jing ‘lơ̆ng tơpăt yua kơ sư đei lui kơ Kră Yang Yêsu Krist. Sư bơih mă pŭ iŏk tơdrong yoch kon bơngai. “Yêsu khan: “Inh boih trong iĕm năm tŏk tơ ‘Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai ‘noh ưh kơ truh tơ ‘Bă Inh ôh.” (Yôhan 14:6). Tơdrong pơgơ̆t kơ dih kâu, pơm tơdrong ‘lơ̆ng rŏ kơ gơh đei tơdrong dŏng pơklaih lăng rŏ kơ trŏ ră, mă lei nơ̆r Kră Yang đei chih hơđăl, tơdrong noh ưh kơ đei yua wă dŏng pơklaih bơhngol. “Đei minh trong kon bơngai khan ‘lơ̆ng tơpăt, Mă-lei trong noh tuch-luch sư jing trong tơdrong lôch.” (Pơđơ̆k 16:25).
Rim ‘nu kơbơ̆n kăl kơ lăng kơdih akâu bơ̆n. Kơplah bơ̆n pôk pơ ư Kră Yang Yêsu Krist pơm pơtao lăm chăl arih, lu bơ̆n kăl kơ hŭt lê̆ dôm tơdrong tơchĕng, nơ̆r pơma dah tơdrong jang bơ̆n wă ayăt kơ Kră Yang, hŭt lê̆ dôm tơdrong tơchĕng pơang lăm tơdrong tơchĕng, nĕ kơ ăn minh nơ̆r hiap pơtê̆ lĕch đơ̆ng ‘bơ̆r bơ̆n. Athei yak năm trong ‘lơ̆ng tơpăt păng weh ataih đơ̆ng trong lu bơngai kơnê̆.
Ơ Kră Yang, Inh jơ̆ minh ‘nu bơngai yoch kơnê̆ mă lei đei tơdrong Ih mơnat ăn, păng huai iŏk inh bơih păng ăn kơ inh gơh jing kon Ih. Apinh Ih Yang ‘Bă tơgŭm inh ‘maih hưch hanh kơ tơdrong hŏk pơhrăm nơ̆r Ih, mơ̆ng nơ̆r Ih, păng lăng hơlen chăl arih inh, tơbral tơdrong yoch păng weh ataih đơ̆ng tơdrong kơnê̆. Yua anăn Kră Yang Yêsu Krist, Amen.
‘Bai pơhrăm ‘nâu tơgŭm bơ̆n kăl kơ tơplih tơdrong kiơ lăm chăl arih bơ̆n?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Jêrêmi 39
Kênh Youtube BHKTHN:
