I Kôrintô 7:25-40
“Inh wă kơ lu iĕm bơngai ngôi hơdrô̆ huay kơ tơchĕng gah tơdrong kon akăn. Bơngai ngôi hơdrô̆, bơngai ei adrin jang tơdrong Kră Yang yua kơ sư wă kơ Kră Yang lăp đon kơ sư.” (I Kôrintô 7:32)
Nơ̆r jet tơchĕng pơwao:
– ‘Bok Pôl jơ̆ng ‘bang Kră Yang đei tơlĕch lu tơdrong ayơ kơ tơdrong arih hơdrô̆ ‘lơ̆ng hloh kơ chă klo kăn?
– Pơma kơ tơdrong lăm năr tôch kơnh, sư lĕch nơ̆r pơma gah tơdrong arih hơdrô̆ thoi yơ?
– ‘Bai pơhrăm âu tơ’blŏk kơ bơ̆n tơdrong kiơ?
Lăm chăl trong nơ̆r Kră Yang năr ‘nâu, Pôl jơ̆ng ‘bang Kră Yang pơma tơ’bôh gah tơdrong arih hơdrô̆, bơngai tam mă iŏk klo kăn păng lu bơngai achăng băl, dah bơngai klo bơngai akăn lôch bơih, bơngai noh hơdrô̆ oei ‘lơ̆p păng bơngai ‘lŏ kră bơih. Oei bơwei arih hơdrô̆ noh minh tơdrong rơih iŏk ‘lơ̆ng dêh, đei gơh pơlung dih băl, sư pơma kơ tơdrong arih hơdrô̆ lĕch đơ̆ng ‘bar tơdrong âu; mă minh “ kư̆m đei bơih tơdrong truh” (trong 26), păng mă ‘bar; “năr ei wă jê̆ truh bơih….dôm tơdrong ala teh âu gô hiong hiach hach răm tôch đĕch.” (trong 29,31) ‘bar nơ̆r âu tơ’bôh arih hơdrô̆ noh tơdrong rơih iŏk ‘lơ̆ng dêh yua kơ năr tôch wă jê̆ bơih.
Pơma kơ lăm năr wă jê̆ tôch, arih hơdrô̆ ‘lơ̆ng dêh, yua kơ năr ei kơnh lu bơngai arih hơdrô̆ lu sư gô rơngei đơ̆ng tơdrong “gleh pơmat gah sĕch akar ” wă kơ đei tôm mah păng jơhngơ̆m bơ̆jang kơ Kră Yang, pơma pha ‘biơ̆, wă khan sư wă pơma bơngai đei hnam dơnŏ tơdrong jang sư noh pơm kơ hnam dơnŏ sư lăp đon noh tơdrong kăl kơ pơm păng athei pơm hloi. Achăng pră kon akăn na hăt bơ̆jang kơ Kră Yang tơdrong âu lăm Sơ̆p Hla bơar Nơ̆r Kră Yang ưh kơ layơ bơtho ôh, đơ̆ng noh, nơ̆r “ Ơ ‘nhŏng oh, inh wă pơma kơ iĕm mă nhên gah tơdrong âu: Năr ei wă jê̆ truh bơih na đơ̆ng âu tơ anăp lu bơngai đĭ đei kon akăn athei kiơ̆ tơdrong arih lu bơngai ưh kơ đei kon akăn ‘biơ̆, wă kơ gơh adrin jang tơdrong ‘Bok Kei-Dei” (trong 29), kăl kơ đŏk lăm tơdrong bơtho đơ̆ng Sơ̆p Hla Bơar Nơ̆r Kră Yang, bơ̆n athei bơngai đei klo kăn athei arih ‘nĕ kơ tơchĕng dêh gah mŭk tơmam lăm chăl âu, lu sư athei băt ‘mêm păng wei lăng hnam dơnŏ sư, mă-lei ‘nĕ kơ ăn tơdrong noh pơgơ̆r lăm jơhngơ̆m păng jơ ‘năr wă kơnhăm tih hloh kơ anih Kră Yang lăp đon, gah tơdrong âu, bơngai arih hơdrô̆ đei “ hiôk hloh ‘biơ̆ ” “huei kơ đei tơchĕng kon akăn ”, đơ̆ng noh đei jơ ‘năr “mă-lei lu bơngai dro-kăn mă ưh kơ đei klo, sư adrin jang tơdrong Kră Yang sư pơyơ̆r akâu sư kơ Kră Yang đĭ đon tơchĕng, đĭ jơhngơ̆m klơm klak sư.” (trong 32, 34). Thoi noh bơih, bơngai arih hơdrơ̆k “wă kơ iĕm adrin jang tơdrong Kră Yang hăm đĭ jơhngơ̆m klơm klak iĕm.” (trong 35) kơlih kơ thoi noh, Pôl bơtho kơ lu bơngai tam mă đei klo kăn, păng lu bơngai tam mă đei tơguăt dih băl athei arih thoi noh đĕch ‘lơ̆ng hloh, na lu bơngai adro sư rơngei chă klo kăn plơ̆ng dah ưh, mă-lei sư khan ‘lơ̆ng hloh ngôi hơdrô̆ đĕch, tơdrong arih hơdrô̆ yua đei kơnhăm ‘lơ̆ng dêh đơ̆ng ‘Bok Pôl đei bơtho thoi âu “đei pŭn hloh “ (trong 40).
Lăm chăl arih bơ̆n dang ei, ‘bai pơhrăm đei tơ’blŏk kơ lu bơ̆n ‘nĕ kơ lăng đei hnam dơnŏ khan jing jei lu bơ̆n bơih, na khan lu bơngai arih hơdrô̆ lŭch hloh. Lăm hơdah Nơ̆r Kră Yang, bơngai đei hnam dơnŏ dah arih hơdrô̆ tă kơ ‘lơ̆ng ngăl lăm Kră Yang. Tơdrong gĭt lăm rim bơngai mă khan thoi yơ hĭ lei athei arih pơ’nhŏ pơyơ̆r ‘mêm kơ Kră Yang hơdrol hloh, gĭt kăl lăm jơ ‘năr kơđeh dêh lăm năr tuch luch ‘nâu.
Ơ Kră Yang, apĭnh Ih tơgŭm inh pơchŭt lu kon hơ’lơ̆p, buăl juăt mă đei arih hơdrô̆ păng hnam dơnŏ pơm kơ lu sư pŭ trăp . Apĭnh Ih tơgŭm inh gơh tơgŭm lu bơngai nai chă tơdrong kiơ̆ thoi Ih lăp đon lăm tơdrong pơjing hnam dơnŏ, krao khan yua anăn Kră Yang Yêsu Krist, Amen.
Lu bơ̆n hăm đei pơchŭt kon hơ’lơ̆p pơjing hnam dơnŏ kơdih bơ̆n wă ưh?
Đŏk sơ̆p hla bơar nơ̆r ‘Bok Kei-Dei lăm pêng sơnăm: II Kôrintô 5
Kênh Youtube BHKTHN:
